काठमाडौं- त्रिभूवन विश्वविद्यालय इन्जिनियरिङ अध्ययन संस्थानअन्तर्गत पुल्चोक क्याम्पसका विद्यार्थीहरूको संस्था हल्ट प्राइजमा पाकिस्तानी अभिनेता अली जफरले अनुभव साट्ने भएका छन्। हल्ट प्राइजले शनिबार २ बजेदेखि भर्चुअल रूपमा गर्न लागेको इन्टरप्रेनियरसिप टक सिरिजमा जफरले अनुभव साट्ने भएका हुन्।
कार्यक्रममा जफरले आफ्ना सफलताका कथा साट्नेछन्। उनले आफ्नो मेहनत र आफ्नो सफलतमा टिमको महत्वबारे अनुभव साट्ने बताइएको छ। युवाहरूका लागि प्रेरणादायी हुने गरी परोपकारबारे पनि उनले धारणा राख्नेछन्।
नेपाली विद्यार्थीहरूसँग अन्तर्क्रिया गर्ने भएपछि नेपालमा रहेका जफरका फ्यान उत्साहित भएको आफूले पाएको हल्ट प्राइज पुल्चोककी अनिशा अधिकारीले बताइन्। सन् २०१३ मा बेलायती पत्रिका इस्टर्न आईले गरेको सर्वेक्षणले जफरलाई 'सेक्सिएस्ट एसियन म्यान अन द प्लानेट'का रूपमा चित्रित गरेको थियो।
जफरका साथै अमेरिकामा व्यवसाय गर्दै आएका सतीश गैरेले पनि कार्यक्रममा आफ्ना अनुभव साट्ने हल्ट प्राइजले जनाएको छ।
कार्यक्रमलाई पुल्चोक क्याम्पसकै गैरनाफामूलक संस्था नेक्स्टजेनले सहयोग गरेको छ। नेक्स्टजेनले बहुराष्ट्रिय प्रविधि कम्पनी एप्पलका सहसंस्थापक स्टिभ वोज्नियाइलाई अतिथिका रूपमा आमन्त्रण गरी कार्यक्रम गरिसकेको छ।
कार्यक्रममा सहभागी हुनका लागि निर्धारित फारम भर्नुपर्ने आयोजकले जनाएको छ। रजिस्टर गरेकाहरूलाई कार्यक्रममा सहभागी हुनका लागि जुम लिंक पठाइने जानकारी दिइएको छ। फारम यो लिंकमा उपलब्ध छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
