काठमाडौं– ‘हत्तेरी! यस्तो प्रश्न गरेर मलाई फेरि फसाउने काम नगर्नुस् न। बरु यसरी मिलाएर सोध्नुस्– हिरासतमा रहेका पल शाहलाई भेटेर काठमाडौं फर्किएका पुण्य गौतमले उनका हिरासत बसाई कस्तो देखे भन्ने तरीकाले सोध्नुस्। अनुसन्धानको क्रममा रहेको विषयमा मेरो धारणा दिन लगाएर फसाउने काम नगर्नुस्’, दमौलीबाट काठमाडौं फर्किएका पुण्य गौतमले एक युट्युब च्यानलमा अन्तर्वार्ता दिने क्रममा भने।
एक नाबालिग गायिकालाई कलारकार पल शाह (पूर्णविक्रम शाह)ले बलात्कार गरेको आरोप लागेपछि जिल्ला प्रहरी कार्यालय तनुहँको प्रहरी हिरासतमै पुगेर शाहलाई भेटेका र उनका पक्षमा युट्युब च्यानल लगायतमा अभिव्यक्ति दिएर हिँडेका गौतमको एकाएक भनाई फेरियो। पहिला अनुसन्धानको क्रममा रहेका विषयमा शाहको पक्षमा धारणा दिइरहेका गौतम अहिले भने उक्त विषयमा बोल्न नमिल्ने र अदालतले नै ‘दूधको दूध, पानीको पानी’ छुट्याउने बताइरहेका छन्।
केही दिन अघिसम्म एकपक्षीय रुपमा शाहको पक्षमा बोलिरहेका गौतमको बोली एकाएक किन फेरियो? किन उनी अहिले ‘मलाई नफसाउनुस्, अनुसन्धानको क्रममा रहेको विषयमा मैले बोल्न मिल्दैन’ भन्न थालेका छन्?
गौतम आफैं आइतबार नेपाल प्रहरीको केन्द्रीय साइबर ब्युरोमा उपस्थित हुनुले यी प्रश्नको जवाफ थाहा पाउन सघाउँछ।
अघिपछि युट्युबर र १०/१२ जना मान्छे च्यापेर हिँड्ने, आफूलाई ‘अभियन्ता’ र राजनीतिककर्मी भनेर चिनाउने गौतम आइतबार सुटुक्क साइबर ब्यूरो छिरेका थिए। अनुसन्धानको क्रममा रहेको विषयमा अनावश्यक अभिव्यक्ति दिएर प्रभावित पार्न खोजेपछि र प्रहरी कार्यालय अगाडि हुलहुज्जत गरिएपछि युट्युबर र स्वघोषित अभियन्ता दमौली प्रहरीको निशानामा रहेको गौतमले बुझेका थिए। त्यहीकारण उनी दमौलीबाट सुटुक्क काठमाडौं आइपुगेका थिए। त्यतिले पनि उनी ढुक्क हुन सकेनन्। त्यसको कारण थियो, विद्युतीय माध्यम प्रयोग गरेर जथाभावी अभिव्यक्ति दिएकाले उनलाई पक्राउ गरेर साइबर अपराध गरेको कसूरमा मुद्दा चलाउने प्रहरीको तयारी।
यसको सुइँको पाएपछि उनी आफैं सुटुक्क साइबर ब्यूरो पुगेका थिए। पल शाह प्रकरणमा प्रेस काउन्सिलले अनलाइन, युट्युब च्यानललाई समेत कारबाहीको दायरामा ल्याउन भन्दै ब्यूरोलाई पत्र पठाएको थियो। त्यसले गौतमको बेचैनी बढाइदिएको थियो। आइतबार आफैं ब्यूरोमा उपस्थित भएर उनले यसबारे अनुनय गरे। ब्यूरोका एक प्रहरी अधिकृत भन्छन्, ‘गौतमले आफू अब सच्चिएको र आइन्दा यस्ता विषयमा टिप्पणी नगर्ने भन्दै एक पटकलाई माफी दिन आग्रह गरे। त्यसपछि आइन्दा यस्तो गल्ती नदोहोर्याउने सर्तमा हामीले उनलाई छाड्यौं।’
होटेलमा छापा मार्दा पनि भेटिएनन् युट्युबर
गौतम जस्तै नाबालिग बलात्कारका आरोपी शाहको पक्षमा ‘माहोल’ बनाउन कलाकार जयकिशन बस्नेतदेखि आफूलाई ‘अभियन्ता’ बताउने शर्मिला वाइबासम्मको टोली दमौली पुगेको थियो। अघिपछि युट्युबरका ‘बूम’बाट घेरिएका उनीहरुले शाहको पक्षमा माहोल बनाउन एक हप्तासम्म अनेक अभिव्यक्ति दिए। त्यति मात्र होइन, नाबालिग गायिकाको चरित्र हत्या गर्नेसम्मका अभिव्यक्ति दिन उनीहरु केन्द्रित देखिए। तिनै अभिव्यक्तिलाई ‘भाइरल’ बनाउने काम युट्युबरले गरे।
