काठमाडौं- केन्द्र र स्थानीय प्रहरीलाई जानकारी नै नदिई प्रदेश नम्बर २ ले रौतहटको राजपुर नगरपालिका-४ फरहदवामा रहेको पूर्वमन्त्री तथा प्रतिनिधिसभाका निलम्बित सांसद मोहमद अफताब आलमको घरमा छापा (रेड) हान्दा विवाद बढेको छ।
आलमको घरमा रौतहट बम काण्डका फरार अभियुक्त तथा आलमका भाइ महताब आलम आएको हुनसक्ने भन्दै बिहीबार राती साढे १२ बजे सादा पोशाकमा रहेका प्रहरीले छापा मारेका थिए। विश्वस्त स्रोतका अनुसार सादा पोशाकका करिब २० प्रहरीसहित झण्डै ५० जनाको हाराहारीमा गएको प्रहरी टोलीले आलमको घरमा छापा मार्दा स्थानीयले प्रतिवाद गरेका थिए।
स्थानीयले प्रतिवादमा गोली समेत चलाउँदा प्रहरीलाई ज्यान जोगाउनै हम्मे भएपछि प्रहरीले समेत हवाई फाएर गर्नुपरेको थियो। प्रदेश २ ले १२ राउण्ड गोली प्रहार भएको दावी गरे पनि स्थानीय र जिल्लातहको प्रहरी नेतृत्वबाट केन्द्रमा आएको सूचना अनुसार २ दर्जन बढी गोली चलेको थियो।
स्थानीयको प्रतिकार र प्रहरीलाई आएको सूचना गलत देखिएपछि प्रदेशको प्रहरी फर्किएको थियो। तर स्थानीयले शुक्रबार पनि प्रहरीले ज्यादती गरेको र दुःख दिएको भन्दै विरोध प्रदर्शन गरेका थिए।
प्रदेश प्रहरीले सो अप्रेशन चलाउँदा केन्द्रसँगै जिल्लातहको प्रहरी नेतृत्व, प्रमुख जिल्ला अधिकारी र स्थानीय प्रहरीलाई समेत जानकारी नदिई अप्रेसनमा खटिएको र सूचना समेत गलत देखिएपछि अहिले सो अप्रेशन विवादमा आएको छ। प्रदेशले छापा मार्न कार्यक्षेत्र नपर्ने प्रहरी कार्यालयका प्रहरीको प्रयोग गरेको थियो।
छापा मार्न प्रदेश २ प्रहरी कार्यालयको ठाडो आदेशमा इलाका प्रहरी कार्यालय सिमरा, बाराका डिएसपी गोविन्द पुरीसहितको टोली रौतहट पुगेको थियो। उनीसहित सिमराकै सई सागर समशेर राणाको टोली बाराबाट रौतहट पुगेको थियो। जबकी यस घटनाबारे स्थानीय प्रहरीलाई कुनै जानकारी नै दिइएको थिएन।
गोप्य अप्रेशन भए पनि प्रहरी प्रधान कार्यालयसँग समन्वय हुने गरेको थियो। तर यो अप्रेशनमा प्रदेश नम्बर २ का प्रमुख धिरजप्रताप सिंहले प्रहरी महानिरिक्षकलाई समेत गुमराहमा राखेपछि केन्द्रले उनलाई प्रष्टीकरण सोधेको छ।
स्रोतका अनुसार प्रहरी महानिरीक्षक ठाकुर प्रसाद ज्ञवालीले सिंहलाई मौखिक स्पष्टिकरण सोध्दा उनले चित्त बुझ्दो जवाफ नदिएपछि लिखित प्रष्टीकरण सोध्ने तयारी भएको छ। केन्द्रलाई जानकारी नगराएको, आएको सूचनाको पुष्टिको प्रयासै नगरी जिल्लातहको नेतृत्वतहसँग समेत समन्व नगरी असम्बन्धित प्रहरी कार्यालयका प्रहरी परिचालन गरेर प्रहरी कर्मचारीको ज्यान जोखिममा पारेको भन्दै केन्द्रले सिंहसँग प्रष्टीकरण लिने तयारी गरेको हो।
