काठमाडौं-निषेधाज्ञापछि तरकारीको मूल्य बढेको उपभोक्ताको गुनासोपछि वाणिज्य, आपूर्ति तथा उपभोक्ता संरक्षण विभागका महानिर्देशक र निर्देशकसहितको टोलीले मंगलबार उपत्यकाका विभिन्न तरकारी बजारमा अनुगमन गरेको छ।
विभागका महानिर्देशक नेत्रप्रसाद सुवेदी, निर्देशकहरु सागर मिश्र र रवीन्द्र आचार्य तथा अनुसन्धान अधिकृत ध्रुव खनालसहितको टोलीले तिनकुने, जडिबुटी, गट्ठाघर र भक्तपुर चार दोबाटोका होलसेल र खुद्रा तरकारी पसलमा अनुगमन गरेको हो। विभागका निर्देशक सागर मिश्रका अनुसार मुख्यगरी गोलभेंडाको मूल्य र अरु तरकारीमा होलसेल र खुद्रा व्यापारीले लिईरहेको मूल्यका विषयमा अध्ययन अनुगमन भएको हो।
‘खासगरी गोलभेडाको मूल्य निकै बढेको देखियो। त्यसको कारण के भने अहिले उत्पादन नै कम भएको रहेछ। अघिल्लो लकडाउनका बेला मूल्य नपाएका कारण किसानले गोलभेंडा नै लगाएनछन्। अरु अरु तरकारीमा समस्या छैन। सबै मागअनुसार आईरहेको छ,’ उनले भने।
काठमाडौं उपत्यकाका छिमेकी जिल्लाहरु काभ्रे, धादिङ, मकवानपुर, नुवाकोटलगायतबाट अहिले गोलभेंडा आउन छोडेको छ। यही समयमा तराईबाट पनि नआएपछि मूल्य बढेको भेटिएको अनुसन्धान अधिकृत ध्रुव खनालले बताए। ‘तराईबाट आउने गोलभेंडा सकिएको तर काभ्रेलगायत जिल्लाबाट पनि आउन सुरु नभएकाले मूल्य बढेको भनेर व्यापारीले भनेका छन्,’ उनले भने।
अहिले काभ्रेबाट एक चरणमा मात्रै गोलभेडा काठमाडौं आएको छ। ‘काभ्रेको गोलभेंडा पाउनेले प्रतिकिलो ७० रुपैयाँ सम्ममा पाए तर बाहिरबाट ल्याउनेले १ सय २० रुपैयाँसम्ममा बेच्ने गरेको पाईयो,’ खनालले भने।
निषेधाज्ञा जारी भए पनि अत्यावस्यक वस्तुको ढुवानीमा कुनै समस्या नरहेका कारण तरकारीको आपूर्तिमा पनि अहिले समस्या छेैन। ‘ढुवानीको समस्या छैन। आपूर्ति पनि माग अनुसार नै भईरहेको छ। तर थोक बजारबाट खुद्रा बजारमा हेर्दा मूल्य किन बढेको देखियो?’ निर्देशक मिश्रले नेपाल लाइभसँग भने।
अहिले कोरोना भाइरस संक्रमणको जोखिम बढिरहेका बेला पनि व्यापारीले आफूहरुले सेवा दिईरहेका कारण केही महंगोमा बेच्ने गरेको पनि देखिएको छ। त्यस्तै सबै तरकारी बेच्न नपाउँदा कुहिने र त्यसको पनि मूल्य उपभोक्तामाथि पर्ने गरेको व्यापारीहरुले बताएका छन्।
‘अहिले निषेधाज्ञाका कारण १० बजेसम्म मात्रै बेच्न मिल्यो। त्यसपछि तरकारी बिग्रने भएका त्यसको घाटा पनि मूल्यमै जोड्ने गरेको देखियो,’ मिश्रले भने, ‘हामीले अहिलेको विषम परिस्थितिमा पनि व्यापारीलाई कारबाही गर्याैं भने त्यसको राम्रो सन्देश जाँदैन। निकै सानो रकमको व्यापार गर्ने व्यापारीलाई जरिवाना गर्दा मानवीय हिसाबले अन्याय पनि हुन्छ। पहिलो पटक सम्झाएका छौं। अर्कोपटक पनि मूल्य बढाएको भेटिए कारबाही हुन्छ।’
काठमाडौं उपत्यकाका अधिकांश होलसेल र खुद्रा तरकारी व्यापारीले कालीमाटी फलफूल तथा तरकारी बजार विकास समितिले निर्धारण गरेको मूल्यलाई नै आधार मानेर मूल्य तोक्ने गरेका छन्।
कालीमाटी तरकारी बजार विकास समितिका अनुसार अहिले माग अनुसार नै तरकारी आपूर्ति भईरहेको छ। तर गोलभेंडा बोडीलगायत केही तरकारी कम आएका कारण मूल्य बढेको हो। औसत दैनिक ४ देखि ५ लाख मेट्रिक टन तरकारी कालीमाटीमा आउने गरेकोमा अहिले पनि त्यही परिमाणमा आईरहेको बजार विकास समितिले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768391713.png)
-1768388267.png)
-1768388032.png)
-1764146706.png)
-1768288990.png)
