'अस्पताल भरिएपछि संक्रमितलाई होम आइसोलेसनमै बस्न भनेका छौं'

कोरोना अपडेट

अञ्जनादेवी मधिकर्मी आइतबार, साउन ३२, २०७७ १४:१७

मध्यपुर थिमि नगरपालिकाका ९ वटा वडामध्ये वडा नम्बर २ बाहेकका सबै वडामा कोरोना संक्रमित भेटिइसकेका छन्। मध्यपुर ठिमी नगरपालिकामा यसअघि बाहिरबाट आएका मानिसहरूलाई मात्रै कोरोना देखिएको थियो। अहिले घरमै बसिरहेकाहरूलाई समेत कोरोना देखिन थालेको छ। यसको अर्थ कोरोना समुदायमा फैलिइसकेको छ।

कोरोनाविरुद्धको भ्याक्सिन नभएकाले सरसफाइमा ध्यान दिँदै सामाजिक दुरीको कायम गर्नुको विकल्प छैन। मानिसहरूको आवतजावत कम होस् भनेर हामी लकडाउन गर्न बाध्य भएका छौँ। कोरोनाले भयावह रूप लिँदै गएपछि हामी शनिबार नै आकस्मिक बैठक बस्यौँ। बैठकले नगरमा अत्यावश्यकबाहेकका सेवा १५ दिनका लागि बन्द गर्ने निर्णय गरेको छ।

नगरपालिका भित्र सञ्चालित अत्यावश्यक बाहेकका सबै व्यापार/व्यवसाय र सेवा बन्द गर्ने भनेर हामीले प्रेस विज्ञप्ति नै जारी गरिसकेका छौँ। अत्यावश्यक व्यवसायमा खाद्यान्न, औषधि, तरकारी, फलफूल, खानेपानी, दूग्ध पदार्थ, ग्यासलगायत पसल मात्रै खुल्ला गर्ने निर्णय गरिएको छ।

यी अत्यावश्यक व्यवसाय पनि बिहान ११ बजेदेखि दिउँसो १ बजे मात्रै खुल्ला गर्न पाउने व्यवस्था हामीले गरेका छौँ। यो भन्दा अघि बिहान ५ बजेदेखि बिहान ९ बजेसम्म र साँझ यस्ता व्यवसाय सञ्चालन गर्ने निर्णय गरिएकोमा समुदायवासीले अटेर गरेर धेरै भिडभाड भएपछि हामीले यो समय पनि परिवर्तन गरेका हौँ। नगरपालिका भित्र यातायात पनि बन्द गर्ने निर्णय गरेका छौँ।

हाइवेबाहेक भित्रभित्रका सडकमा कुनै पनि सवारी साधन सञ्चालन गर्न पाइँदैन। हाइवेमा चलेका सवारीले पनि थिमि नगरपालिका क्षेत्रभित्र यात्रु चढाउन र ओराल्न पाउने छैनन्। यो निर्णयबाट जनतालाई असुविधा त हुन्छ। तर कोरोना संक्रमणको अवस्था अत्ति नै जटिल बन्दै गएकाले कठोर भएर हामी यस्तो निर्णय गर्न बाध्य भएका छौँ।

कोरोना संक्रमित बढेसँगै अस्पताल भरिभराउ छ । मध्यपुर थिमि नगरपालिकाले आफ्नै स्रोतबाट सञ्चालनमा ल्याएका ६ वटा आइसोलेसन बेड क्षमता भएको नेपाल–कोरिया मैत्री अस्पताल पनि भरिएको छ। त्यसमाथि कोरोना मैत्री अस्पतालमा पनि अहिले सुरक्षाकर्मी र नर्स गरी ४ जना कर्मचारीलाई कोरोना देखिएको छ। यो अस्पतालमा पनि अत्यावश्यकबाहेकका सेवा तत्कालका लागि बन्द गरिएको छ।

भक्तपुर अस्पताल, ट्रपिकल तथा सरुवा रोग अस्पताल टेकुलगायतमा पनि बेड भरिन थालेपछि हामीले बिरामीलाई घरमै स्वास्थ्य सुरक्षाका उपाय अपनाएर बस्न भनेका छौँ। घरमै बसेर तातोपानी सिटामोल खान सुझाएका छौँ। त्यसो गर्दा स्वस्थ्यमा असहज भयो भने मात्रै हामीले उहाँहरूलाई अस्पताल पु¥याउँछौँ। बिरामीको अबस्था बुझ्न वडाबाट हामीले स्वास्थ्य टोली खटाएका छौँ।

कुनै स्थानमा कोरोना संक्रमित भेटिए संक्रमितको सम्पर्कमा आएकाहरूको कन्ट्याक्ट ट्रेसिङको जिम्मा हामीले वडाको स्वास्थ्य शाखालाई दिएका छौँ। शाखाले संक्रमित र उनीहरूको सम्पर्कमा आएका व्यक्तिसँग खोजी गर्ने गरेको छ। यसमा नगरपालिकाले सहजीकरण गरिरहेको छ।

अब यसरी नै संक्रमितको चाप बढ्दै गयो भने त्यसको व्यवस्थापन कसरी गर्ने भनेर हामीले छलफल गरिरहेका छौँ। क्वारेन्टाइन तथा आइसोलेसनका लागि कुनै निश्चित ठाउँको व्यवस्था गर्नेबारे पनि छलफल गरेका छौँ। तर कहाँ बनाउने, कसरी बनाउने भनेर निर्णय भने भइसकेको छैन।

महामारीका कारण अघिल्लो वर्षको जति कर पनि उठेको छैन। कोरोना कोरोना रोकथाम तथा नियन्त्रणका हामीले छुट्याएको पहिलो चरणमा ३ करोड बजेट छुट्याएका थियौँ। विकास बजेटमा पनि कोरोना नियन्त्रणलाई प्राथमिकतामा राखेका छौँ। अहिले त्यसैबाट धेरथोर काम भइरहेको छ। हामीले स्रोत साधन र क्षमताले भ्याएसम्म कोरोना नियन्त्रणका लागि सक्दो पहल गरिरहेका छौँ। तर नगरको स्रोतसाधनले मात्रै अपुग भएको छ। सिमित स्रोत साधनका बाबजुत कोरोनासँग जसरी पनि जुध्नु छ। नगरले मात्र काम गरेर कोरोनासँग जुध्न सकिन्न। नेपाल सरकारले नै थप कडा कदम चाल्नुपर्ने महसुस मैले गरेकी छु।

(मध्यपुर थिमिकी उपमेयर मधिकर्मीसँग नेपाल लाइभकी निर्मला घिमिरेले गरेको संवादमा आधारित)