काठमाडाैं- कोभिड– १९ संक्रमणको जोखिमपछि पर्यटन क्षेत्र खुला गर्न संस्कृति, पर्यटन तथा नागरिक उड्डयन मन्त्रालय र नेपाल पर्यटन बोर्डले जारी गरेको ‘अपरेशन गाइडलाइन विथ हेल्थ प्रोटकल फर टुरिजम’लाई प्रभावकारी प्रयोग गर्न नेपाल पर्यटन बोर्डले छलफल सुरु गरेको छ। सम्बद्ध संघ–संस्थाहरुसँगको सहकार्यमा पर्यटन व्यवसायीहरुका लागि बोर्डले अनलाइनबाट छलफल सुरु गरेको हाे।
नेपाल पर्यटन बोर्डका कार्यकारी प्रमुख डा. धनञ्जय रेग्मीले हाल तालिममा ६ सयलाई सहभागी गराइने र आगामी दिनमा यो संख्यालाई बढाउँदै लैजाने बताए। पर्यटक विमानस्थलमा ओर्लेदेखि फर्किंदासम्म अपनाउनुपर्ने विषय प्रोटोकमा समावेश गरिएको छ। यस तालिमले पर्यटन उद्योगको हालको प्रमुख विषय स्वास्थ्य सुरक्षामा जोड दिई डिजिटल मार्केटिङको प्रयोग गरी व्यवसायलाई जीवन्त बनाउन तथा व्यवसायी व्यवसायीबीच समन्वय गराई व्यवसाय तथा समग्र पर्यटन क्षेत्रको विकासको लागि वातावरण बनाउने विश्वास बोर्डले लिइएको छ।
हाल नेपाल पर्यटन बोर्डले होटल संघ नेपाल, नेपाल एशोसियशन अफ टुर एण्ड ट्राभल एजेन्टस्, तथा ट्रेकिङ्ग एजेन्सिज एशोसियशन अफ नेपालसँगको समन्वयमा तालिमको आयोजना गरिरहेको र आगामी दिनहरुमा आवश्यकता अनुसार अन्य पर्यटन संघ–संस्थाहरुसँगको समन्वयमा प्रादेशिक स्तरमै तालिमलाई अगाडि बढाउने बोर्डको भनाइ छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।