वैशाख ३० गते हुने स्थानीय तहको निर्वाचनमा महानगरपालिका र उपमहानगरपालिकामा पाँच दलीय गठबन्धन भए पनि नगर र गाउँपालिकास्तरमा दलहरुले आफूअनुकूल गठबन्धन गरेका छन्। नेकपा एमालेले पनि सम्भव भएसम्मका स्थानमा अन्य दलसँग गठबन्धन गरेको छ। सिन्धुपाल्चोकको मेलम्ची नगरपालिकामा नेपाली कांग्रेस र राप्रपाबीच तालमेल छ। यहाँ कांग्रेसबाट आइतमान तामाङ मेयरका उम्मेदवार छन्। तामाङसँग नेपाल लाइभले गरेको कुराकानीको सम्पादित अंश-
मतदाताले तपाईंलाई किन मत दिने?
म लामो समय यहाँका नागरिकसँगै छु। गत वर्ष असारमा आएको विपत होस् वा २०७२ सालको भुकम्प र कोरोना महामारी, मैले यसै क्षेत्रमा बसेर काम गरेको छु। म गत निर्वाचनमा निकटतम् प्रतिश्पर्धी भएँ। यो पाँच वर्षदेखि मेरा कमजोरीहरु सुधार गर्दै जनतासँगै काम गरिरहेको छु। एमाले नगरपालिकाको नेतृत्वमा आएपछि जनताको अपेक्षा अनुसार काम गरेन। बाढीको समय होस् वा कोरोनाकाल, स्थानीय सरकारले जनतालाई सेवा दिन सकेन। जनता निरास भएका छन्। उनीहरुले यस पटक परिर्वतन खोजेका छन्। त्यसका लागि म विकल्प भएका धेरै मतदाताले बताउनु भएको छ।
मेलम्ची नगरपालिकाभित्र गर्नुपर्ने धेरै काम छन्, त्यसका लागि म योग्य र यहाँको माटो ताथ अवस्थिति वुझेको मानिस हुँ। विद्यालय, विकास निर्माणदेखि बालमैत्री शासन व्यवस्थाका लागि मैले योजनाहरू अघि सारेको छु। यी योजना पूरा गर्न पनि मलाई जनताले मत दिनुहुन्छ भन्ने अपेक्षा छ।
मेलम्ची नगरपालिका विपद्ग्रस्त क्षेत्र हो। विपद् व्यवस्थापन, सडक विस्तारजस्ता विकासका काममा तपाईंका योजना के छन्?
२०७८ असार १ र त्यसपछि हेलम्बुको भ्रेमाथाङमा आएको बाढीले प्रभावित क्षेत्र भएकाले नजिकै आएको वर्षायाममा यो क्षेत्रमा संकट आउन नदिन सबैभन्दा पहिले काम गर्नुपर्नेछ। त्यसका लागि मसँग केही योजनाहरु छन्। नदी नियन्त्रणदेखि नदीलाई व्यवस्थित गर्नेसम्मका काम म मेरो कार्यकालमा गर्छु। मेरो प्रतिबद्धतापत्रमा यस क्षेत्रको विस्तृत विकासबारे उल्लेख गरेको छु।
मेलम्चीमा अब नगरस्तरीय मात्र नभई केन्द्रीय योजना पनि ल्याउनुपर्ने छ। यसका लागि काम गर्नेछु। केन्द्रसँग पहुँच भएको नगर प्रमुखको रुपमा मैले दीर्घकालीन महत्त्वका योजनाहरु अघि सारेको छु। यसका लागि पनि नगरवासीले मलाई मत दिने छन्। मेलम्ची खोला र इन्द्रावतीलाई तटबन्ध गरी गहिराउने काम मेरो कार्यकालमा हुने छ। बाढीले क्षति पुर्याएका बस्ती र खेतीयोग्य जमिनहरुलाई पुन? प्रयोगमा ल्याउन काम गर्नेछु।
प्रत्येक वडाहरुमा पुग्ने सडकलाई स्तरोन्नती गर्ने योजना छ। त्यसका लागि नगरले विस्तृत योजना बनाएर काम गर्छ। बडा कार्यालयहरुको भौतिक संरचना निर्माणदेखि महिला, बालवालिका र युवाहरुको क्षेत्रमा पनि काम हुने छ।
नगर व्यवस्थित बनाउने र रोजगारी सिर्जना गर्ने योजना के–के छन्?
मेलम्ची भर्खरै विकास हुदै गरेको नगर भएकाले यसलाई अझै व्यवस्थित बनाउन योजनाबद्ध काम गर्नुपर्ने आवश्यकता महसुस गरेर मैले मेरो प्रतिवद्धतापत्रमा उल्लेख गरेको छु। मेलम्ची बजार, ग्याल्थुम, तालामाराङ, बाहुनेपाटी र अन्य बजारहरुमा विपद्का कारण क्षति पुगेकोले पुनर्निर्माणका लागि काम गर्नु छ। भ्रेमाथाङको पहिरोले पुर्याउने क्षतिहरुको विज्ञद्धारा मूल्यांकन गराएर व्यवस्थित र सुरक्षित बजार बसाउने अभियान नै शुरु गर्ने छौं। त्यस्तै विपद्को पूर्वसूचना जारी गर्ने संयन्त्रहरुको विकास पनि गरिने छ।
अर्को समस्या भनेको रोजगारी हो। यहाँ प्रचुर मात्रामा गर्न सकिने भनेको कृषि हो। त्यस्तै, पर्यटकीय क्षेत्रहरु पनि रहकाले यसलाई विस्तार गरेर रोजगारी बढाउन सकिन्छ। हेलम्बुसम्म जाने पर्यटकलाई मेलम्ची बसाइ गराउने, गुफाडाँडाजस्ता अनेकौँ पर्यटकीय क्षेत्रहरुलाई विस्तार र प्रचार गरेर पर्यटक वृद्धि गर्ने, पाल्चोक जस्तो धार्मिक पर्यटनको क्षेत्रलाई अझै आकर्षक बनाउने योजना छ।
तपाईंले प्रतिस्पर्धी उम्मेदवारलाई कसरी हेर्नु भएको छ?
मेलम्ची नगरपालिकामा अहिले हेर्दा त्रिपक्षीय प्रतिस्पर्धा देखिएको छ। हामीले राप्रपासँग तालमेल गरेर उपमेयर दिएका छौँ। माओवादी केन्द्र र एकीकृत समाजवादी तालमेल गरेर निर्वाचन लडेको छ। नेकपा एमाले भने एक्लै प्रतिस्पर्धामा छ। अघिल्लो कार्यकाल एमालेले जितेकाले यो क्षेत्रमा त्रिपक्षीय प्रतिस्पर्धा रहेको भन्न सकिन्छ। मैले सबै प्रतिस्पर्धीलाई समान रुपमा लिएको छु। विगतभन्दा यसपटक नेपाली कांग्रेसको संगठन विस्तार गरेको छ। त्यसैले हामी अन्य प्रतिश्पर्धीभन्दा अगाडि छौँ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772284174.png)
-1764146706.png)
-1772271039.png)
