काठमाडौं– वैशाख ३० मा भएको स्थानीय तहको निर्वाचनको मत परिणाम आउने क्रम अन्त्यतिर पुगेको छ। अब चारवटा स्थानीय तहको मात्रै अन्तिम मत परिणाम आउन बाँकी छ। यसबीच देशभर १३ जना स्वतन्त्र उम्मेदवारहरुले पालिका प्रमुखमा जित निकालेका छन्।
स्थानीय तहको निर्वाचनमा स्वतन्त्र उम्मेदवारी दिएर चर्चामा आएका धरान उपमहानगरपालिकामा हर्कराज राई (साम्पाङ), धनगढी उपमहानगरपालिकामा गोपाल हमाल र काठमाडौं महानगरपालिकामा बालेन्द्र साह (बालेन)को चर्चा चुनाव हुनु अघिदेखि नै थियो। खासगरी हमाल र साहको चर्चा धेरै थियो।
चुनावको क्रममा पनि कलाकारिता क्षेत्रका मानिसहरुले उनीहरुलाई विशेष रुपमा साथ दिएको देखिएको थियो। मुख्यगरि धरानका हर्कराज साम्पाङ र काठमाडौंका बालेनका लागि कलाकारिता क्षेत्र उत्साहित देखिएको थियो।
अहिले धरानमा हर्कले जित निकालेसकेर मेयरका रुपमा काम गर्न थालेका छन् भने काठमाडौंमा बालेनको जित निश्चित भइसकेको छ।
दुई ठाउँका स्वतन्त्र उम्मेदवारको विजयमा कलाकारिता क्षेत्रमा पनि उत्साह देखिएको छ। विभिन्न माध्यमबाट कलाकारहरुले उनीहरुको जितमा आफ्नो मनमा आशा पलाएकोदेखि खुशी भएका कुराहरु सार्वजनिक गरेका छन्।
गायक तथा संगीतकार शिव परियारले धरानमा हर्क र काठमाडौंमा बालेनको जितले आफ्नो मनमा नयाँ आशा पलाएको बताएका छन्। उनले धेरै वर्षपछि मरेको आशा फेरि पलाएको बताउँदै देश बन्ने सुरुवात काठमाडौं र धरानबाट हुने अपेक्षा गरेका छन्।
‘धेरै वर्षपछि मेरो मरेको आशा फेरि पलाएको छ। अब यो देश बन्ने सुरुवात काठमाडौं र धरानबाट सुरुवात हुने छ,’ गायक परियारले सामाजिक सञ्जालमार्फत् लेखेका छन्, ‘काठमाडौं फेरि राम्रो बन्ने छ। आशा गरौं यो देश बन्ने उदाहरणीय सुरुवात काठमाडौं र धरानबाटै हुने छ। साँच्चै नै हामी सारा नेपाली जनताले एउटा उदाहरणीय नेताको आशा गरेका छौं। आशा यही राखौं हामी नागरिकको मन फेरि पनि पक्कै दुखाइने छैन। मेयर हर्क साम्पाङ अनि बालेन्द्र साहलाई सफल कार्यकालको शुभकामना व्यक्त गर्दछु।’
त्यस्तै, अभिनेत्री सुरक्षा पन्तले धरानमा मेयरमा निर्वाचित हर्कको तस्बिरलाई नै आफ्नो प्रोफाइल पिक्चरको रुपमा राखेकी छिन्। स्वतन्त्र उम्मेदवारको जितलाई साथ र हौसला दिँदै सुरक्षाले मंगलबार राति आफ्नो प्रोफाइल पिक्चरलाई परिवर्तन गरेर हर्कको तस्बिर राखेकी हुन्।
सामाजिक सञ्जालमार्फत उनले बलेन र हर्कको समर्थन गरेकी छिन्। उनले तस्बिर राख्दै भनेकी छिन्, ‘धरानका मेयर हर्क साम्पाङ राई, एक क्रान्ति। हामी दुई फरक नेतृत्व एकसाथ राजनीतिमा देख्न पाउने भाग्यमानी हौं।’
सुरक्षाले काठमाडौंको नगर प्रमुख बालेन साह भएको भन्दै उनलाई शुभकामना दिँदै काम गर्न कठिन हुनसक्ने बताएकी छिन्। उनले नयाँ प्रतिनिधिले काठमाडौंको विकासका लागि निर्णय गर्ने पदमा भएपनि पूर्ण रुपमा निर्णय लिन नपाउने अवस्था भएको बताएकी छिन्।
