काठमाडौं- कोरोनाको कहर उस्तै छ। तर केही समयदेखि भारतलगायत अन्य मुलुकबाट स्वदेश फर्किएका युवाहरु देशमा रोजगारीका अवसर नहुँदा फेरि उतै फर्कन थालेका छन्। सीमा नाकाबाट भारततिर जाने युवाहरुको लर्को लाग्न थालेको छ। यस्तो अवस्थामा युवाहरुलाई कसरी देशभित्रै आकर्षित गर्ने भन्ने हिसाबले युवा लक्षित कार्यक्रम अगाडि सारिएको प्रदेश नम्बर ५ ले जनाएको छ। युवा लक्षित कार्यक्रमका लागि मात्रै प्रदेश सरकारले २ अर्बभन्दा बढी बजेट छुट्याएको सामाजिक विकासमन्त्री सुदर्शन बरालले बताए।
‘देशभित्र रोजगारी गुमाएका तथा विदेशबाट रोजगारी गुमाएर फर्किएकाहरुका लागि कोभिड विशेष कृषि कार्यक्रम भनेर एउटा कार्यक्रम राखिएको छ। हाम्रो प्रदेशको सबै स्थानीय तहमा यो कार्यक्रम सुरु गरिएको छ। यो कार्यक्रमका लागि मात्र झण्डै ५१ करोड बजेट विनियोजन गरेका छौं’ सामाजिक विकास मन्त्री बरालले भने।
प्रदेशका १ सय ९ वटै स्थानीय तहमा यो कार्यक्रम विस्तार गरिएको उनको भनाइ छ। त्यस्तै युवा उद्यमशीलता विकासका लागि समेत प्रदेशले जोड दिएको उनले बताए।
अहिले प्रदेशले युवाहरु के काम गर्न चाहन्छन् तथा उनीहरुसँग कस्तो सीप छ भनेर अनलाइनमार्फत् सर्वे गरिरहेको र यो सर्वेअनुसार योजना बनाएर अगाडी बढ्ने मन्त्री बरालले जानकारी दिए।
‘हामीले पाल्पामा ढाका उद्योग विस्तार गर्ने योजना ल्याएका छौं। यी उद्योग सञ्चालनमा स्थानीय युवाहरुलाई नै अवसर प्रदान गरी आवश्यक मेसिन तथा पुँजी समेत उपलब्ध गराउँछौँ’ उनले भने। उत्पादित ढाकालाई पनि अन्तराष्ट्रिय बजारसम्म पुर्याउन सरकार आफैंले पहल गरिने उनले जिकीर गरे।
स्वरोजगार तथा रोजगारी सिर्जनाका लागि हामीले सीपमुलक कार्यक्रमलाई जोड दिइएको उल्लेख गरिएको छ। त्यसैगरी युवाहरुलाई विज्ञान प्रविधितर्फ आकर्षित गर्ने हिसाबले दाङको राप्ती प्रविधि शिक्षालयमा इनोभेसन सेन्टर निर्माण गरिने तयारी गरिएकोे प्रदेश नम्बर ५ ले जनाएको छ।
नेपालगञ्ज उपमहानगरपालिका प्रदेश नम्बर ५ कै स्थानीय तह भएका कारण प्रदेशका नीति तथा कार्यक्रमअनुसार नै युवा लक्षित कार्यक्रमहरुलाई उपमहानगरपलिकाले अगाडि बढाएको उपमेयर उमा थापा मगर बताउँछिन्।
‘प्रदेशले जस्तै हामीले पनि युवाहरुको क्षमतालाई अझ प्रस्फुटन गर्न सीप तथा तालिममा जोड दिएका छौं। युवा उद्यमशीलता विकासका लागि आवश्यक तालिम दिन हामीले विभिन्न प्याकेज ल्याएका छौं’ उपमेयर उमा थापा मगरले भनिन्।
कोरोनाका कारण देशभित्र रोजगारी गुमाएका तथा वैदेशिक रोजगारीबाट रोजगारी गुमाएर फर्किएका युवाहरुलाई देशभित्रै टिकाउन उपमहानगरपालिकाले प्रोत्साहनमुलक कार्यक्रम अगाडि सारेको उनको भनाइ छ।
उपमेयर उमा भन्छिन्, ‘विदेशबाट फर्किएका युवाहरुलाई देशभित्रै उद्योगधन्दा, व्यापार व्यवसाय सञ्चालन गर्न उपमहानगरपालिकाले २५ प्रतिशत कर छुट गर्ने नीति ल्याएको छ। यो प्रोत्साहनको एउटा पाटो हो भन्ने मलाई लाग्छ।’
यसअघि देखि नै सरकारले युवाहरुलाई उद्यमशीलता विकासका लागि अनुदान उपलब्ध गराउँदै आएको तर त्यो वास्तविक व्यक्तिसम्म नपुगेको उनले बताइन्।
‘अनुगमनका क्रममा २५ प्रतिशत अनुदान वास्तविक व्यक्तिहरुसम्म पुगेको देखिएन। अब भने हामीले सुरुमा लगानी गर्नुभन्दा पनि युवाहरुले गरेको उत्पादनलाई आधार मानेर प्रोत्साहन स्वरुप अनुदान दिने कि भन्ने नीति अघि सारेका छौं’ उनले भनिन्।
व्यवसाय सुरु गर्न धितो तथा पुँजी नभएका युवाहरुलाई समेत सहुलित कर्जा कार्यक्रम अघि सारेको उपमहानगरपालिकाले जनाएको छ। त्यस्तै उद्यमशीलता विकासका लागि निःशुल्क तालिम उपलब्ध गराइने उल्लेख गरिएको छ।
राष्ट्रिय युवा परिषद्ले आयोजना गरेको भर्चुअल कार्यक्रममा बोल्दै परिषदका कार्यकारी उपाध्यक्ष माधव ढुंगेलले युवा लक्षित कार्यक्रमको कार्यान्वयनका लागि परिषद्ले केन्द्र, प्रदेश तथा स्थानीय सरकारलाई सक्दो घचघच्याइरहेको बताए। सरल कर्जा तथा उद्यमशीलता विकासका कार्यक्रममा असहज भएमा परिषदले सहजीकरणका लागि पहल गरिदिने उपाध्यक्ष ढुंगेलले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788534241.jpg)
-1787821303.jpg)
-1786602170.png)
-1789631269.jpg)
