अर्जेन्टिना भर्सेस फ्रान्स
मिति– असार १६ गते, समय– राति ७:४५ बजे
काठमाडौं– २०१८ मा फिफा विश्वकप फुटबल प्रतियोगितामा आज रातिबाट नकआउट चरणका खेल हुँदैछन्। रसियाको कजानमा फ्रान्स र अर्जेन्टिना अन्तिम १६ को पहिलो खेलमा भिड्दैछन्।
विश्वकपको दाबेदार मानिएका टिममा सुपरस्टार खेलाडी छन्। अन्तिम १६ मै दुई टिमबीच भिड्दा उपाधि खेल रोमाञ्चक हुने अपेक्षा गर्न सकिन्छ। पाउल पोग्वा र एन्टोनी ग्रिजम्यानदेखि लिओनल मेसी र एन्जल डि मारिया मैदान एकापसमा भिड्ने भएकाले फाइनलअघिको उत्कृष्ट खेल भन्न सकिन्छ।
फ्रान्स समूह चरणमा २ जित र १ बराबरी खेल्दै विजेताको रुपमा अन्तिम १६ मा पुगेको हो। यद्यपि फ्रान्सले अहिलेसम्म आफ्नो वास्तविक खेल देखाउन सकेको छैन। त्यसो त स्टार खेलाडीको जमघट भएको फ्रान्सले समूह चरणमा ठूलो चुनौती खेप्नुपरेन। १९९८ को च्याम्पियन फ्रान्सका लागि अब कठिन समय आएको छ। डेनमार्क विरुद्धको खेलमा स्टार खेलाडीहरुलाई आराम दिइएको थियो। जसले अर्जेन्टिना विरुद्धको खेलमा फाइदा पुग्ने ठानिएको छ।
२०१४ विश्वकपको फाइनलमा पुगेको अर्जेन्टिनाले जारी विश्वकपको समूह चरणमा सोचे अनुरुप खेल्न सकेन। साबिक विजेता जर्मनी समूह चरणबाटै बाहिरिएको अवस्थामा अर्जेन्टिनाले त्यो नियति त भोग्नुपरेन। कठिन परीक्षा पार गरेर अन्तिम १६ मा स्थान बनायो।
अब अन्तिम १६ मा २ पटकको च्याम्पियन अर्जेन्टिनाका लागि सन् १९९८ को विश्वविजेतासँग भिड्नु अर्को चुनौती हुनेछ। अर्जेन्टिनाले समूह चरणको भन्दा धेरै राम्रो खेल्नुपर्ने अवस्था छ। टिममा रहेका स्टार खेलाडी मेसीका लागि सहज वातावरण बनाइदिनु अर्जेन्टाइन टिमको मुख्य जिम्मेवारी हुनेछ।
फ्रान्सविरुद्ध अर्जेन्टिनाको इतिहास राम्रो छ। यसअघि खेलेका दुवै खेलमा अर्जेन्टिना विजयी भएको थियो। दुवैपटक अर्जेन्टिनाले सेमिफाइनलमा जित निकालेको थियो।
जारी विश्वकपमा फ्रान्सको यो पहिलो वास्तविक परीक्षा हो। अपेक्षा अनुसारको खेल देखाउन फ्रेन्च टिममा दबाब छ। फ्रान्सलाई अर्जेन्टिनाका एक खेलाडीको गति रोक्न सक्नुपर्नेछ, उनी हुन् मेसी।
समूह चरणमा अर्जेन्टिना आफ्नै कारणले अप्ठ्यारोमा परेको थियो। टिमले खराब प्रदर्शन गरेको थियो। अब फ्रान्सविरुद्ध अर्जेन्टिनालाई आफूले गल्ती गर्ने छुट हुनेछैन। अर्कोतर्फ अर्जेन्टिनाले तीव्र गतिमा खेल्ने फ्रान्सका युवा तथा प्रतिभाशाली खेलाडीको रफ्तार रोक्नुपर्ने हुन्छ। फ्रान्सविरुद्ध अघिल्लो खेलकै टिम खेल्ने सम्भावना छ।
सम्भावित टिम
फ्रान्स : हुगो लोरिस, बेन्जामिन पभार्ड, राफायल भारेन, स्यामुयल उम्टिटी, लुकास हर्नान्डेज, पाउल पोग्बा, एनगोलो कान्टे, केलियन एमबाप्पे, एन्टोनी ग्रिजम्यान, उस्मान डेम्बेले, ओलिभर जिरुड
अर्जेन्टिना : फ्रान्को अर्मानी, ग्राबियल मार्काडो, निकोलास ओटामेन्डी, मार्कोस रोजो, निकोलास टाग्लियाफिको, इभर बनेगा, जाभियर मास्चिरानो, इन्जो पेरेज, एन्जेल डि मारिया, लिओनल मेसी, गोन्जालो हिग्युइन
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
