काठमाडाैं–क्यालिफोर्नियाको सान फ्रान्सिस्कोमा नेपाली उबर चालक शोभाकर खड्कामाथि दुर्व्यवहार गर्ने महिला पक्राउ परेकी छन्। साथमा रहेकी अर्की महिलाले प्रहरीसमक्ष आत्मसमर्पण गर्न लागेको जनाइएको छ।
लस भेगास प्रहरीले खड्कामाथि दुर्व्यवहार गर्ने २४ वर्षकी मलेसिया किङलाई पक्राउ गरेको हो। ती महिलामाथि आक्रमण गरेको, अरुको सामान जबर्जस्ती खोसेको र स्वास्थ्य तथा सुरक्षा नियम उल्लंघन गरेको अभियोग लगाइएको छ।
दुर्व्यवहारमा संलग्न अर्की महिला २४ वर्षकी अर्ना किमाई रहेको प्रहरीले जनाएको छ। किमाईलाई पक्राउ गरिएको छैन, तर उनका वकिलले उनले प्रहरी समक्ष आत्मसमर्पणको तयारी गरेको जानकारी दिएका छन्।
खोक्ने, फोन खोस्ने, मास्क च्यात्ने र अपशब्द बोल्ने किमाई हुन् भने अर्को छेउमा रहेकी रातो पोशाक लगाउने मलेसिया किङ हुन्। उबरले नेपाली चालकमाथि भएको यो आक्रमण भयावह भएको बताउँदै दुर्व्यवहार गर्ने यात्रुको एकाउन्ट खारेज गरिदिएको थियो।
उबरले क्षतिपूर्ति वापत चालक खड्कालाई १२० डलर दिएको थियो। ती युवतीले अब लिफ्ट चढ्ने घोषणा गरेकी थिइन्। तर लगत्तै लिफ्टले पनि ती युवतीमाथि प्रतिबन्ध लगाएको थियो।
घटना लिफ्टसँग सम्बन्धित नरहेको भए पनि चालकमाथि भएको दुर्व्यवहार अस्वीकार भएको लिफ्टले जनाएको थियो। त्यसैकारण ती युवतीलाई लिफ्टमा स्थायीरुपमा नै प्रतिबन्ध लगाइएको लिफ्टले स्पष्ट पारेको थियो। ती युवतीलाई मास्क लगाउन आग्रह गर्दा उनी र उनको समूहले आइतबार नेपाली उबर चालक खड्कामाथि खोक्नुका साथै मास्क च्यात्ने, फोन खोस्ने, पिरो स्प्रे छर्कने तथा अपशब्द बोल्ने लगायतका दुर्व्यवहार गरेका थिए।
खड्काले आफूमाथि दक्षिण एसियाली आप्रवासी भएका कारण उनीहरुले निशाना बनाएको र विभेदकारी गाली गलौजसमेत गरेको स्थानीय संचारमाध्यमलाई बताएका छन्। ३२ बर्षका खड्कामाथि सिल्भर एभिन्यु र सान ब्रुनो एभिन्युमा दिउँसो पौने १ बजे दुर्व्यवहार भएको थियो ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
