काठमाडौं- लिम्पियाधुरा, लिपुलेक र कालापानी समेटेर नेपालले जारी गरेको नयाँ नक्साको पक्ष लिँदा भारतीय मिडियाले अभिनेत्री मनिषा कोइरालाको आलोचना गरेका छन्।
नेपाल-भारत सीमा विवादमा नेपालको पक्षमा ट्विट गरेको भन्दै भारतीय सञ्चारमाध्यमदेखि ट्विटर प्रयोगकर्तासम्म अभिनेत्री कोइराला विरुद्ध खनिएका हुन्।
भारतीय टेलिभिजन च्यानल एबिपी न्युजले त उनको ट्विटलाई लिएर समाचार नै बनाएको छ। 'भारतको नुन खाएर चीनको गीत गाउने?,' एबिपी न्युजले समाचार लेखेको छ।
भारतले कब्जा गरेको लिम्पियाधुरा, लिपुलेक र कालापानी क्षेत्र समेटिएको नक्सा प्रकाशित गर्ने सरकारको निर्णयलाई स्वागत गर्दै परराष्ट्रमन्त्री प्रदीप ज्ञवालीले लेखेको ट्विटर मेन्सन गर्दै कोइरालाले लेखेकी थिइन्, ‘हाम्रो सानो राष्ट्रको गरिमा बनाइरहनु भएकोमा धन्यवाद। तीन राष्ट्रबीच शान्तिपूर्ण र सौहार्दपूर्ण वातावरणमा छलफल होस् भन्ने आशा गर्छौं।’
अभिनेत्री कोइरालाले ट्विटरमा लेखेको यही प्रतिक्रियालाई लिएर भारतीय सञ्चार माध्यम एवं ट्विटर प्रयोगकर्ताहरुले उनीविरुद्ध प्रश्न उठाएका हुन्।
मन्त्रिपरिषद्ले नेपालको नयाँ नक्सा स्वीकृत गरेसँगै कोइरालाले परराष्ट्रमन्त्री प्रदीप ज्ञवालीलाई आवश्यक कदम उठाएकोमा धन्यवाद व्यक्त गरेकी थिइन्।
नेपालको कोइराला परिवारमा जन्मिएर भारतलाई कर्मथलो बनाएकी कोइरालाले बलिउड फिल्म जगतमा लोकप्रिय नायिकाको छवि बनाएकी थिइन्। दर्जनौं सुपरहिट हिन्दी फिल्म दिएकी कोइरालाको गणना अहिले पनि अब्बल अभिनेत्रीको रुपमा हुने गर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786783779.jpg)
-1786602170.png)
