एजेन्सी–कोरोना संक्रमणको दर हेर्ने हो भने अमेरिका गलत बाटोमा रहेको देखिएको छ। अमेरिकामा जनवरी २१ मा पहिलो पटक संक्रमण देखिएको थियो । त्यसको ९९ दिनमा संक्रमितको संख्या १० लाख पुग्यो। त्यसपछि २० लाख पुग्न जम्मा ४३ दिन लाग्यो भने अर्को २८ दिनमा ३० लाख पुग्यो । १० लाख थपिन भने जम्मा २ सातामात्र लाग्यो ।
बिहीबार बिहानसम्म अमेरिकामा संक्रमितको संख्या ३९ लाख ५५ हजार ८ सय ६० पुगेको छ भने १ लाख ४२ हजार ९ सय ४२ जनाको मृत्यु भइसकेको छ।
अमेरिकाका केही राज्यहरुमा संक्रमणको दरले अझै पनि रेकर्ड बनाइरहेको छ। बुधबारमात्र अमेरिकामा ४१ हजार ३ सय ८१ नयाँ संक्रमित थपिएका थिए।
अनुसन्धानकर्ताहरुले अमेरिकामा १ नोभेम्बरसम्म २ लाख १९ हजार ८ सय ६४ जनाको मृत्यु हुने आँकलन गरेका छन्। केही दिनअघि २ लाख २४ हजार ५ सय ४६ जनाको मृत्यु हुने आँकलन गरिएकोमा केही राज्यहरुले मास्क अनिवार्य र सामाजिक दूरी अपनाउन भनेपछि मृतकको संख्या केही कम हुने आँकलन गरिएको हो।
४१ राज्यले राज्यले मास्क अनिवार्य बनाएका छन् भने केहीले स्वास्थ्य सुरक्षा मापदण्डका योजना बनाइरहेका छन्। दर्जनौं अस्पताल आइसीयु बेड अभावबाट गुज्रिरहेका छन्।
राष्ट्रपति डोनाल्ड ट्रम्पले ५ करोडभन्दा बढी मानिसको परीक्षण गरिसकेको जनाएका छन्। ह्वाइटहाउसमा आयोजित पत्रकार सम्मेलनमा उनले मास्क लगाउनुपर्ने उल्लेख गर्दै सामाजिक दुरी अपनाउन र हात धुन आग्रह गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
