फुटबल

किरणको उत्कृष्ट लय, यस्तो छ आइलिगमा प्रदर्शन

सराेज तामाङ बुधबार, फागुन १९, २०७७ १०:३७

काठमाडौं– नेपाली फुटबल टिमका कप्तान किरण चेम्जोङले भारतमा जारी आइलिग फुटबलमा खेलिरहेका छन्। उत्कृष्ट लयमा देखिएका किरणले आइलिगमा राम्रो छाप छाडेका छन्। भारतमा कोरोना भाइरस संक्रमणको जोखिम अझै उतिकै छ। विभिन्न राज्यमा अझै पनि कर्फ्यू जस्तै छ। तर, कोरोनाको कारण रोकिएको खेलकुद गतिविधि विस्तारै अघि बढिरहेको छ। यतिबेला भारतमा आइलिग भइरहेको छ।

आइलिगमा नेपालबाट तीन खेलाडीले खेलिरहेका छन्। नेपाली फुटबल टिमका कप्तान किरणले पञ्जाब एफसीबाट खेलिरहेका छन् भने अभिषेकले ऐजवाल क्लब र प्रकाश बुढाथोकीले नेरोका एफसीबाट खेल्दै आएका छन्। धनकुटाको राजारानीमा जन्मिएका किरण अहिले पञ्जाब फुटबल क्लबका उपकप्तान हुन्। तर, जारी आइलिगको सिजनमा भने नियमित कप्तान विक्रमजित सिंहले भन्दा किरणले नै मैदानमा कप्तानीको भूमिका निर्वाह गर्दै आएका छन्।

सुरुवाती बेला च्यातिएको बुट पटक–पटक सिलाएर फुटबल यात्रा थालेका किरणका अनेकौं संघर्षका कथा छन्, जो हरेकका लागि प्रेरणाको स्रोत बन्न सक्छन्। चाहे त्यो गरिबीले च्यापिएको दैनिकी होस् या राष्ट्रिय टिममा पर्न गरेको संघर्ष। डेब्यु खेलमा चिउँडोको हड्डी भाँचिएर निस्किनु पर्दाको दुःखद क्षण त उनीमा अतित बनेर आउँछ।

तर, यी सबै किरणको लागि अगाडि बढ्ने मन्त्र बने। राष्ट्रिय टिममा एक नम्बर गोलकिपरको रुपमा राज गरेका उनी भारतीय भूमिमा पनि जमेका छन्। जारी लिगमा किरण टिमको सर्वाधिक लोकप्रिय र प्रभावशाली खेलाडी बनेका छन्।

६ खेलमा कप्तान, तीन पटक म्यान अफ दि म्याच
किरणको उच्च प्रदर्शन दिनदिनै बढ्दो छ। ३० वर्षीय किरणले पञ्जाबबाट ६ खेलमा कप्तानीको भूमिका निभाईसकेका छन्। त्यसो त उनी १० खेलमध्ये तीन खेलमा 'म्यान अफ दि म्याच' चुनिएका छन्। अझ उनको एकपछि अर्को राम्रो प्रदर्शन टिमको जितको आधार बनेको छ। आइलिगमा पञ्जाबले आफ्नो पहिलो खेलमा आइजोल फुटबल क्लबलाई १–० गोलले पराजित गर्यो। यो खेलमा नियमित कप्तान थिए, विक्रमजित सिंह।

त्यसपछि लिगमा पञ्जाबले आफ्नो दोस्रो खेलमा गोकुलम केरला फुटबल क्लबसँग ४–३ गोलको हार ब्यहोर्यो। यो खेलमा भने कप्तानको जिम्मेवारी पाएका थिए उपकप्तान किरणले। तेस्रो खेलमा ब्रदर्स एफसी गोवासँग १–० ले हार्दा पनि कप्तानीको भूमिकामा किरण नै थिए। चौथो खेलमा भने पञ्जाबले मोहमेदन स्पोर्टिङ क्लबसँग गोलरहित बराबरी खेल्दा नियमित कप्तान विक्रमजित मैदानमा फर्किए।

पाँचौं खेलमा पञ्जाबले सुदेभा दिल्ली एफसीसँग गोलरहित बराबरी खेल्दा किरणले उत्कृष्ट प्रदर्शन गरे। यो खेलमा किरण म्यान अफ दि म्याच घोषित भए। त्यसपछि छैटौं खेलमा तिद्धिम रोड एथ्लेटिक युनियनविरुद्ध पञ्जाबले २–० को जित निकाल्यो। किरणकै कप्तानीमा पञ्जाबले आफ्नो सातौं खेलमा इन्डियन एरोजलाई २–१ गोलअन्तरले पराजित गर्यो। किरणको कप्तानीमा टिमले जितेको यो पहिलो खेल थियो।

आठौं खेलमा चेन्नाई सिटी एफसीलाई २–० ले पराजित गर्दा कप्तानमा किरण नै थिए। यो खेलमा किरण म्यान अफ दि म्याच पनि भए। रियल कास्मिर एफसीविरुद्ध नवौं खेलमा पञ्जाबले १–१ गोलको बराबरी खैल्दै अंक बाड्यो। १० औं खेलमा पञ्जाबले नेरोका एफसीलाई १–० गोलले हरायो। यो खेलमा कप्तानको रुपमा रहेका किरण म्यान अफ दि म्याच चुनिए।

आइलिगको आधा खेल सकिएको छ। ११ टिमले १०–१० खेल खेलिसकेका छन्। आधा खेल सकिँदासम्म पञ्जाब लिगको दोस्रो स्थानमा छ। पञ्जाबले १० खेलमध्ये पाँच खेलमा जित, तीन खेलमा बराबरी र दुई खेलमा हार ब्यहोर्दै १८ अंक बनाएको छ। लिगको शीर्ष स्थानमा रहेको ब्रदर्स एफसीको १० खेलबाट २२ अंक छ।

जारी आइलिगमा किरणका केही तस्बिरहरुः