त्यही भीडमा मिसिएको थियो, अभिनेत्री पूजा शर्माको टोली। उनको उद्देश्य पनि अनुसन्धानको क्रममा रहेको मुद्दा प्रभावित पारेर बलात्कारका आरोपी शाहको पक्षमा ‘माहोल’ बनाउनु थियो। भयो पनि त्यस्तै, उनीहरुले पीडित नाबालिगको चरित्र हत्या गर्दै दिएका अन्तर्वार्ताहरु युट्युबमा बेस्सरी छाए। अनुसन्धानको क्रममा रहेको विषयमा अनावश्यक अभिव्यक्ति र नाबालिकको चरित्र हत्या जस्ता विषयले आक्रान्त बनेपछि स्वघोषित अभियन्ता र युट्युबरलाई पक्राउ गरेर कानुनी दायरामा ल्याउन प्रहरी प्रधान कार्यालयले जिल्ला प्रहरी कार्यालय तनहुँलाई निर्देशन दियो।
तनहुँ प्रहरीका एक अधिकृत भन्छन्, ‘हेडक्वार्टरको निर्देशनानुसार हामीले अराजक युट्युबर र अभियन्तालाई पक्राउ गर्न मध्यराति दमौलीका होटल–होटलमा छापा मारेका थियौं। तर, उनीहरु पक्राउ पर्ने डरले पहिल्यै भागिसकेका रहेछन्।’
काठमाडौंमा धमाधम पक्राउ, केही फरार
प्रहरी प्रधान कार्यालयले त्यसरी अराजकता प्रदर्शन गरेका एक/दुई जना युट्युबर र ‘अभियन्ता’लाई भएपनि पक्राउ गरेर कानुनी दायरामा ल्याएमा अरुले पनि पाठ सिक्ने भन्दै अपनाएको जुक्ति युट्युबरले पहिल्यै सुइँको पाएकाले उनीहरु दमौलीमा पक्राउ पर्नबाट जोगिएका थिए। तर, काठमाडौंमा भने उनीहरु जोगिएनन्। प्रेस काउन्सिलले नै प्रहरीको साइबर ब्यूरोलाई पत्र पठाएर केही अनलाइन र युट्युब च्यानललाई कानुनी दायरामा ल्याउन भनेपछि उनीहरु धमाधम पक्राउ पर्न थालेका छन्।
काउन्सिलको पत्रसँगै विभिन्न व्यक्तिले पनि जाहेरी दिएपछि उनीहरुलाई पक्राउ गरेर कानुनी दायरामा ल्याउने काम भइरहेको साइबर ब्यूरोका एसएसपी नवीन्द अर्याल बताउँछन्। दमौलीमा पक्राउ पर्नबाट जोगिए पनि केही युट्युबर र ‘अभियन्ता’ पक्राउ परिसकेका छन्। फरार रहेका केहीलाई ब्यूराको टोलीले खोजिरहेको छ।
पल शाह प्रकरणमा जथाभावी भिडियो पोस्ट गरेर चरित्र हत्या गरेको आरोपमा सामेबार मात्र साइबर ब्यूरोको टोलीले गुल्मीको भनभने–९ घर भएका राहुल थापालाई पक्राउ गरेको छ। पक्राउसँगै काठमाडौं जिल्ला अदालतबाट ५ दिनको म्याद लिएर उनीमाथि अनुसन्धान सुरु गरिएको छ।
आफूलाई ‘अभियन्ता’ दाबी गरेर यसरी टिप्पणी गरिरहेका हरि उदासी पनि ब्यूरोको नियन्त्रणमा आएका छन्। सोमबार नै अर्की एक नाबालिगको चरित्र हत्या गरेको आरोपमा ललितपुरका दीपु भनिने विकास महर्जन पक्राउ परेका छन्।
नाबालिग गायिकामाथि बलात्कार भएको भन्ने पल शाह प्रकरणबारे टिप्पणी गरेपछि नायिका रेखा थापामाथि सामाजिक सञ्जालमा आपत्तिजनक टिप्पणी भएको थियो। त्यसपछि रेखाकी दिदीले साइबर ब्यूरोमा दिएको उजुरीका आधारमा केही व्यक्तिलाई पक्राउ गर्ने तयारी गरे पनि उनीहरु पक्राउ परिसकेका छैनन्। ‘अभियन्ता’ शर्मिला वाइबाको खोजीमा जुटेको ब्यूरोले उनलाई पक्राउ गर्न सकेको भने छैन।
यसरी जथाभावी बोलेर चरित्र हत्या गरेको भन्दै ब्यूरोमा अहिलेसम्म ८८ वटा युट्युब च्यानलविरुद्ध उजुरी परिसकेको छ। तीमध्ये १७ जना पक्राउ परेका थिए। तर, उनीहरु सबैलाई काठमाडौं जिल्ला अदालतले धरौटीमा रिहा गर्न आदेश दिएको थियो।
पल शाह प्रकरणमै युट्युबमार्फत् प्रसारण भएका ‘अभियन्ता’को अभिव्यक्तिकै कारण युट्युबमै लगाम लगाउने तयारीसमेत अघि बढाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
