काठमाडौं- रौतहटको गरुडा नगरपालिका- ८ का १७ वर्षीय युवक विजय रामको हिरासतमा मृत्युको घटनामा रौतहटका तत्कालीन एसपीसहितका प्रहरी कर्मचारीलाई कारबाही गर्न गृहमन्त्रालयले निर्देशन दिएको छ।
मन्त्रालयले प्रहरी प्रधान कार्यालयलाई पत्र पठाउँदै कारबाही गर्न निर्देशन दिएको मन्त्रालयका प्रवक्ता चक्रबहादुर बुढाले नेपाल लाइभलाई जानकारी दिए।
इलाका प्रहरी कार्यालय चन्द्रनिगाहापुरका प्रमुख उपसचिव दोरेन्द्र निरौला संयोजक रहेको समितिको प्रतिवेदन अनुसार कारबाही गर्न हेडक्वाटरलाई निर्देशन दिइएको बुढाले बताए।
‘रौतहटका तत्कालीन एसपी रविराज खड्का र इलाका प्रहरी कार्यालय चन्द्रनिगाहापुरका डिएसपी ज्ञानकुुमार महतोले आफ्नो जिम्मेवारी राम्रोसँग बहन गर्न नसकेको भन्दै उनीहरुलाई प्रहरी नियमावली अनुसार कारबाही गर्न निर्देशन दिइएको छ’ बुढाले नेपाल लाइभसँग भने।
यी दुवैलाई यसअघि नै जिम्मेवारीबाट हटाइएको थियो। त्यस्तै घटनामा प्रत्यक्ष संलग्न रहेको आरोपमा लागेका प्रहरी कार्यालय रौतहटका प्रहरी निरीक्षक (इन्सपेक्टर) नवीनकुमार सिंह र हवल्दारद्वय फिरोजमिया धुनिया र मन्नुकुमार सिंहलाई यसअघि नै निलम्बन गरिएको छ।
त्यसैगरी रुपक कुशहवा र अजय यादवलाई पनि विभागीय कारबाहीका लागि सिफारिस गरिएको छ।
२० वर्षीय निरन्जन रामको साउन ३१ गते राति घाँटी रेटेर हत्या भएको घटनामा साउन ३२ गते विजयलाई इलाका प्रहरी गरुडाले पक्राउ गरेको थियो।
पक्राउ परेका विजयको प्रहरीले दिएको यातनाबाट मृत्यु भएको भन्दै आफन्तले यातना दिने प्रहरीलाई कारबाही गर्नुपर्ने माग राख्दै आएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787821306.jpg)
-1786602170.png)
-1786513116.png)
