काठमाडौं- आगलागीको समस्या देखिएपछि हुन्डाईको इलेक्ट्रिक कार कोनाको ब्याट्री नै फेर्नुपर्ने भएको छ। हुन्डाईले आगोलागीको समस्या देखिएका करिब ८२ हजार कोना इलेक्ट्रिकमा प्रयोग भएका ब्याट्री फेर्नुपर्ने भन्दै रिकल गर्न लागेको रोयटर्सले लेखेको छ।
पछिल्लो केही महिनायता विश्वभर बिक्री भएका हुन्डाई कोनामध्ये १५ वटामा आगोलागी भएको थियो। त्यसमध्ये ११ वटा दक्षिण कोरियामा, २ वटा क्यानडामा र एक/एक वटा फिनल्यान्ड र अष्ट्रियामा आगोलागी भएको रोयटर्सलाई उदृत गर्दै आर्स टेक्निकाले लेखेको छ।
आगोलागीको समस्या देखिएपछि हुन्डाईले कोना इलेक्ट्रिक प्रयोगकर्तालाई कम्पनीले ब्याट्री फेर्न लाग्ने समयअघि ९० प्रतिशतभन्दा बढी चार्ज नगर्न आग्रह गरेको छ। दक्षिण कोरियाली कार उत्पादक कम्पनी हुन्डाईले उत्पादन गरेको विद्युतीय कार ’कोना’ मा आगलागी समस्या देखिएपछि उत्तर अमेरिका, युरोप, चीन र अन्य बजारबाट गत सेप्टेम्बरमा समेत रिकल गर्ने निर्णय गरेको थियो। हुन्डाईले कोनामा प्रयोग भएको ब्याट्रीका कारण आगो लाग्ने उच्च जोखिम देखिएको भन्दै फिर्ता लिने घोषणा गरेको थियो।
हुन्डाईले उत्तर अमेरिका, युरोप, चीन तथा अन्य बजारबाट करिब ५१ हजार वटा कोना रिकलको निर्णय गरेको थियो। त्यतिबेला दक्षिण कोरियाको यातायात मन्त्रालयले कोना कारमा प्रयोग भएका हाई–भोल्टेज ब्याट्रीमा आगो लाग्ने जोखिम उच्च रहेकाले कम्पनीले फिर्ता मगाएको हो।
हाईभोल्टेज खराब ब्याट्री प्रयोग भएकाले कारमा आगलागीको जोखिम बढाउने हुन्डाईले जनाएको थियो। कोना इलेक्ट्रिकमा आगलागीका १३ वटा कारण औंल्याइएको छ। हुन्डाई कोनामा एलजी चेमले बनाएको ब्याट्री प्रयोग गरिँदै आएको छ। तर, ब्याट्री उत्पादकले भने ब्याट्री सेलका कारण आगलागीको जोखिम नबढाएको दाबी गरेको छ। यसको कारण पत्ता लगाउन भविष्यमा हुन्डाईसँग अनुसन्धानमा लाग्ने एलजी चेमले जनाएको थियो।
तर, पछिल्लो पटक भने कोनामा आगलागी हुनुमा कोरियाली यातायात मन्त्रालयले ब्याट्री उत्पादक एलजी चेमलाई आरोप लगाएको छ भने एलजी चेमले हुन्डाईलाई आरोप लगाएको छ।
हुन्डाईले २०१८ देखि २०२० सम्ममा बनेका कोना तथा केही आयोनिकसमेत गरि ७६ हजार भन्दा बढी इलेक्ट्रिक कारमा समस्या देखिएको जनाएको छ। ब्याट्रीमा आगलागीको समस्या देखिएका सबै कारमा ब्याट्री नै फेर्नुपर्ने अवस्था आएको हो। जुन हुन्डाईका लागि निक्कै महंगो हुनेछ। यसरी ब्याट्री फेर्दा हुन्डाईलाई ९० करोड अमेरिकी डलर (१० खर्ब ओन) खर्च हुने छ।
विगतमा कोना इलेक्ट्रिकमा आगलागीको समस्या देखिएपछि हुन्डाई मोटर्स र एलजी चेलको सेयरमा उल्लेख्य गिरावट आएको थियो। हुन्डाईका कोना इलेक्ट्रिक कार नेपाली बजारमा समेत बिक्री हुँदै आएको छ। नेपाली बजारमा हुन्डाईका कार लक्ष्मी इन्टरकन्टिनेन्टलले बिक्री गर्दै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1790399464.jpeg)
-1790307658.jpeg)
-1786602170.png)