उनी एकको इच्छाले नपुग्ने भएकाले धेरै काम रोकिने वा नहुने अवस्था भएको देखिरहेको बताउँछिन्। सुरक्षा लेख्छिन्, ‘अबको नगर प्रमुख अर्थात् मेयर बालेन्द्र साहजीलाई धेरै धेरै शुभकामना। तपाईंको जोस र होसको सन्तुलनले जादु गरेको छ। एउटा नयाँ प्रतिनिधि जो अब काठमाडौंको विकासका लागि निर्णय रुपी पदमा हुनेछन् तर पनि पूर्ण रुपमा निर्णय लिन नपाउने अवस्था पनि छ किनकी एकजनाको मात्र इच्छाले नपुगेर धेरै कामहरु रोकिने वा नहुने अवस्था भएको प्रत्यक्ष देखिरहेको पनि हो। आफ्नो हकमा नियुक्ति गर्न मिल्ने टिम चाहिँ बिचार गरेर छान्नुहोला जसले तपाईंलाई काम गर्न सजिलो गरिदियोस् र तपाईंको अनुपस्थितिमा पनि अर्को बालेन भएर काम गरोस्। तपाईंको बेजोड कार्यकालको लागि ऊर्जा दिने साथ र सहयोग गर्ने कोसिस हामीहरु पक्कै गर्नेछौं।’
कलाकारिता क्षेत्रका हस्तीहरुले बालेनलाई चुनावी प्रचारकै क्रममा पनि सामाजिक सञ्जालमार्फत निकै साथ दिएका थिए। उनी विजय भएपछि कलाकारहरुले उनलाई बधाईसँगै चुनौती भएकाले काम गर्ने विषयमा ध्यान दिन आग्रह गरेका छन्।
अभिनेता तथा निर्देशक निश्चल बस्नेत आफ्नो फेसबुकमार्फत् स्वतन्त्र उम्मेदवारको जितमा खुशी निरन्तर साटिरहेका छन्। केही दिनअघि जुम्लाको चन्दननाथ नगरपालिकामा निर्वाचित राजु सिंह कठायतको जितमा खुशी साटेका उनले धरानमा निर्वाचित हर्कको जितमा पनि उत्सव मनाएका छन्। उनी सामाजिक सञ्जालमार्फत खुशी साट्दै लेख्छन्, ‘स्वतन्त्रको जित सायद जनताको जित हो। त्यही बुझेर धरानका मतदाताले सुटुक्क हर्क साम्पाङज्यूलाई जिताए। काम गर्ने मान्छे लौरो टेक्दै भएपनि आइपुग्छन् गन्तव्यमा।’
निश्चत बालेनको समर्थनमा पनि निरन्तर सामाजिक सञ्जालमार्फत् बोलिरहेका छन्। मतदानअघिबाटै निरन्तर बालेनको समर्थनमा देखिएकी अभिनेत्री स्वस्तिमा खड्का पनि बालेनको जित निश्चित भएपछि खुशी देखिएकी छिन्।
बालेनले पाएको मत परिणामबारे सामाजिक सञ्जालमा निरन्तर लेख्नेदेखि उनको समर्थनमा र पक्षमा लेखिएका सन्दर्भहरुलाई सेयर गरेर साथ दिनेमा स्वस्तिमाको सक्रियता देखिएको छ।
यता, निर्देशक दीपेन्द्र के खनाललाई भने बालेनको जित निश्चित भएसँगै खुशीले छोएको छ। मतदानअघिबाटै निरन्तर बालेनको समर्थनमा देखिएका खनालले मंगलबार बालेनको जित निश्चित भएसँगै सामाजिक सञ्जालमार्फत बधाई दिन भ्याएका छन्। उनी लेख्छन्, ‘काठमाडौंको फोहोर अब देख्न पाइँदैन भन्ने आशा र भरोसाका साथ नयाँ मेयर साबलाई बधाई तथा सफल कार्यकालको शुभकामना।’
अभिनेत्री तथा नेकपा एमालेकी नेता करिश्मा मानध्नरले पनि काठमाडौं महानगराबसीको रोजाईमा बालेन मेयर भएको भन्दै बधाई दिएकी छिन्। उनले लेखेकी छिन्, ‘लोकतन्त्रमा जनताको रोजाई सर्वोच्च हुनछ। जनताको मन त्यतातर्फ आकर्षित हुन्छ, जहाँ जनताले आफ्नो भविष्य सुनिश्चित देख्छन्। काठमाडौं महानगरवासी जनताको रोजाई हुनै लागेका नयाँ मेयर बालेन साहलाई बधाई तथा सफल कार्यकालको शुभकामना।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1752043710.jpg)
-1749826086.png)
