उपप्राध्यापक चलाउनेमाथि कुटपिट गरेको आरोपमा झापाबाट पक्राउ परेका सोयुज श्रेष्ठ।
काठमाडौं- त्रिभुवन विश्वविद्यालय, समाजशास्त्र केन्द्रीय विभागका उपप्राध्यापक प्रेम चलाउनेमाथि कुटपिट गरेको आरोपमा थप एक जना पक्राउ परेका छन्। बुधबार झापाबाट थप एक जनालाई पक्राउ गरिएको महानगरीय प्रहरी परिसर काठमाडौंका एसएसपी श्यामलाल ज्ञवालीले जानकारी दिए।
झापाबाट पक्राउ पर्नेमा सोयुज श्रेष्ठ छन्। उनीबारे प्रहरीले अध्ययन गरिरहेको उनले बताए। योसँगै उपप्राध्यापक चलाउनेमाथि कुटपिटको आरोपमा ४ जना पक्राउ परेका छन्।
सोही अभियोगमा यसअघि मंगलबार मात्र बुटवलबाट निरज रानामगर पक्राउ परेका थिए।
काठमाडौं परिसरले नै सूर्यविनायक र सिरहाबाट एक-एक जना गरी दुई जनालाई पक्राउ गरिसकेको थियो। सिरहाबाट रविन लामा पक्राउ परेका थिए भने सूर्यविनायकबाट रुपेश साह।
पक्राउ परेकाहरु विरुद्ध प्रहरीले ज्यान मार्ने उद्योगको कसुरमा म्याद थप गरेर अनुसन्धान गरिरहेको छ। पक्राउ परेका लामा र साह नेपाली कांग्रेसको विद्यार्थी संगठन नेविसंघका कार्यकर्ता भएको खुल्न आएको प्रहरीले बताएको छ।
त्रिविमा अध्यापनरत चलाउनेमाथि यही असोज २० गते कुटपिट भएको थियो। कुटपिटबाट गम्भीर घाइते चलाउनेको ललितपुरस्थित मेडिसिटी अस्पतालमा उपचार भइरहेको छ। उनको टाउको, खुट्टा र शरीरका विभिन्न भागमा चोट लागेको छ।
त्रिवि परिसरमै रहेको नेपाल बैंक लिमिटेडको शाखा कार्यालयबाट विभागतर्फ गइरहेका उपप्राध्यापक चलाउनेमाथि आक्रमण भएको थियो। त्यसबेला दुई वटा मोटरसाइकलमा आएका व्यक्तिहरुले उनीमाथि रडले आक्रमण गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
1695028531.jpg)
-1786602170.png)
