फिचर

बलात्कारीलाई सजायको माग गर्दै माइतीघरमा प्रदर्शन [फोटो फिचर]

निमेष जंग राई सोमबार, असोज १२, २०७७ १४:२५

काठमाडौं- बलात्कारीलाई सजायको माग गर्दै युवाहरूले माइतीघरमा प्रदर्शन गरेका छन्। सोमबार दिउँसो काठमाडौंको माइतीघरमा भेला भएर युवाहरूले प्रदर्शन गरेका हुन्।

'बलात्कारीलाई फाँसी दे', 'बलात्कारीलाई पक्राउ गर', 'महिला हिंसा अन्त्य गर' 'बालिका बचाऔं' लगायतका प्लेकार्ड बोकेका उनीहरूले नाराबाजी गरेका हुन्।

प्रदर्शनमा सहभागी भएका केही युवाहरूले भने शरीरका माथिल्लो भागमा समेत यी नारा लेखाएका थिए।

बझाङको मस्टा गाउँपालिका–२ खिकालाकी १२ वर्षीया बालिका सम्झना विकको गत बुधबार बलात्कारपछि हत्या भएपछि त्यसको विरोधमा युवाहरूले प्रदर्शन गरेका हुन्। उनीहरू दुई वर्षअघि बलात्कारपछि हत्या गरिएकी निर्मला पन्तका हत्यारालाई समेत पक्राउ गरी कारबाही गर्न माग गरेका थिए।

सम्झनाको हत्या आरोपमा बझाङकै राजेन्द्र बोहरालाई प्रहरीले पक्राउ गरेको छ। १२ वर्षीया बालिकाको हत्यामा संलग्नलाई तत्काल कारबाही गर्न विभिन्न सरोकारवाला निकायले विरोध गर्दै आएका छन्।