काठमाडौं- आईसीसी टी२० विश्वकप २०२१ को पहिलो सेमिफाइनलमा इंग्ल्यान्डलाई हराउँदै न्यूजिल्यान्डले पहिलोपटक फाइनलमा स्थान बनाएको छ।
न्यूजिल्यान्डलाई फाइनलमा पुर्याउन ओपनर डर्याल मिचेलको प्रदर्शन तारिफयोग्य रह्यो। उनले ४७ बलमा ४ चौका र ४ छक्कासहित ७२ रनमा अविजित रहे र प्लेयरअफ द म्याच चुनिए।
बुधबार शेख जायद स्टेडियम आबुधाबीमा टस हारेर ब्याटिङ थालेको इंग्ल्यान्डले निर्धारित २० ओभरमा ४ विकेट गुमाउँदै १ सय ६६ रन बनाएको थियो। जितको लागि १ सय ६७ रनको विजयी लक्ष्य पछ्याएको न्यूजिल्यान्डले १९ ओभरमा ५ विकेट गुमाउँदै पूरा गर्यो।
२.४ ओभरमै १३ रन बनाए २ विकेट गुमाइसकेको न्यूजिल्यान्डलाई खेलमा पुनरागमन गराएका मिचेलले सुरुवातदेखि अन्तिमसम्म क्रिजमा टिक्दै टोलीको जित पक्का बनाए।
अब न्यूजिल्यान्डले आज हुने पाकिस्तान र अष्ट्रेलियाबीचको दोस्रो सेमिफाइनल खेलको विजेतासँग उपाधिका लागि खेल्ने छ। उक्त खेल जितेमा न्यूजिल्यान्डले पहिलोपटक उपाधि चुम्न पाउने छ।
तर, मिचेलले भने उपाधिभन्दा ठूलो कुरा विश्वकपमा आफ्नो देशको प्रतिनिधित्व गर्न पाउनु आफैंमा सम्मानको कुरा भएको बताएका छन्।
'विश्वकप सेमिफाइनलको कुरा छाड्नुहोस्, तपाईंले आफ्नो देशका लागि जितेको कुनैपनि खेल धरै विशेष हुन्छ,' उनले भने, 'हाम्रो देशको जनसंख्या ५० लाख मात्र छ। विश्वकपमा मेरो देशको प्रतिनिधित्व गर्न पाउनु आफैंमा ठूलो सम्मानको कुरा हो। त्यसैले हामीले हाम्रो देशको प्रतिनिधित्व गर्न पाउँदा धेरै गर्व गर्छौं। आगमी केही दिनमा फाइनल हुँदै छ। त्यसको लागि हामी धेरै उत्साहित छौं,'
न्यूजिल्यान्डले सन् २०१९ मा एकदिवसीय विश्वकप फाइनलमा इंग्ल्यान्डसँग सुपर ओभर बराबर भएपछि चौका र छक्का थोरै प्रहार गरेको कारण उपाधि गुमाएको थियो। त्यो बदला यस विश्वकपमा लिएको छ। २०१६ को सेमिफाइनलमा पनि न्यूजिल्यान्ड इंग्ल्यान्डसँग पराजित हुँदै बाहिरिएको थियो। यसपटक भने न्यूजिल्यान्ड पाएको मौकालाई सदुयोग गर्न चुकेन।
तर, आफ्नो उत्कृष्ट बलिङ, फिल्डिङ देखाए पनि न्यूजिल्यान्डलाई फाइनल पुग्न भने इंग्ल्यान्डले सहजै दिएन। न्यूजिल्यान्डलाई जितको लागि अन्तिम २४ बलमा ५७ रन चाहिएको थियो र उसलाई जितको लागि विष्फोटक ब्याटिङको आवश्यक पर्दथ्यो।
तर, जिमी निशमको बल प्रहार गर्ने तरिका एकदम विशेष थियो। त्यसैले न्यूजिल्यान्ड अन्तिम केही ओभरमा मोमेन्ट फर्कियो र इंग्ल्यान्डलाई ६ बल बाँकी छँदै हराउँदै न्यूजिल्यान्डले फाइनलमा स्थान पक्का गर्यो।
त्यो अवस्थामा खेल जिताउन सक्नेमा आत्माविश्वास रहेको मिचेलको भनाइ छ। 'विशेषगरि एकतर्फ बाउन्ड्री छोटो थियो। यो इन्चको खेल हो। हामी अलआउट पनि हुन सक्थ्यौं। यदि निश्चित संख्यामा राख्यौं भने मौका थियो। मैले खेल हाम्रो पकडबाट गुमेको कहिल्यै अनुभव गरिनँ। जिमीको खेल राम्रो थियो,' उनले भने।
न्यूजिल्यान्डले उपाधिको लागि आइतबार पाकिस्तान र अष्ट्रेलियामध्य एक टोलीसँग खेल्नेछ। दोस्रो सेमिफाइनलमा बिहीबार अष्ट्रेलिया र पाकिस्तानबीच प्रतिस्पर्धा हुँदैछ।
२००७ को फाइनलमा भारतसँग ५ रनले पराजित भएको पाकिस्तान २००९ को विश्वकप विजेता हो। २००९ को फाइनलमा श्रीलंकालाई ८ विकेटले हराउँदै उपाधि जितेको थियो।
तर, २०१० र २०१२ मा सेमिफाइनलबाट बाहिरियो। यता, अष्ट्रेलिया २०१० को फाइनलमा इंग्ल्यान्डसँग ७ विकेटले पराजित हुँदै उपविजेता बनेको थियो। २००७ र २०१२ मा भने अष्ट्रेलिया सेमिफाइनलबाट बाहिरियो। २०१० को सेमिफाइनलमा अष्ट्रेलियाले पाकिस्तानलाई ३ विकेटले हराएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
