वडाध्यक्षको बयान : प्रहरीले पक्राउ गरेका बाहेक कसैलाई देखेको छैन, हत्यामा मेरो नाम कसरी जोडियो?

सुरक्षा/अपराध

नारायण अधिकारी मंगलबार, असार २३, २०७७ १५:३६

काठमाडौं– रुकुम पश्चिमको चौरजहारी नगरपालिका–८ सोतीमा ६ जनाको ज्यान जाने गरी भएको घटनामा आफ्नो कुनै संलग्नता नरहेको वडाध्यक्ष डम्बरबहादुर मल्लले दाबी गरेका छन्। अदालतमा बयान दिँदै उनले हत्यामा आफ्नो नाम कसरी जोडियो भन्ने नै थाहा नभएको बताएका छन्।

हाल पुर्पक्षका लागि जेलमा रहेका मल्लले अदालतमा दिएको बयान यस्तो छ
घटना भएको दिन साढे ५ बजेतिर प्रतिवादीमध्येका टोपबहादुर मल्ले मलाई फोन गरेर २०/२५ जना मानिसको जमात ढुंगेखानीतिर गइरहेका छन् दाइ भनेपछि मैले अहिले ठिकै छ, म प्रहरीलाई फोन गर्छु भनेको थिएँ। लगत्तै मैले इलाका प्रहरी कार्यालय चौरजहारीमा फोन गरी हाल लकडाउनको अवस्थामा ढुंगेखानीतिर हाम्रै वडामा १५/१६ जना मान्छेहरु आएका छन् रे ती मान्छेहरु किन आएका हुन् प्रक्रिया अघि बढाइदिनुपर्‍यो भनेको थिएँ।

पछि ढुंगेखानीतिर गएका मान्छेको जमात गोइरीतिर जाँदैछन् भन्ने थाहा पाएपछि मैले वडा सदस्य गोर्खे घर्तीले फोन गरी निगरानी गर्नु मैले पुलिस बोलाएको छु भनेको थिए। प्रहरीलाई खबर गरिसकेकाले प्रहरी आउने जानकारी पाएपछि ती केटाहरु कता गएछन्त भनी बुझ्नलाई म मेरो घरको बाटो हुँदै औल भन्ने जिउलामा पुगें। त्यसबेला प्रहरीले मलाई फोन गरी कता हुनुहुन्छ भनेकाले म औल भन्ने ठाउँ नजिक भएकाले औलमा छु औलमा आउनुस् भनेको थिएँ। पछि म मध्यपहाडी सडकमा पुगेका बेला प्रहरी पनि त्यही बेला सो ठाउँमा पुगेको थियो। प्रहरी र मेरो सोही ठाउँमा भेट भएको हो।

मैले भेरी नदीतिर हेर्दा केही मान्छेहरु भेरी पारी जाजरकोटतिर गएको देखेको हुँ। प्रहरीले केही मान्छे समातेर म भएको ठाउँमै ल्याएको थियो। पछि साँझ परेपछि प्रहरीले समातेको मान्छेलाई लिएर कार्यालयतिर गएको हो। म आफ्नो घरतिर आएको हुँ। यसभन्दा बढी मलाई केही थाहा छैन। नवराज विकसहितका मान्छे कसरी मरे मलाई थाहा भएन। म मध्यपहाडी सडकमा उभिएको बेला कसैको कुटपिट विवाद तथा होहल्ला समेत भएको होइन। त्यसबेला केवल प्रहरीले ७ जना मान्छे समातेर ल्याएको देखेको हुँ। मैले कुनै जातीय छुवाछुतको कसुर पनि गरेको छैन। म आफैंले अन्तरजातीय बिहे गरेको छु।

यसअघि प्रहरीसँग दिएको बयानमा पनि वडाध्यक्ष मल्लले इन्कारी बयान दिएका थिए। तर प्रहरीले घटनाको मुख्य मतियार उनै वडाध्यक्ष रहेको भन्दै अभियोग पत्र दर्ता गराएको थियो। झुटा व्यहोरा लेखेर जाहेरी दिइएको उनको दाबी छ।