काठमाडौं- भदौ १ गतेबाट पुनः सुरु हुने भनिएको खेलकुदको अभ्यास अर्को सूचना नआएसम्मलाई स्थगित भएको छ। तर फुटबलको अभ्यास भने रोकिने छैन।
मंगलबार मन्त्रीपरिषद्को निर्णय सार्वजनिक गर्दै प्रवक्ता डाक्टर युवराज खतिवडाले अर्को सूचना नआएसम्म विभिन्न खेलका अभ्यासमा रोक लगाएको जानकारी दिएका हुन्। गत चैत पहिलो साताबाट रोकिएको विभिन्न खेलको अभ्यासमध्ये केही खेलले पुनः सुरु गरेको थियो। तर कराते लगायत खेलको अभ्यास पुनः रोकिएको हो।
सरकारले पुनः खेलकुद गतिविधि बन्द गर्ने भए पनि राष्ट्रिय फुटबल टिमको अभ्यास भने भदौ १ गतेदेखि नै सुरु हुनेछ। सबै खेलाडी, टिम अफिसियल र होस्टेल स्टाफको मंगलबार मात्रै कोरोना परिक्षणको लागि स्वाब संकलन सकिएको छ। बुधबार र बिहीबार सबै खेलाडी, टिम अफिसियल र होस्टेल स्टाफको कोरोना रिपोर्ट आउनेछ।
सरकारसँग विशेष अनुमति लिएर अभ्यास गर्न लागेको कारण सरकारको यो निर्णयले राष्ट्रिय टिमको बन्द प्रशिक्षणमा कुनै असर नपर्ने एन्फा अध्यक्ष कर्माछिरिङ शेर्पाले जानकारी दिए। उनले भने, ‘हामीले मन्त्रीपरिषद्बाटै अभ्यास गराउनका लागि विशेष अनुमति पाएका हौं। सेल्फ क्वारेन्टाइन जस्तै हो, हाम्रो अभ्यास। बन्द प्रशिक्षणमा सबैथोक हुन्छ। त्यहाँ गइसकेपछि कुनै पनि खेलाडी बाहिर आउने छैनन्। कसैसँग भेट्न पाउँदैनन्।’
बन्द प्रशिक्षणमा खेलाडीको लागि बस्ने, खानेदेखि सबै कुराको ब्यवस्था गरिएको छ। एन्फाले आफ्नै होस्टेलमा सबै खेलाडी बस्ने ब्यवस्था मिलाएको छ। खेलाडीलाई कोरोनाविरुद्धको फिफाको नियमअनुसार नै राख्न लागिएको छ।
नेपालले विश्वकप छनोटको दोस्रो चरणमा आफ्नै घरेलु मैदानमा तीन वटा खेल खेल्दैछ। असोज २२ मा चाइनिज ताइपेईविरुद्ध खेल्दैछ। त्यस्तै, अस्ट्रेलियासँग असोज २७ गते खेल्ने तालिका छ। दशरथ रंगशालामा नेपालले अन्तिम खेल जोर्डनसँग कात्तिक २७ गते खेल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
