फोटो- रासस
काठमाडौं– प्रधानमन्त्री केपी शर्मा ओलीले विश्वासपात्र ठानिने ईश्वर पोखरेलको रक्षा मन्त्रालय खोसेपछि सत्तारुढ दल नेकपाका कतिपय नेताहरु अचम्ममा परे। असोज २८ मा भएको मन्त्रिपरिषद पुनर्गठनमा रक्षाबाट हटाएर पोखरेललाई प्रधानमन्त्री तथा मन्त्रिपरिषद कार्यालय अन्तर्गत ल्याइएको थियो।
‘ईश्वर कमरेड यसमा खुसी हुनुहुन्न तर उहाँले प्रधानमन्त्री ओलीबाट एउटा आश्वासन पाउनुभएकोछ, त्यो हो अब पार्टीको महासचिव’, नेता पोखरेल निकट एक नेताले भने, ‘त्यसैले ईश्वर कमरेड महासचिव पदका लागि अब पर्ख र हेरको अवस्थामा हुनुहन्छ।’
पछिल्लो सरकारमा मात्र होइन अघिल्लो पटक मन्त्री हुँदा समेत अनेक विवादमा पर्दै आएका ईश्वर पोखरेललाई प्रधानमन्त्री केपी ओलीले पार्टीको महासचिव बनाउने आवश्वासन किन र कसरी दिए त? ‘यसलाई एउटा परिस्थितिजन्य आश्वासन भनेर बुझ्नुहोस्’, प्रधानमन्त्री ओली निकट एक नेताका शब्द छ, ‘दलभित्रको शक्ति सन्तुलन मिलाउन र ईश्वर पोखरेल सबैको तारो बनेकाले ओलीले यस्तो निर्णय गर्नुभएको हो।’
प्रधामन्त्री ओलीले नेता पोखरेललाई महासचिवको आश्वासन दिएको कुरा भने उनले स्विकारे।
त्यसो त, ईश्वरमाथि भएको राजनीतिक ‘प्रहार’लाई उनका निकटस्थहरुले बढुवाका रुपमा प्रचार गर्ने प्रयत्न गरेको पनि देखियो, सुनियो। उनले समग्र मन्त्रिपरिषद्को संयोजन गर्ने र छाया प्रधानमन्त्रीका रुपमा आफ्नो जिम्मेवारी निर्वाह गर्ने भन्नेसम्मका तर्कहरु सतहमा ल्याइयो। तर स्थानान्तरणको गुह्य ईश्वर–भक्तहरुले भने जस्तो नभएको नेकपा नेताहरुले बताउन थालेका छन्।
‘यी सबै भन्ने कुराहरु हुन्, दिनप्रतिदिन अलोकप्रिय बन्दै गएका र सरकारमा बसेर पनि राम्रो डेलिभरी दिन नसकेका ईश्वरलाई प्रधानमन्त्री ओलीले सहजै दलभित्र स्पेस दिने कुरा अपेक्षा गर्न सकिँदैन’, ती नेताले भने, ‘अर्थमन्त्रीमा महासचिवका हैसियतमा रहेका विष्णु पौडेललाई ल्याइएपछि पार्टीभित्र महासचिव फेर्ने कुरा बहसको विषयचाहिँ हुनसक्छ तर ईश्वरकै लागि यो सबै भइरहेको छ भन्ने अवस्था भने छैन।’
झण्डै दुई तिहाइको सरकार निमार्णको प्रारम्भमै नेता पोखरेल ओली सरकारको अर्थमन्त्रीसहित उपप्रधानमन्त्री हुन चाहन्थे। त्यसका लागि उनी पार्टीभित्र ‘लविङ’ पनि गरेका थिए। तर, उनलाई अपेक्षाविपरित रक्षा मन्त्रालय दिइएको थियो। सुरुवातमा उनी सरकारको उपप्रम पनि थिएनन्। पछि तत्कालीन संघीय समाजवादी फोरमका अध्यक्ष उपेन्द्र यादवलाई उपप्रधानमन्त्री बनाउनैपर्ने भएपछि पार्टीको इज्जतको खातिर पोखरेल पनि उपप्रधानमन्त्री बनाइएको थियो।
पछिल्लो छिमलको मन्त्रिपरिषद पुनर्गठनको तयारी भइरहँदा मन्त्री पोखरेलले फेरि एकपटक प्रधानमन्त्री केपी ओलीसँग अर्थ मन्त्रालयको याचना गरेका थिए। उनको यो कुरा प्रधानमन्त्री तथा अध्यक्ष ओलीले अर्का अध्यक्ष पुष्पकमल दाहाल ‘प्रचण्ड’लाई पनि सुनाए तर प्रचण्डले कुनै पनि कोणबाट ईश्वरलाई अर्थ दिने कुरामा सहमति जनाएनन्। दुवै अध्यक्षले पत्याउने नाम विष्णु पौडेलमा छलफल भएपछि नयाँ अर्थमन्त्रीका रुपमा दलको महासचिवको हैसियतमा रहेका पौडेललाई सो जिम्मेवारी दिइयो।
उता, सतहमा नदेखिए पनि नेपाली सेनाको नेतृत्व र रक्षामन्त्री पोखरेलबीच पछिल्ला दिनमा सम्बन्ध पानी बाराबारको बिन्दूमा पुगेको थियो। सेनाले पटक–पटक प्रधानमन्त्री ओलीसँग सेनाका कतिपय परियोजना र कामकारबाहीमा मन्त्री पोखरेलले बाधा व्यवधान खडा गरेको गुनासो गरिरहेकै थियो। सेनाले त मन्त्रीले द्रव्यमोह देखाएको आरोप समेत लगाएको स्रोतहरुको दाबी छ। सेनाको नेतृत्वले मुखै खोलेर रक्षामन्त्री परिवर्तनको माग गरेको थियो।
यता, कोभिड–१९ नियन्त्रण तथा रोकथामका सिलसिलामा मन्त्री ईश्वर पोखरेलले तालुकदार स्वास्थ्य मन्त्रालयलाई पनि व्यवधान खडा गरेको गुनासो थियो। कोरोनासँगको लडाइँमा सरकार असफल हुनुमा पनि उच्चस्तरीय समितिको जिम्मेवारी लिएका पोखरेलको हात रहेको तथ्य प्रष्ट भइसकेको छ।
‘प्रधानमन्त्री ओलीले ईश्वरलाई मनाउने सूत्रका रुपमा महासचिव पदको कुरा उठाउनुभएको हो’, ओली निकट ती नेताले भने, ‘महासचिव पदका लागि पोखरेलका नाममा शीर्ष नेताहरुबीच सहमति भइहाल्छ भन्ने होइन। महासचिव पदका लागि अरु नामहरुमा पनि छलफल होला।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1792292945.webp)
-1786602170.png)
