अभियुक्त अजयकुमार राय र उनले ठगीका लागि सञ्चालन गरेका नक्कली ‘लोकसेवा’ परीक्षाका प्रश्नपत्र र प्रवेशपत्र।
काठमाडौं– बारा, जितपुर सिमराका २९ वर्षीय अजयकुमार राय ठगीको आरोपमा यतिबेला जिल्ला प्रहरी कार्यालय पर्साको हिरासतमा छन्। रायका कर्तुत–वृत्तान्त सुनेर प्रहरी आफैं छक्क छ। यतिसम्म कि, ठग्नकै लागि उनले लोकसेवा परीक्षा नै सञ्चालन गरेका रहेछन्। अनौठो ठगी शैलीको यो कथा अहिले पर्सा प्रहरीमा मात्र होइन सबैतिर ‘किस्सा’ बनेर फैलिँदो छ।
भएछ के भने, बुधबार दिउँसो १२ बजेतिर जिल्ला प्रहरी कार्यालय पर्सामा एउटा सूचना आएछ। सूचना थियो, वीरगञ्ज–१६ को देव पार्टी प्यालेसमा राष्ट्रिय अनुसन्धान विभागको इन्सपेक्टर, असई, सूचक र खरिदारको परीक्षा भइरहेको छ।
प्राप्त सूचनामा प्रहरीले शंका गर्यो। ‘लोकसेवाको परीक्षा भएको भए सुरक्षा व्यवस्थाका लागि प्रहरीलाई पहिला नै जानकारी आउने थियो। तर हामीलाई नै जानकारीबिनै परीक्षा सञ्चालन भएको छ भन्ने खबर आएपछि पक्कै केही गडबड होला भन्ने लागेको थियो’, पर्साका एसपी गंगा पन्तले नेपाल लाइभसँग भनिन्। सूचनासँगै शंका लिएर प्रहरीको सादा पोशाकको टोली देव पार्टी प्यालेसमा पुग्यो। प्रहरीलाई नै जानकारी नदिई परीक्षा सञ्चालन भएको सूचना पाएको प्रहरी त्यसबेला छक्क परे जति बेला उक्त परीक्षाको सम्पूर्ण अगुवाई प्रहरी इन्सपेक्टरले गरिरहेका थिए।
नक्कली परीक्षामा प्रयोग गरिएको प्रवेशपत्र
हट्टाकट्टा ज्यान भएका एक युवक प्रहरीको बर्दीमा थिए। उनको काँधमा खुकुरी र डण्डा क्रस देखेपछि फिल्डमा खटिएका प्रहरीले यसबोर एसपी पन्तलाई जानकारी गराए। फिल्डमा खटिएको प्रहरी टोलीलाई पन्तले जानकारी गराइन्, ‘त्यहाँ हाम्रो कोही पनि प्रहरी खटिएको छैन। ती व्यक्ति नक्कली इन्सपेक्टर हुन सक्छन् तुरुन्त नियन्त्रणमा लिनू।’
प्रहरीको नियन्त्रणमा परेका ती बर्दीधारी इन्सपेक्टर थिए, उनै अजयकुमार राय। राय पक्राउ परेपछि ठगी धन्दाको कहानी सतहमा आएको छ।
नक्कली परीक्षामा प्रयोग गरिएको प्रश्नपत्र
उनले ठगी गर्नकै लागि विभिन्न व्यक्तिलाई राष्ट्रिय अनुसन्धानको इन्सपेक्टर, असई, सूचक, खरिदारसम्म बनाउने भन्दै ठगी गरेको पाइएको छ। जसका लागि उनले पार्टी प्यालेस नै भाडामा लिएर लोकसेवा आयोगले लिने जसरी नै परीक्षासमेत सञ्चालन गरेका थिए। यसरी परीक्षा सञ्चालन गरिरहेका बेला उनी पक्राउ परेका हुन्।
प्रहरी टोली घटनास्थल पुगेर सोधपुछ गर्दा बारा, पर्सा र सर्लाहीका २१ जनाले इन्सपेक्टर, असई, सूचक र खरिदारको भन्दै परीक्षा दिइरहेका थिए। यसका लागि रायले ९ महिनादेखि तयारी गरेको अनुसन्धानबाट खुलेको छ। परीक्षार्थीहरुलाई विश्वासमा दिलाउनका लागि ९ महिना अघिदेखि उनी बेला बेलामा प्रहरी चौकी परवानीपुर, इलाका प्रहरी कार्यालय नगवामा समेत गएर आफू इन्सपेक्टर भएको बताउथे। उक्त चौकीका प्रहरीले रायलाई स्यालुट हान्थे।
