काठमाडौं- डिएसपी कुमाेध ढुंगेललाई साधारण तारेखमा रिहा गर्न जिल्ला अदालत काठमाडौंले आदेश दिएको छ।
२०७५ चैत २६ गते काठमाडौंस्थित लालेन्द्र शेरचन्दको घरमा लुटपाट गरेको अभियोगमा पक्राउ परेका व्यक्तिसँग फोन सम्पर्क देखिएकै आधारमा उनलाई निलम्बन गरिएको थियो।
पछि कुमाेध विरुद्धको उक्त मुद्दा अदालतसम्म पुगेको थियो। सोही मुद्दाका लागि मंगलबार अदालतमा उपस्थित भएका उनलाई साधारण तारेखमा रिहा गर्न जिल्ला अदालत काठमाडौंले आदेश दिएको हो।
योसँगै एक वर्षभन्दा बढीको उनको निलम्बन फुकुवा भएको छ। उनी अब नियमित काममा फर्कनेछन्।
२०७५ चैत २६ गते काठमाडौंस्थित लालेन्द्र शेरचन्दको घरमा लुटपाट भयो। उक्त घटनामा महानगरीय प्रहरी अपराध महाशाखाले विक्रम श्रेष्ठसहित तीन जनालाई पक्राउ र्गयो। तिनै श्रेष्ठसँग भेटघाट गरेको र फोन सम्पर्क भएको देखिएपछि शंकास्पद भन्दै ढुंगेललाई प्रहरी प्रधान कार्यालयको सिफारिसमा गृहसचिव प्रेम राईले २०७६ बैसाख १९ गते निलम्बन गरेका थिए।
ठूला अपराधको गुत्थी पत्ता लगाउन अपराधी नै प्रयोग गर्दै पक्राउ गर्ने गरेका घटना नौला होइनन्। अधिकांशजसो अपराधी उनीहरुकै समूहका सदस्यको सहयोगबाट पक्राउ पर्ने गरेका छन्। जसका लागि पनि प्रहरीले त्यस्ता पृष्ठभूमिका व्यक्तिसँग व्यावसायिक सम्बन्ध राख्ने गर्छन्। जसकै कारण प्रहरीले अपराध अनुसन्धानमा सफलता हात पार्दै आएको छ।
यसको उदाहरणको रुपमा रामेछापकी १३ वर्षीया सुन्तली तामाङको घटनालाई लिन सकिन्छ। घटना भएको ६ वर्ष बितिसक्दा पनि उनका हत्यारा कानुनी दायरामा आउन सकेका थिएनन्। सोही क्रममा डिएसपी ढुंगेल रामेछाप जिल्लाको नेतृत्व गर्न पुगे। तामाङ हत्याका अनुसन्धानको फाइल उनले पल्टाउन सुरु गरे।
घटनामा संलग्न व्यक्तिको खोजी गर्ने क्रममा गुण्डा नाइके भनेर चिनिएका रमेश बाहुन अर्थात् सुजन पौडेलसम्म गएर ठोकियो। उक्त हत्याको बारेमा बाहुन केही जानकार थिए। यसबारे डिएसपी ढुंगेलले प्रहरी प्रधान कार्यालयसम्म जानकारी गराए। माथिल्लो निकायबाटै ग्रिन सिग्नल पाएपछि उनले बाहुनसँग सम्पर्क बढाए। बाहुनकै सूचना र सहयोगको आधारमा सुन्तली तामाङका हत्यारालाई ६ वर्षपछि डिएसपी ढुंगेलको टोलीले भारतको अण्डमाननिकोबार टापुबाट पक्राउ गर्न सफल भयो। राष्ट्रिय–अन्तराष्ट्रिय चर्चा पाएको यस घटनाले प्रहरीको शाख जोगाएको भन्दै २०७४ असार १२ मा काठमाडौंमा पत्रकार सम्मलेन गरिएको थियो।
डाँका मुद्दामा पक्राउ परेका विक्रम श्रेष्ठले पनि ढुंगेललाई अपराध अनुसन्धानमा सहयोग गर्ने गरेका थिए। केही वर्ष रुपन्देहीमा भेटिएको बेवारिसे गाडी र चरेसमा संलग्न व्यक्ति पक्राउ गर्न उनै श्रेष्ठले सहयोग गरेका थिए। यसरी बारम्बार सम्पर्क हुने गरेका ती व्यक्ति पछि डाँका मुद्दामा पक्राउ परेपछि फोन सम्पर्ककै आधारमा उनलाई निलम्बन गरिएको थियो। जबकी ढुंगेल त्यसबेला रौतहटको चन्द्रनिगाहापुरमा कार्यरत थिए।
डिएसपी ढुंगेल तिनै प्रहरी अधिकृत हुन्, जसले सुन्तली तामाङ हत्याकाण्डका अभियुक्तदेखि निर्माण व्यवसायी महासंघका अध्यक्ष शरदकुमार गौचनको हत्यामा संलग्न समीरमान सिंह बस्नेतसम्मलाई पक्राउ गरेका थिए ।
त्यस्तै डा उपेन्द्र देवकोटाकी छोरी अपहरण गर्ने मुख्य अभियुक्त गोकुल गिरीलाई पनि उनै ढुंगेलले पक्राउ गरेका थिए। व्यवसायी अञ्जनीकुमार चाचन हत्याका अभियुक्तलाई पनि उनै ढुंगेलले कानुनी दायरामा ल्याएका थिए।
हिमालयन बैंकको ५ करोडभन्दा बढी ठगी गर्ने अनशिभक्त सुवालजस्ता नेपाल प्रहरीको मोस्ट वान्टेड सूचीमा रहेका दर्जनौं अपराधीलाई उनै ढुंगेलले पक्राउ गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
