काठमाडौं- आईसीसी टी२० विश्वकप २०२१ को फाइनलमा अष्ट्रेलिया र न्यूजिल्यान्ड भिड्ने भएका छन्।
बिहीबार सम्पन्न खेलमा पाकिस्तानलाई ५ विकेटले हराउँदै अष्ट्रेलियाले फाइनलमा न्यूजिल्यान्डसँगको भेट पक्का गरेको हो।
पाकिस्तानले दिएको १ सय ७७ रनको लक्ष्य अष्ट्रेलियाले ६ बल अगाबै ५ विकेट गुमाएर पूरा गर्यो।
अष्ट्रेलियाको जितमा म्याथ्यु वेड र मार्कस स्टोइनिस नायक बने। दुवैले गुमिसकेको खेललाई पूनारागमन गराए।
उनीहरुले ८१ रनको साझेदारी गर्दै अष्ट्रेलियालाई जित दिलाए। वेड ४१ र स्टोइनिस ४० रनमा अविजित रहे। वेडले १७ बलमा २ चौका र ४ छक्का प्रहार गरे। स्टोइनिसले ३१ बलमा २ चौका र २ छक्का प्रहार गरे।
अष्ट्रेलियालाई अन्तिम १२ बलमा २२ रन आवश्यक थियो। १९औं ओभरमा शाहिन शाह अफ्रिदीलाई वेडले अन्तिम ३ बलमा लगातार छक्का प्रहार गर्दै खेल जिताएका थिए।
तीव्र गतिका बलर अफ्रिदीले पहिलो ओभरको तेस्रो बलमै ओपनर तथा कप्तान आरोन फिन्चलाई शून्यमा एलबीडब्लू आउट गर्दै पहिलो सफलता दिलाएका थिए।
कप्तानलाई 'गोल्डेन डक' गुमाएपनि डेभिड वार्नरले आक्रामक इनिङ्सका साथ अघि बढाएका थिए। वार्नरले सर्वाधिक ४९ रन बनाए।
मिचेल मार्शलाई २८ रनमा क्याच आउट भए। मार्शले २२ बलमा ३ चौका र १ छक्का प्रहार गरे। स्टेभन स्मिथले ५, ग्लेन म्याक्सवेलले ७ रन बनाए।
पाकिस्तानका शाहब खानले ४ तथा शाहिन साह अफ्रिदीले १ विकेट लिए।
त्यसअघि दुबई इन्टरनेशनल क्रिकेट स्टेडियममा टस हारेर ब्याटिङ थालेको पाकिस्तानले निर्धारित २० ओभरमा ४ विकेट गुमाउँदै १ सय ७६ रन बनाएको थियो।
पाकिस्तानका ओपनर मोहम्मद रिजवानले सर्वाधिक ६७ रनको योगदान दिए। रिजवानको यो टी२० करिअरको ११ औं अर्धशतक हो। योसँगै रिजवान एकै वर्षमा टी२० आई खेलमा १ हजार रन बनाउने विश्वकै पहिलो खेलाडी बनेका छन्।
फखार जमान ५५ रनमा अविजित रहे। पाकिस्तानका ओपनर बाबर आजम ३९ रनमा क्याच आउट भए। आसिफ अलि शून्य र शोएब मलिक १ रनमा आउट भए।
अष्ट्रेलियाका तीव्र गतिका बलर मिचेल स्टार्कले ४ ओभर ३८ रन खर्चेर २ विकेट लिए। प्याट कमिन्स र स्पिनर एडम जाम्पाले समान १ विकेट लिए।
अष्ट्रेलिया दोस्रो पटक टी२० विश्वकपको फाइनलमा पुगेको हो। यसअघि अष्ट्रेलिया २०१० को फाइनलमा इंग्ल्यान्डसँग ७ विकेटले पराजित भएको थियो।
अष्ट्रेलियाले उपाधिको लागि आइतबार न्यूजिल्यान्डसँग खेल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789792206.jpg)
-1786602170.png)