जिल्ला प्रहरी कार्यालय रौतहटका अधिकारीले आफूहरुलाई जानकारी नदिई छापा मारिएको र समस्या आएपछि मात्रै जानकारी आएको जनाएको छ। स्थानीय प्रहरीलाई समेत खबर नगरी छापा मार्न सादा पोशाकमा प्रहरीले आलमको घरको गेट तोडफोड गरेर भित्र प्रवेश गर्ने प्रयास गरेका थिए। घरमा रहेकाहरुले प्रतिकार गरेर आक्रमण सुरु गरेपछि प्रदेशको टोली संकटमा परेको थियो। त्यसपछि प्रदेश प्रहरी कार्यालयले जिल्ला प्रहरी कार्यालयलाई खबर गरेको थियो।
मध्यराति गेट तोडफोड गरेर भित्र प्रवेश गर्न लागेपछि आलमका परिवारका सदस्यहरु डाका आएको भन्दै चिच्याएका थिए।
‘डाका आएको भनेर चिच्याएपछि नजिकै रहेको मस्जिदको साइरन बजाएर स्थानीयले मन्त्रीको घरमा डाका आएको भन्दै कराएका थिए। त्यसपछि ठूलो संख्यामा जम्मा भएका स्थानीयले प्रहरीलाई घेरेर ट्रयाप्पमा पारेका थिए।
स्थानीयले प्रहरीलाई डाका भनेर घेरेर ट्र्यापमा पारेपछि जोगिन प्रदेशको टोलीले २ दर्जन हवाई फायर गरेको स्रोतले नेपाल लाइभलाई जानकारी दियो। ‘दुई दर्जनभन्दा बढी हवाई फायर भएको छ। तर भन्नलाई प्रहरीले एक दर्जनमात्रै भनेको छ’ स्रोतले भन्यो।
यता प्रदेश २ का डिआइजी धिरजप्रताप सिंहले एक दर्जनमात्र हवाई फायर गरेको दाबी गरेका छन्।
प्रहरीले हवाई फायर गर्दै प्रहरी हौं भनेपछि स्थानीय शान्त भएका थिए। स्थानीयले डाका भनेर आक्रमण गर्दा दुई जना प्रहरी सामान्य घाइते भएको स्रोतले नेपाल लाइभलाई जानकारी दिएको छ।
स्थानीय प्रहरीलाई समेत कुनै जानकारी नदिई जनकपुर र बाराबाट प्रहरी लगेर रौतहटमा छापा हानेको प्रहरीले केन्द्रलाई समेत कुनै जानकारी दिएको थिएन।
‘यस्तो ठूलो अपरेशन थियो भने सम्बन्धित लोकल प्रहरीलाई जानकारी दिनुपर्ने हो। त्यहाँमाथि यति ठूलो अपरेशनमा केन्द्र प्रहरीलाई जानकारी गराउनुपर्ने हो। तर यहाँ न लोकल प्रहरीलाई जानकारी गराएको पाइयो न केन्द्र प्रहरीलाई नै’ स्रोतले भन्यो, ‘संगठनको चेन अफ कमाण्ड हुन्छ। कसैलाई जानकारी नदिई किन छापा मारियो यसबारे संगठनले आवश्यक सोधपुछ गर्छ।’
प्रदेश २ का प्रहरी प्रमुख डिआइजी धिरज प्रताप सिंहले आलमका भाइसहित तीनजना घरमा आएको सूचना आएपछि छापा मारेको दाबी गरे। तर प्रहरीले कसैलाई पनि फेला नपरेकाले सूचना गलत रहेको देखिन्छ।
एक दर्जन मान्छेलाई जिउँदै इँटा भट्टामा जलाएर मारेको आरोपमा पुर्पक्षका लागि आलम जेलमा छन्। उनी कारागारमा रहेपनि उनको भाइसहितका अन्य अभियुक्त फरार छन्।
आलमसहित उनका भाइ महताब आलम, सहयोगीहरू मोबिन आलम, शेख भदई, शेख सेराज, शेख फजलेहक, सगिर आलम, शेख मलकार, गौरीशंकर साह, बद्रि सहनी र मुक्ति साहलगायत फरार छन्। उनीहरुमध्ये तीनजना गए राति रौतहट आएको सूचना आएपछि छापा हान्न गएको प्रदेश २ प्रहरी कार्यालयको दाबी छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
.jpg)
.JPG)
