नयाँदिल्ली- फिल्म क्षेत्रका सदस्यमाथि मिडिया ट्रायल गरेको आरोपमा मुद्दा परेपछि दिल्ली हाइकोर्टले टाइम्स नाउ र रिपब्लिक टिभीसँग लिखित जवाफ माग गरेको छ। बलिउड फिल्म निर्माता र अभिनेताहरूले दायर गरेको निवेदनमाथि सुनुवाइ गर्दै सोमबार दिल्ली हाइकोर्टले रिपब्लिक टिभी र टाइम्स नाउसँग लिखित जवाफ पेस गर्न आदेश गरेको हो।
अभिनेताहरू शाहरुख खान, अमिर खान, सलमान खान र करण जोहरलगायतले यी दुई टिभीले मिडिया ट्रायल गरेको भन्दै हाइकोर्टमा रिट निवेदन दायर गरेका थिए। उनीहरुले बलिउडका कलाकारमाथि अपमानजनक र साम्प्रदायिक टिप्पणी गरेको आरोप लगाउँदै अदालत पुगेका थिए। रिपब्लिक र टाइम्स नाउ टिभीले मीडिया ट्रायल गरेकोले यो कार्य आगामी दिनमा रोक्न र यस्तो गर्नेलाई कारबाही गर्न उनीहरुको निवेदनमा माग गरिएको थियो।
न्यायाधीश राजीव शकधरको इजलासले मिडिया कम्पनीहरुलाई कसैको पनि मानहानी हुने सामग्री प्रकाशन र प्रशारण गर्ने छुट नभएकाले मिडिया ट्रायलका विषयमा लिखित जवाफ दिन र आगामी दिनमा त्यस्तो कार्य नगर्ने सुनिश्चितताबारे जवाफ दिन भनेको छ। यस्ता सामग्री सामाजिक सञ्जालमा अपलोड नहुने कुराको ग्यारेन्टी गर्नसमेत अदालतले भनेको छ।
४ बलिउड संगठन र ३४ प्रमुख निर्मातासमेतले दिएको रिटमा यी २ टिभी च्यानलहरुले व्यक्तिगत जीवनमा दख्खल पर्ने र अपमान गर्ने कार्य गरेको दाबी गर्दै निवेदन दिएका थिए। अनिल कपुर, विशाल भारद्वाज, अजय देवगण, विनोद चोपडा र यशराज फिल्मलगायत पनि रिट दिनेमा सहभागी छन्।
रिटमा रिपब्लिक टिभी, अर्णव गोस्वामी, प्रदीपक भण्डारी, टाइम्स नाउ, टाइम्स नाउका सम्पादक राहुत शिवशंकर र टाइम्स नाउ ग्रुप सम्पादक नविका कुमारलगायतलाई विपक्षी बनाइएको छ।
उक्त मुद्दाको अर्को सुनुवाई १४ डिसेम्बरमा हुनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
