काठमाडौं- केही दिन अघि ज्वरो आयो। रुघाखोकी लागेको थियो। सामान्य होला भनेर बेवास्ता गरे। तर श्वासप्रश्वासमै समस्या हुन थाल्यो। नगरमा कोरोना संक्रमण फैलदै गएकाले निकै व्यस्त भएर होला भन्ने सोचेँ। केही दिन आराम गर्न पर्ला भन्ने सोचिरहेको थियो। निकै समस्या हुन थालेपछि चिकित्सकहरुको सल्लाहमा औषधि खान थालेको थिए। त्यसले पनि कमी नभएपछि वीरगञ्जमा रहेको तराई अस्पतालमा भर्ना भए। मेरो आइसियूमा उपचार भइरहेको थियो।
नारायणी अस्पतालमा जचाउँदा कोरोना रिर्पोट नेगेटिभ आयो। साउन २५ गते मलाई निकै समस्या भयो। म विस्तारै गल्दै गएको महसुस भयो र अवस्था गम्भीर भयो। २६ गते काठमाडौं प्रस्थान गरे। शुरुमा मेडिसिटीमा भर्ना भएको थियो। स्वाब लिइयो र रिर्पोट कोरोना पोजेटिभ आयो। अनि मेडिसिटीबाट ह्याम्समा सरेको छु।
आइतबार दोस्रो पटक कोरोना परीक्षण गर्न स्वाब लिइएको छ। अहिले स्वास्थ्यमा निकै सुधार आएकाले अब नेगेटिभ आउने आशा गरेको छु। अस्पतालको बेडमा रहँदा पनि नगरकै चिन्ता रहेको छ। उपमेयर, प्रशासकीय अधिकृत, वडाध्यक्ष र अन्यसँग सम्पर्कमै रहेको छु। वीरगञ्ज महानगरपालिकासँगै जोडिएको नगर भएकाले संक्रमणको जोखिम नगरमा उच्च रहेको छ। हालसम्म नगरमा ४८ जना संक्रमित रहेका छन्। ४२ पुरुष र ६ जना महिला संक्रिमत रहेका छन्।
मेरै परिवारमा पनि छोरो र भतिजामा संक्रमण देखिएको छ। नगरका एक वडाध्यक्ष पनि संक्रमित रहेका छन्। वडा नम्बर ९ का अध्यक्ष अहिले होम आइसोलेनमा रहेका छन्। नगरपालिकाकै चार कर्मचारी संक्रमित भएका छन्। हामी सबैलाई सेवाग्राहीवाट संक्रमण भएको आशंका गरेका छौँ। यसअघि नगरपालिकाको प्राथमिक स्वास्थ्यकेन्द्रका ६ जना स्वास्थ्यकर्मी संक्रमित भएका थिए। उहाँहरू अहिले निको भएर काममा फर्किनु भएको छ।
वीरगञ्जको होटलमा आइसोलेन
नगरपालिकाले संक्रमितहरुलाई राख्न वीरगञ्ञ्जको होटल कुमु प्यालेस भाडामा लिएको छ। संक्रमितहरुका लागि उपचार गर्ने अस्पताल नारायणी र अन्य स्थानमा स्थान नभएकाले मिनी आइसोलेनमा राख्ने २० वेड क्षमता बराबर भाडामा लिएका छौँ। अहिले उक्त होटलमा नगरका संक्रमित राखिएको छ। भोलिका दिनमा थप संक्रमित हुने जोखिम भएकाले प्राथमिक स्वास्थ्यकेन्द्र बागेश्वरीमा २० र नेपाल राष्ट्रिय माध्यमिक विद्यालय ३० बेड तयारी अवस्थामा राखेका छौँ। नगरको ३ वटा क्वारेनटाइनमध्ये दुई वटालाई आइसोलेनमा परिर्वतन गरिएको छ।
बिरामीलाई औषधिसहितको प्याकेज
नगरले बिरामीलाई हौसला बढाउन र रोगसँग लड्ने प्रतिरोधी क्षमता बढाउने सामग्री वितरण गर्ने गरेको छ। नगरले हर्लिक्स, च्वयनप्रास र औषधि बिरामीलाई दिने गरेको छ।
