काठमाडौं- जनता समाजवादी पार्टी (जसपा)को उपेन्द्र यादवपक्षले महन्थ ठाकुरपक्षलाई तत्काल कारबाही नगर्ने भएको छ। निर्वाचन आयोगबाट पार्टीको आधिकारिता पाएलगतै महन्थपक्षलाई पार्टीबाट निष्काशन गर्ने भनिए पनि तत्काल कारबाही नगरिने भएको हो।
महन्थपक्षलाई तत्काल कारबाही गर्दा 'फाइदा नहुने' आकलन गर्दै उपेन्द्रपक्षले नयाँ रणनीति लिएको छ। महन्थपक्षमाथिको कारबाही तत्काललाई रोकेर उनीपक्षका कार्यकारिणी सदस्य र सांसद आफ्नो पक्षमा तान्ने रणनीति उपेन्द्रपक्षले अख्तियार गरेको छ।
जसपाको उपेन्द्रपक्षमा कार्यकारिणी सदस्य ३५ जना छन् भने महन्थपक्षमा १७ जना मात्रै खुलेका छन्। यस्तै ३२ जना सांसदमध्ये उपेन्द्रपक्षमा २१ र महन्थपक्षपक्षमा ११ जना सांसद खुलेका छन्। हरिनारायण रौनियार र रेशम चौधरी निलम्बनमा परेकाले जसपासँग कूल ३२ जना संघीय सांसद रहेका छन्।
उपेन्द्रपक्षलाई आधिकारिकता दिने निर्वाचन आयोगको फैसलाविरुद्ध महन्थपक्ष सर्वोच्च अदालतमा पुगेको छ। महन्थपक्षले हिजो (शुक्रबार) सर्वोच्च अदालतमा रिट दर्ता गरेको थियो। आयोगले उपेन्द्रपक्षलाई आधिकारिकता दिएको र महन्थलाई नयाँ दल खोलेर चलाउनसक्ने निर्णय गरेपछि त्यसविरुद्ध सर्वोच्चमा रिट दर्ता गरिएको हो। उक्त रिटमाथि सुनुवाइ हुन बाँकी छ।
जसपा र तत्कालीन राष्ट्रिय जनता पार्टी (राजपा) उपेन्द्रपक्षले 'होल्ड' गरेपछि महन्थ पक्षसामु नयाँ पार्टी खोलेर जानेबाहेक विल्कप छैन। तर, निर्वाचन आयोगको फैसला उल्ट्याउने ध्याउन्नमा महन्थपक्ष लागिपरेको छ। उपेन्द्रपक्ष भने पार्टीको आधिकारिकता पाएपछि महन्थपक्षका कार्यकारिणी सदस्य र सांसदलाई आफ्नो पक्षमा ल्याउन लागिपरेका छन्। यसका लागि अध्यक्ष यादवसहितका नेताहरु लागेका छन्।
पार्टीविहीन भएका महन्थलाई थप कमजोर बनाउन उनीनिकट कार्यकारिणी सदस्य र सांसदमा उपेन्द्रपक्षले आँखा लगाएको छ। सांसद चन्द्रकान्त चौधरी र कल्लुदेवी विकलाई आफ्नोपक्षमा पार्न छलफल चलिरहेको जसपाका एक नेताले बताए। कल्लुदेवी दानबहादुर विककी श्रीमती भएकीले दानबहादुरकै कारण उनी उपेन्द्रतिर खुल्न आनाकानी गरेको ती नेताले बताए। अन्तिम अवस्थामा उनीहरु दुवैजनालाई उपेन्द्रतिरै तान्नेगरी नेताहरु लागिपरेका छन्।
यस्तै कार्यकारिणी सदस्य राजकुमार लेखीलाई पनि आफ्नो पक्षमा तान्न उपेन्द्रपक्ष लागिपरेको छ। उनी सांसद नभए पनि कार्यकारिणी सदस्य भएकाले पार्टीमा तान्न लागिएको हो।
जसपा नेता महेन्द्र राय यादवले यसअघि नै महन्थसहित चार नेतालाई कारबाही गरिसकेकाले अन्य नेताका विषयमा सर्वोच्च अदालतको फैसलापछि निर्णय हुने बताए। महन्थसहित राजेन्द्र महतो, लक्ष्मणलाल कर्ण र सर्वेन्द्रनाथ शुक्लालाई पार्टीबाट निकाष्शन गरेकाले अन्य नेताका विषयमा केही समय पर्खिने उनको भनाइ छ। अन्य नेताका विषयमा महन्थपक्षले अदालतमा हालेको रिटको सुनुवाइपछि मात्रै निर्णय गरेर जाने तयारी गरिएको छ।
जसपाका अर्का नेता मोहम्मद इस्तियाक राईले आफ्नै पार्टीका सांसदलाई पार्टीबाट विनाकारण निष्काशन नगरिने बताए। ‘हाम्रो पार्टीमा अरुको पार्टीजस्तो मनलाग्दी निकाल्ने/हटाउने भन्ने कुरा हुँदैन। पार्टीले ह्विप लगाउँदा वा अन्य कुनै निर्णय गर्दा उल्लंघन भएमा त्यस्तो अवस्थामा कारबाही हुनसक्छ,’ राईले भने, ‘अन्यथा महन्थपक्षलाई तत्काल पार्टीबाट हटाउने वा कारबाही गर्ने प्रक्रिया अघि बढ्दैन।’
जसपामा उपेन्द्रपक्षले महन्थपक्षलाई आत्मालोचना गरे पार्टीमा भित्र्याउने बताइसकेको छ। उता महन्थपक्ष भने आत्मालोचना गरेर उपेन्द्रसँग बस्ने पक्षमा देखिँदैन। ४० प्रतिशत सांसद र कार्यकारिणी सदस्य पुर्याउन नसक्ने अवस्था देखिँदा महन्थपक्षसँग छुट्टै पार्टी दर्ता गरेर जानुको विकल्प छैन। अन्यथा उनीपक्षमा रहेका कार्यकारिणी सदस्य र सांसदहरु घट्दै जाने सम्भावना देखिन्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
.jpg)
-1763721444.png)
