काठमाडाैं- हलमा फिल्म छैन। शिव श्रेष्ठले बनाएको फिल्म ‘एउटा यस्तो प्रेम कहानी’ले दर्शक झनै भड्कायो। अहिले हल खुलेको छ तर, फिल्म नपाएका कारण शो भने बन्द छ। अझ भनौं हलहरु म्युजिक भिडियो रिलिज गरेर बसेका छन्।
हलमा खाली भएपनि फिल्म निर्माणको घोषणा भने दिनदिनै बढिरहेको छ। ठूला बजेटका फिल्महरुले यतिबेला धमाधम निर्माण घोषणा गरिरहेका छन्। जसमा दिनेश रौनियारको निर्देशनमा ‘प्रकाश’, मिलन चाम्सको निर्देशनमा ‘गोर्खा बेनिथ २’, मदन घिमिरेको निर्देशनमा ‘आँधी तुफान २’ आदि।
तर, नेपाली फिल्मको माहोल भने गरम नै छ। यसको कारण हो विवाद। केही समयअघि नायिका स्वेता खड्काको टोलीले अर्की नायिका सुस्मा कार्कीमाथि हातपात गर्यो। मुद्दा प्रहरीसम्म पुग्यो। अन्त्यमा एकअर्काले माफी मागे र घटना मत्थर भयो।
लगत्तै नायक पल शाह र चलचित्रकर्मी अरुण प्रधानको विवाद बाहिरियो। कार्यक्रममा सहभागी हुन आग्रह गर्दा पलले झर्केर मेरो सहयोगीसँग कुरा गर भनेको र यसैमा विवाद बढ्दै जाँदा आफूमाथि हातपात नै भएको अरुणको आरोप थियो। यता पलको भने अरुणले नै जथाभावी बोलेको र आफूलाई धम्क्याएको आरोप थियो। यो मुद्दा पनि अदालतमै पुग्यो र दुवैले माफी मागेर घटना अन्त्य गरे।
यता अनमोल केसको तानातान परेको विवाद आयो। धेरै अगाडिदेखि निर्माण घोषणा भएको फिल्म ‘पारस’ र लकडाउनले गर्दा पुरा फिल्म खिच्न हम्मेहम्मे परेको ‘ए मेरो हजुर ४’ फिल्ममा अनमोलको तानातान भयो।
विवाद अनमोलको कपाल र तौलमा गएर अड्कियो। फिल्ममा बिरामीको भूमिका निभाउनुपर्ने भएकाले ‘ए मेरो हजुर ४’ कपाल काट्नुपर्ने र तौल घटाउनुपर्ने देखियो। यता ‘पारस’मा भने कपाल लामो बनाउनुपर्ने र तौल पनि बढाउनुपर्ने भयो।
सरकारले अनुमति नदिँदा पनि दशैं मानेर फिल्म ‘ए मेरो हजुर ४’ बाँकी फिल्मको छायांकनमा लागिपरेको थियो। तर, लकडाउन खुलेपछि भने यो सरेको सर्यै गर्यो। फिल्मका केही गीत र महत्वपूर्ण दृश्य खिच्न बाँकी छ।
यता पारसको टोली भने ए मेरो हजुर ४ को सुटिङ सकिएपछि छायांकनमा जाने तयारीमा छ। अनमोलकै होम प्रोडक्सनबाट निर्माण गर्न लागिएको फिल्म भुवन केसीले फागुनदेखि सुरु गर्ने बताएका थिए। अब भने फिल्म वैशाखमा सरेको छ। हालै फेरि अर्का विवाद अगाडि आएको छ।
नायक तथा मोडल दिक्पाल कार्कीले नयाँ फिल्म ‘पोइ पर्यो काले’ को सिक्वेलमा आफू अनुबन्धित भएको सामाजिक सञ्जालमार्फत् बताए। उनले लेखेका थिए, 'आफ्नो जन्मदिनको अवसरमा निर्देशक शिशिर राणाले फिल्म उपहार दिए।'
तर, त्यसपछि भने निर्माताको आपत्ति सार्वजनिक भयो। फिल्म ‘पोइ पर्यो काले’का निर्माता किरण नेपालीले आफूसँग अनुमति नै नलिइ फिल्म सिक्वेल बनाउन लागेको उनको दुखेसो थियो। आफूले ‘पोइ पर्यो बुढो’ नामको फिल्म बनाउन लागेको बताउँदै उनले फिल्मको सर्वाधिकार आफूसँगै रहेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778036869.gif)
-1764146706.png)
