एजेन्सी–अमेरिकी राष्ट्रपतीय निर्वाचनका दुई उम्मेदवार डोनाल्ड ट्रम्प र जो बाइडेनबीच पहिलो बहस निकै अशिष्ट र अराजक भएको छ। बहसमा उनीहरु व्यक्तिगत आरोप–प्रत्यारोपा पनि उत्रिए।
ट्रम्पले बाइडेनको बुद्धिमतामाथि प्रश्न उठाए भने बाइडेनले ट्रम्पलाई ‘जोकर’ भने । बाइडेनले अमर्यादित तरिकाले ट्रम्पलाई ‘तिमी चुप लाग’ समेत भने। ट्रम्पले बीचबीचमा बोल्दै अशिष्ट शैलीमा बाइडेनमाथि आक्रमण गरिरहे। बहस ओहायोको क्लीभल्याण्डमा भएको थियो।
कैयन पटक दुवै जना एकैपटक बोलिरहे, जसका कारण कार्यक्रम अव्यवस्थित र भद्रगोल देखियो। सञ्चालक क्रिस वालेसलाई दुवै जनालाई पालैपालो बोल्न लगाउन हम्मे-हम्मेसमेत परेको थियो।
कोरोनाको महामारीबाट २ लाख नागरिकको ज्यान गएको प्रसंगमा ट्रम्पले आफ्नो ठाउँमा बाइडेन भएको भए अवस्था अझ खराब हुने दावी गरे। बहसमा ६ वटा शीर्षकमा छलफल भएको थियो भने हरेक शीर्षकका लागि १५ मिनेट छुट्याइएको थियो।
बहसकै क्रममा ट्रम्पले आफूले मास्क बोकेर हिडेको भन्दै खल्तीबाट मास्क निकालेर देखाए। उनले आवश्यक परेका बेलामा मास्क लगाउने तर जतिबेला पनि बाइडेनले जस्तो मास्क लगाएर नहिँड्ने बताए। उनले अनावश्यक रुपमा मास्क लगाएर हिड्ने डरपोक बाइडेन भनि आरोप लगाए।
सन् २०१६ र २०१७ मा कति कर तिरेको भन्ने सन्दर्भमा सञ्चालकले प्रश्न गर्दा ट्रम्पले आफूले लाखौं डलर तिरेको बताए। तर कति तिरेको भन्ने बताउन भने चाहेनन्।
ट्रम्पले आफूले ४७ महिनामा धेरै काम गरेको बताउँदै भने–‘तिमीहरुले ४७ वर्षमा गरेको भन्दा धेरै मैले ४७ महिनामा गरेको छु ।’
तर बाइडेनले ट्रम्पका कारण अमेरिका कमजोर भएको आरोप लगाए। ‘यी राष्ट्रपतिका कारण हामी कमजोर, बिरामी, गरिब र विभाजित भएका छौं,’ बाइडेनले भने। कोरोना रोकथामका लागि ट्रम्पसँग कुनै पनि योजना नभएका कारण अहिलेको अवस्था आएको उनले आरोप लगाए। बहसको अन्त्यमा उनीहरुले हात पनि मिलाएनन्। बहसका क्रममा कैयौं पटक सञ्चालकले बचाउमा उत्रनु परेको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