नक्कली परीक्षामा प्रयोग गरिएको प्रवेशपत्र
यसरी उनले प्रहरी समेतलाई आफू इन्सपेक्टर भएको भन्दै झुक्याएका थिए। प्रहरी कार्यालयमा भएका फोटाहरु समेत खिचेर वेरोजगार युवाहरुलाई देखाउदै आफू इन्सपेक्टर भएको र जागिर लगाइदिने भन्दै प्रभावमा पारेका थिए। रायले विभिन्न व्यक्तिलाई जागिर लगाइदिने भन्दै उनीहरुबाट रकम असुलेका रहेछन्। रायले १३ जनालाई जागिर लगाई दिने र त्यसका लागि परीक्षामा सामेल हुन, प्रवेशपत्र बनाउन समेत रकम लाग्ने भनेर विभिन्न १३ जना व्यक्तिबाट १ हजार रुपैयाँदेखि २६ हजार रुपैयाँ गरी ३ लाख ६१ हजार ठगी गरेको पाइएको छ।
बाँकी रकम भने परीक्षामा उत्तिर्ण भएपछि लिने सहमति भएको पाइएको छ। यदी अहिले राय पक्राउ नपरेको भए केही महिनापछि आफैंले परीक्षाको नतिजा निकाल्ने र पास गराएर रकम असुल्ने योजना रहेको अनुसन्धानले देखाएको छ। यसका लागि उनले ६ लाख रुपैयाँसम्म डिल गरेको पाइएको छ। इन्सपेक्टरका लागि ६ लाख लाग्ने उनले बताएका थिए। पर्साको पकाहामैनपुर गाउँपालिका–४ का १९ वर्षीय राकेश चौरसियासँग भने परीक्षामा उत्तिर्ण भए वापत १ लाख ५० हजार दिने सहमति भएको थियो।
प्रहरीले रायको साथबाट असईको नक्कली प्रवेशपत्र २ थान, इन्सपेक्टरको नक्कली प्रवेशपत्र २१ थान, इन्सेक्टरको प्रश्नपत्र २६ थान, खरिदारको प्रवेश पत्र १ थान, बरामद गरेको छ। यी प्रवेशपत्र र प्रश्नपत्र कहाँ छापिए भन्नेबारे प्रहरीले अहिलेसम्म भेउ पाउन सकेको छैन। पर्साका एसपी पन्तले नेपाल लाइभसँभ भनिन्, ‘यस विषयमा हामी अनुसन्धानकै क्रमा छौं । अहिलेसम्म केही खुलिसकेको छैन।’
उक्त परीक्षा हलबाट रायको निर्देशनमा काम गर्ने बारा, जितपुर उपमहानगरपालिका–५ का ५७ वर्षीय हिरालाल महतो, सोही ठाउँका २८ वर्षीय बसन्त चौधरी, पर्साका वीरगञ्ज महानगरपालिका–१६ का २१ वर्षीय रविकुमार चौरसिया, पर्साकै पकाशामैनपुर गाउँपालिका–५ सबैठवाका ४७ वर्षीय शिवनारायण चौरसिया र वीरगञ्ज –२७ रानिघाटका २५ वर्षीय रामजी चौरसियालाई पनि प्रहरीले पक्राउ गरेको छ।
राय नेपाल प्रहरीको इन्सपेक्टरको बर्दीसहित पक्राउ परेका हुन्। अझ उनी प्रहरीलाई समेत विश्वासमा पार्न प्रहरी कार्यालय नै गएर आफू इन्सपेक्टर भएको परिचय दिएकोसम्मको सूचना प्रहरीले हात पारेको छ। बर्दीसहित पक्राउ परेका रायले प्रहरीको बर्दी कहाँबाट ल्याए? यो प्रश्न निकै पेचिलो बनेको छ । एसपी पन्त भन्छिन्, ‘नेपाल प्रहरी लगाउने सक्कली बर्दी नै हो त्यो। तर यो कहाँबाट उनले ल्याए भन्नेबारे अहिलेसम्म केही बाएका छैनन् । यसबारे पनि छानबिन हुन्छ।’
पक्राउ परेका नक्कली इन्सपेक्टर राय पहिला पनि जेल बसेर छुटेका व्यक्ति भएको पाइएको छ। २०७२ सालमा जिल्ला प्रहरी कार्यालय बाराले उनीविरुद्ध सरकारी कागजात कीर्तेमा मुद्दा चलाएको थियो। त्यसबेला उनी ११० दिन कैद बसेर छुटेको पाइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
