प्रतीकात्मक फोटो। thehindu.com
तिमी पनि त मरेर
यही भेरीमा आउनेछौ एकदिन ।
यही हो ठाउँ
तिम्रो पनि गर्ने संस्कार अन्तिम ।।
त्यतिबेला के गर्छौ
भेरीलाई मैले छोइसकेको हुनेछु ।
तिम्रै परिभाषामा यसमा
म अछुतको रगत मिसिसकेको हुनेछ ।।
मरेपछि तिम्रो स्वर्ग जाने बाटो
प्रेमलाई हाम्रो निमोठेर ।
तिमिले नै छेक्यौ
भेरीमा मेरो रगत मिसाएर ।।
भेरी त बग्दैबग्दै
पुग्छिन् गंगामा ।
तिमी घर अनि पुजाकोठमा छर्केर
शुद्धता खोज्छौ त्यही गंगाको पानीमा ।।
घरपरिवार अनि तिम्रा देउता अशुद्ध पारेर
तिमी त नरकमा जाने भयौ ।
मेरो रगत बगेको खोलामा सदगत् गरेर
वैतरणी तर्न नसक्ने भयौ ।।
खासमा मैले छोएकाले होइन
तिम्रो सोच दुषित हुनाले ।
मानव जीवन धर्म र संस्कारलाई पनि
गिजोल्यौ छुत र अछुतको परिभाषाले ।।
मरेपछि पनि भड्किने भो
तिम्रो आत्मा यत्रतत्र ।
मुक्ति अनि शान्ति नपाउने भयौ
निन्दा हुने भो तिम्रो जीवन मृत्यु पर्यन्त ।।
तर जसकालागि नरसंहार मच्चायौ
उसकै आत्मा रोएको देखेर ।
पलपल मर्नेछौ तिमी
आफ्नै जातीय अहंकार सम्झेर ।।
तिमिले जातपात र विभेदका नाममा
कति ठूलो कुकर्म गरिसकेका छौ भनेर ।
छोरीको आत्मालाई सोध्नु
र धिक्कार्नु आफैं मलाई सम्झेर ।।
तर म त अब बाँचेर
आउने छैन संसारमा
पुगिसकेको छु जातीय भेदभाव
र विभेद मुक्त संसारमा ।
मिल्ने छौं हामी यहीँ उनी आएपछि
रोक्न सक्दैनौं अब तिमीले हामीलाई ।
छुवाछुत र जातीय भेदभाव उन्मुलनका हामी मसिहा भयौं
रोक्न सक्दैनौ अब तिमिले हामीलाई ।।
(२०७७/२/१६)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
