काठमाडौं– अघिल्लो (२०७४) स्थानीय तहको चुनावमा दुई नगरसहित तीन पालिकामा विजयी भएर पहिलो दल बनेको नेकपा एमालले यसपटकको निर्वाचनमा भने दुई पालिकामा खुम्चिएको छ।
सिन्धुलीका ९ स्थानीय तहमध्ये कमलामाई र दुधौली २ नगरपालिका र ७ गाउँपालिका गरी ९ पालिका छन्। अघिल्लो चुनावमा एमालेले सदरमुकाय रहेको कमलामाई नगरपालिका, दुधौली नगरपालिका र फिक्कल गाउँपालिका गरी तीन स्थानीय तहमा जित हात पारेको थियो। तर, यसपटक दुवै नगरपालिका गुमाएर दुई गाउँपालिका मात्रै जितेको छ।
यसअघि कांग्रेसले जितेको गोलन्जोर गाउँपालिका एमालेले खोसेको छ। गठबन्धनको तर्फबाट कांग्रेसबाट उम्मेदवारी दिएका निर्वतमान गाउँपालिका अध्यक्ष पुष्पबहादुर कार्कीलाई हराउँदै एमालेका शंकरराज बराल गोलन्जोरको अध्यक्षमा विजयी भए। उपाध्यक्षमा भने माओवादीका ज्वाला न्यौपाने (पुकार) विजयी भएका छन्।
त्यसैगरी, अघिल्लो चुनावमा जितेको फिक्कल गाउँपालिका यो पटक पनि एमालेले नै जितेको छ। गठबन्धनलाई हराउँदै एमालेकी पार्वती सुनुवार फिक्कल गाउँपालिका अध्यक्षमा विजयी भइन्।
अघिल्लो चुनावमा सिन्धुलीका ९ स्थानीय तहहरुमध्ये प्रमुख ३ दल (कांग्रेस, एमाले, माओवादी) ले ३/३ वटामा जित हात पारेका थिए। तर, यसपटक भने चार स्थानीय तह जित्दै माओवादी सिन्धुलीमा पहिलो भएको छ।
माओवादीले दुधौली नगरपालिका, हरिहरपुरगढी गाउँपालिका, मरिण गाउँपालिका र सुनकोशी गाउँपालिकामा जित हात पारेको छ। दुधौली नगरपालिका बाहेकका तीन पालिकाहरु यसअघि पनि माओवादीले नै जितेको थियो। अघिल्लो निर्वाचनमा एमालेसँग ३७५ मतले हार ब्यहोरेको दुधौली नगरपालिका यो पटक भने माओवादी विजयी भयो। माओवादीका दिनेश अधिकारी ५ हजार १८६ को फराकिलो मतान्तरले मेयरमा विजयी भए।
सिन्धुलीमा कांग्रेसले भने यो पटक पनि अघिल्लो चुनावको जस्तै अवस्थामा रहेको छ। कांग्रेसले यसअघि जितेको ३ मध्ये १ पालिका गुमाए पनि अर्को १ पालिकामा प्रमुख जितेर ३ पालिकाको नेतृत्व आफ्नो पक्षमा पारेको छ। आफूले जितेतको गोलन्जोर गुमाएको कांग्रेसले एमालेले जितेको कमलामाई नगरपालिकामा यो पटक जित हात पारेको छ।
कमलामाईको मेयरमा कांग्रेसका उपेन्द्र पोखरेल एमालेका महेन्द्रदेव श्रेष्ठलाई हराउँदै विजयी भए। घ्याङलेक र तिनपाटन गाउँपालिका प्रमुखमा यसअघि पनि कांग्रेसले नै जितेको थियो। यो पटक पनि कांग्रेस नै विजयी भएको छ।
स्थानीय तहको नतिजा:
१) कमलामाई नगरपालिका
प्रमुख: उपेन्द्र कुमार पोखरेल/कांग्रेस
उपप्रमुख: मन्जु देवकोटा/एमाले
२) दुधौली नगरपालिका
प्रमुख: दिनेश अधिकारी/माओवादी केन्द्र
उपप्रमुख: चन्द्र किशोर थारु/कांग्रेस
३) गोलन्जोर गाउँपालिका
अध्यक्ष: शंकर राज वराल/एमाले
उपाध्यक्ष: ज्वाला प्रसाद न्यौपाने/माओवादी केन्द्र
४) घ्याङलेख गाउँपालिका
अध्यक्ष: जगत बहादुर भोलन/कांग्रेस
उपाध्यक्ष: शंकर मान घलान/माओवादी केन्द्र
५) तिनपाटन गाउँपालिका
अध्यक्ष: कर्ण बहादुर मगर/कांग्रेस
उपाध्यक्ष: धन बहादुर पुलामी/माओवादी
६) फिक्कल गाउँपालिका
अध्यक्ष: पार्वती सुनुवार/एमाले
उपाध्यक्ष: राजु बराल/एमाले
७) मरिण गाउँपालिका
अध्यक्ष: विमर्स मुक्तान/माओवादी केन्द्र
उपाध्यक्ष: विमला माझी/कांग्रेस
८) सुनकोशी गाउँपालिका
अध्यक्ष: दिपा वोहोरा दाहाल/माओवादी केन्द्र
उपाध्यक्ष: कपिल कुमार कोइराला/कांग्रेस
९) हरिहरपुरगढी गाउँपालिका
अध्यक्ष: बज्र ध्वज वाइवा/माओवादी
उपाध्यक्ष: चेख बहादुर थिङ/कांग्रेस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770871670.png)
-1770871503.png)
-1764146706.png)
-1770562345.jpg)
