काठमाडौं- नेपाली कांग्रेसका महामन्त्री डा शशांक कोइराला र प्रभावशाली केन्द्रीय सदस्य डा शेखर कोइराला शनिबार टोखास्थित शशांक निवासमा भेला भए। स्रोतका अनुसार उनीहरुले पार्टीभित्र पछिल्लो समय बढ्दै गएको गुटबन्दीबाट पार्टी कसरी जोगाउने भन्नेबारे लामो छलफल गरेका छन्।
कांग्रेसभित्र महामन्त्री शशांकले आफू गुटबन्दीको अन्त्य र पार्टी एकताको पक्षमा रहेको बताउँदै आएका छन्। डा शेखरले आफू कुनै गुटमा नभएको बताउँदै आए पनि सभापति शेरबहादुर देउवाको कार्यशैलीको कडा आलोचना गर्दै आएका छन्। सोही विषयलाई लिएर शशांक र शेखर फरकफरक कित्तामा रहेको खबर केही अनलाइन सञ्चारमाध्यममा आएका थिए। ती खबरहरु प्रायोजित भएको भन्दै उनीहरुले कार्यकर्ता पंक्तिमा भ्रम नहोस् भनेर बेलाबेलामा यस्तो भेटघाट गर्दै आएका छन्।
शनिबार भेटघाटपछि सँगै रहेको तस्बिर सार्वजनिक गरेर उनीहरुले आफूहरु एकताबद्ध रहेको सन्देश प्रवाह गर्न चाहेको स्रोतले बतायो। कांग्रेसको भावी सभापतिका रुपमा हेरिएका शशांक र शेखरबीच पारिवारिक भेटघाट नै भए पनि यसलाई कांग्रेसभित्र महत्वका साथ हेरिएको छ।
शेखरका स्वकीय सचिव दिनेश थपलियाले भेटघाटका क्रममा कांग्रेसभित्रको राजनीतिक अवस्था, संसदमा कांग्रेसको भूमिका, पछिल्ला दिनहरूमा सरकारका लोकतन्त्रविरोधी क्रियाकलाप लगायतका विषयमा कुराकानी भएको बताए।
अरु कोको थिए भेटमा?
शशांक निवासमा भएको छलफलमा उनीहरुसँगै निकटस्थ केही अरु नेताहरु पनि थिए।
कांग्रेस केन्द्रीय सदस्य दिलेन्द्र बडु, दीपक गिरी, गुरुराज घिमिरे, जीवन परियार र सरिता प्रसाई पनि सहभागी थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
