काठमाडौं- असिनपसिन थिए जाभियर मास्चिरानो। चोटैचोट भएको उनको अनुहार रक्ताम्मे देखिन्थ्यो। लाग्थ्यो, नाइजेरियामाथि जित हात पार्न उनले मैदानमा पसिनासँगै रगत नै बगाए। अनुहारको चोट अर्जेन्टिनाको जितको प्रतीक थियो। यही जितले अर्जेन्टिनाले २०१८ विश्वकप फुटबल प्रतियोगितामा अन्तिम १६ को यात्रा गर्न सफल भयो।
मास्चिरानोले फेरि एकपटक देशका लागि वीरता प्रस्तुत गर्दै आफू महान् खेलाडी भएको प्रमाणित गरे। तर मैदानमा उनले अन्य खेलाडी जस्तै केही जादू गरेका थिएनन्, मात्र उनमा प्रतिबद्धता र त्याग थियो।
उनी रक्षात्मक ढाल बनेर लामो समयदेखि अर्जेन्टाइन टिमबाट खेलिइरहे। सन् २००३ अर्जेन्टिनाको राष्ट्रिय टिममा डेब्यू गर्नुअघि उनले क्लब फुटबलमै राम्रो छवि बनाएका थिए। अर्जेन्टिनाको चर्चित क्लब रिभर प्लेटमा उनले डेब्यू गर्दा डिएगो म्याराडोना प्रशिक्षक थिए। त्यतिबेला पत्रकारले 'टिम लाइन अप' बारे म्याराडोनालाई प्रश्न गर्दा भनेका थिए, 'मास्चिरानो र अन्य १० खेलाडी टिममा हुनेछन्।'
त्यही वर्ष राष्ट्रिय टिममा डेब्यू गरेका मास्चिरानो हरेक खेलमा महत्वपूर्ण खेलाडीको रुपमा रहे। चार वर्षअघि अर्जेन्टिनाले विश्वकपको फाइनल यात्रा गर्दा मास्चिरानोले रक्षापंक्तिमा मात्र होइन मिडफिल्डमा पनि प्रभाशाली खेल पस्केका थिए।
तर अचेल भने उनी छायाँमा छन्। उनी मिडफिल्डमा जम्न छाडेका छन्। उनको टिममा उनको स्थान र प्रदर्शन खस्कँदै गइरहेको भान भएको छ।
उनले सिजन स्पेनिस क्लब बार्सिलोनासँगको ८ वर्षे व्यावसायिक करिअर अन्त्य गर्न बाध्य भए। अनि चीनतर्फ लागे।
अर्कोतर्फ राष्ट्रिय टिममा पनि उनको प्रदर्शन राम्रो हुन सकिरहेको थिएन। गत मार्चमा स्पेनले उनकै अगाडिबाट अर्जेन्टिनाको पोस्टमा ६ गोल छिरायो। मैत्रीपूर्ण खेलमा अर्जेन्टिना ६–१ ले पराजित गरेको थियो।
मास्चिरानोको गति विस्तारै घटिरहेको थियो। विश्वकपका सुरुवाती खेलमा पनि उनी शिथिल जस्तै देखिन्थे। उनी सेन्ट्रल मिडफिल्डमा एक्लिएका देखिन्थे। क्रोएसिया विरुद्धको खेलमा उनीको वरिपरि बल घुमिरहेको हुन्थ्यो। यस्तो दृश्य नाइजेरिया विरुद्धको मंगलबारको खेलमा सुरुवाती मिनेटमा देखियो।
उनको खेलप्रतिको लगावमा कहिल्यै प्रश्न उठेन र उठ्नेछैन। डिफेन्डरहरु कहिलेकाहीँ सनकी फल गर्छन्। योबाट मास्चिरानो पनि अछुतो छैनन्। 'हाम्रा अनुभवी खेलाडीहरु पनि कहिलेकाहीँ लाजमर्दो खेल्छन्। जसमा मस्चिरानो र ओटामेन्टी पर्छन्, 'अर्जेन्टिनाका पूर्वराष्ट्रिय खेलाडी ओस्भाल्डो एड्रिलेसले ट्विटरमा लेखेका थिए। खेलमा मास्चिरानोले डिबक्सभित्र गम्भीर फल गरेका थिए। उनले नाइजेरिका लिरोन बनोगनलाई लडाउँदा नाइजेरियाले पेनाल्टी पाएको थियो। जसले अर्जेन्टिनालाई संकटमा पारेको थियो। 'कसैको सपनालाई विनाश गर्नु पक्कै लाजपर्दो कुरा हो,' खेलपछि मस्चिरानोले भनेका थिए।
धन्य मार्कोस रोजोले निर्णायक गोल गर्दा अर्जेन्टिनाले खेल जित्यो र मास्चिरानो थप आलोचनाको पत्र बन्न पाएनन्।
३४ वर्षीय मस्चिरानोको परीक्षा अझै सकिएको छैन। शनिबार अन्तिम १६ मा उनलाई जिम्मा फ्रेन्च फरवार्डलाई रोक्ने कठिन जिम्मा हुनेछन्। उनको प्रतिद्वन्द्वी बर्सिलोनाका पूर्वसहकर्मी स्यामुएल उम्टिटी हुनेछन्। उनै उम्टिटीले अहिले बार्सिलोनामा मस्चिरानोको स्थान लिइरहेका छन्।
बार्सिलोनामा हुँदा मस्चिरानोले मिडफिल्डमा त्यतिसारो मौका पाउन सकेका थिएनन्। उनलाई सधैं सर्जियो बुस्केटले छायाँमा पारे। उनी बार्सिलोनाका मुख्य डिफेन्डर र कुशल नेतृत्वकर्ता भएको चाहिँ सत्य हो।
बार्सिलोनामा जस्तै अब मास्चिरानोले अर्जेन्टिनाका लागि नेतृत्व दिने बेला आएको छ। एक्लिएका कप्तान लिओनल मेसीलाई प्रशिक्षक र खेलाडीबीच जोड्नुपर्ने जिम्मा उनको काँधमा आएको छ। यस्तै अर्जेन्टाइन खेलाडी र प्रशिक्षक जोर्गे सम्पओलीबीच बिग्रिएको सम्बन्ध सुधार गर्न पनि मास्चिरानो नै माध्यम बन्न सक्छन्।
अर्जेन्टिनाको ड्रेसिङ रुपमा उनी सधैं झै महत्वपूर्ण सदस्य हुन्। तर अब उनले मिडफिल्डमा भन्दा डिफेन्डमा नै ध्यान दिनुपर्ने विश्लेषकहरुले सुझाव दिएका छन्। किनकि उनको खुट्टाको तेज कम भएको छ र पास दिने तरिका चुस्त हुन सकिरहेको छैन। त्यसैले डिफेन्स र मिडफिल्डमा खेल्न सक्ने पहिलेका महान् मास्चिरानोको खेलको दुखद् अन्त्य भएको छ।
उनी अर्जेन्टिनाको उत्कृष्ट पुस्ताका खेलाडी हुन्। त्यसैले फ्रान्सविरुद्ध उनको भूमिका महत्वपूर्ण हुनेछ। कसैगरी अर्जेन्टिना यो विश्वकपबाट बाहिरिएकै क्षण मास्चिरोनाले पनि आफ्नो बुट थन्क्याउनेबारे सोच्नुपर्नेछ।
समय बलवान छ, कसैका लागि पर्खंदैन। समयको यो नियति मास्चिरानो जस्ता लिजेन्डको हकमा पनि लागू हुन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751885868.jpg)
-1751883072.png)
-1751793737.png)
-1749826086.png)