वीरगञ्जसँग सीमा जोडिएको भारतसँगको मूल नाका यही भएकाले संक्रमणको जोखिम धेरै रहेको छ। यहाँ कोरोना संक्रमण नियन्त्रण गर्न सजह पक्कै छैन।
मानिसहरू पूर्ण निरक्षर नभएपनि सामाजिक दूरी र सचेतना अपनाउन भने कठिन भइरहेको छ। अहिले देखिएको मुख्य चुनौती भनेको चेतनाको कमी र स्रोतसाधनको अभाव हो। नगरभित्र अस्पताल बनाउने ठाउँ छैन। भएको एउटा स्वास्थ्यकेन्द्र पनि साँघुरो छ। विद्यालयहरू पनि व्यवस्थित नहुँदा क्वारेनटाइन र आइसोलेन सेन्टर बनाउन समस्या भइरहेको छ।
कतिपय स्थानमा मानिसहरूले नबुझ्दा आइसोलेसन र बिरामी राख्ने ठाउँ नदिने पनि हुने गरेको छ। संक्रमित राख्दा समुदायमा फैलने भन्दै नबुझेरै विरोध गर्ने गर्नु भएको छ।
नागरिकले वुझेनन् , केन्द्र र प्रदेशले सहयोग गरेन्
कोरोना भाइरस महामारीको संक्रमण नजिकै भएपनि जनता अझै सचेत रहेको पाइँदैन। मास्क लगाउने, साबुनपानीले हात धुने र सामाजिक दुरी पालना गर्न अझै पनि बल पुर्याउनुपर्ने अवस्था छ। प्रहरी र नगरले गर्नुस् भनेर मात्र यस्तो गर्ने होइन, आफ्नै सुरक्षाका लागि हो भन्ने चेतना आउन सकेको छैन। यो चेतना विस्तार नभएसम्म कोरोना संक्रमण रोक्न समस्या नै हुन्छ।
यसरी स्थानीय तहमा धेरै चुनौती भएपनि केन्द्र र प्रदेशबाट यथेष्ट सहयोग पाएका छैनन्। केन्द्र आफै अस्तव्यस्त, प्रदेश पनि आफ्नै धुनमा केन्द्रित भएकाले काम गर्न समस्या भइरहेको छ।
हाल ह्याम्स अस्पताल काठमाडौंमा उपचाररत छु। मलाई वीरगञ्जस्थित तराई अस्पतालबाट थप उपचारका लागि काठमाडौंस्थित मेडिसिटी अस्पतालमा ल्याइएको थियो। वीरगञ्जस्थित नारायणी अस्पतालमा गरिएको स्वाब परीक्षणको रिपोर्ट नेगेटिभ भएतापनि गत सोमबार काठमाडौंमा गरिएको स्वाब परिक्षणमा भने कोरोना भाइरस (कोभिड– १९) संंक्रमणको पुष्टि भएको छ।
अहिले मेरो स्वास्थ्य अवस्था दैनिक सुधारका क्रममा छ। क्रमिक स्वास्थ्य अवस्थामा आएको सुधारले सकरात्मक आत्मबल बढेको छ। मलाई आशा छ तपाईंहरूको माया, सद्भाव र शुभेच्छाका कारण मैले चाँडै कोरोना भाइरसलाई पराजित गरी पुनः तपाईंहरूकै सेवामा हाजिर हुनेछु। मेरो स्वास्थ्यलाभको कामना गरी विभिन्न माध्यमबाट शुभेच्छा प्रकट गर्नुहुने सम्पूर्णमा आभार व्यक्त गर्न चाहन्छु।
साथै कोरोना संक्रमणको यो घडीमा आफूलाई संयमित राख्न र नेपाल सरकारले तोकेको मापदण्ड पालना गर्न सम्पूर्ण नगरवासीमा अपिल गर्दछु।
(यादव पर्सागढी नगरपालिकाका मेयर हुन्।)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781580295.jpg)
-1786602170.png)
-1786513116.png)
