नयाँ दिल्ली- सुशान्त सिंहकी पूर्वप्रेमिका रिया चक्रवर्तीलाई लागू औषध प्रयोगमा अनुसन्धानका लागि ६ अक्टुबरसम्म थुनामा राख्ने अनुमति प्राप्त भएको छ। अदालतले थप केही दिन थुनामा राख्ने अनुमति दिएको हो। अदालतले उनका भाइ शोविक चक्रवर्तीलाई पनि थुनामा न्यायीक हिरासतमा राख्ने अवधि बढाएको छ।
रियालाई लागू औषधमा अनुसन्धान गर्न एनसिबीले ८ सेप्टेम्बरमा पक्राउ गरेको थियो। पक्राउ परेपछि उनले मुम्बई हाइकोर्टमा जमानतमा छुट्नुपर्ने दाबी गर्दै निवेदन दिएकी थिइन्। तर अदालतले उनको निवेदन खारेज गरिदिएको थियो। रिया र उनको भाइलाई नारकोटिक्स कन्ट्रोल ब्युरोले सुशान्त सिंहको मृत्यु र ड्रक्स कनेक्सनमा अध्ययनका लागि नियन्त्रणमा लिएको थियो।
१४ जुनमा आफ्नै फ्ल्याटमा सुशान्त सिंहले आत्महत्या गरेका थिए। हालसम्म एनसिबीले यो प्रकरणमा १७ जनालाई पक्राउ गरिसकेको छ। एनसिबीले यो प्रकरणमा ड्रग्स उपलब्ध गराउनेदेखि खरिद गर्नेसम्मलाई पक्राउ गरेर अनुसन्धान गरिरहेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।