कैलाली- धनगढी उपमहानगरपालिले वितरण गरेको राहत चामलमा किरा र ढुसी भेटिएको छ। उपमहानगरपालिकाले वडा नम्बर ४ उत्तरबेहडीमा वितरण गरेको चामल कुहिएको फेला परेको जनाइएको छ। राहत दिइएको चामलमा किरा र ढुसी फेला परेपछि सोमबार उपमहानगरपालिकाले भण्डारण गरेको वडा नम्बर ४ शिवपुरीस्थित गोदाममा चेकजाँच गरेकाे थियाे।
राहतको चामल कुहिएको भेटिएपछि उपमहानगरपालिकाको अगुवाईमा सरोकारवाला निकायका प्रतिनिधिसहितको टोलीले सोमबार दिउँसो उपमहानगरपालिकाले भण्डारण गरेको गोदाममा चेकजाँच गरेकाको खाद्य प्रविधि तथा गुण नियन्त्रण कार्यालयका सूचना अधिकारी दीपक कुवँरले जानकारी दिए।
कुवँरले भने, 'राहत स्वरुप वितरण भएको चामलको गुणस्तरमाथि नै प्रश्न उठेपछि भण्डार गरिएको गोदाममा राखिएका चामलको चेकजाँच गरिएको छ।' गोदाममा राखिएका चामलका बोरा खोलेर हेर्दा केही बोरामा कुहिएको र किरा परेको चामल भेटिएको थियो।
उपमहानगरपालिकाले लकडाउनका कारण समस्या परेका मजदुर तथा विपन्न परिवारलाई राहत स्वरुप चामलसहितका सामग्री वितरण गर्दै आएको छ। उपमहानगरपालिकालाई ठाकुर एग्रो इन्डष्ट्रिजले चामल आपूर्ति गरिरहेको छ। धनगढी उपमहानगरपालिकाले अहिलेसम्म दुई करोड ६१ लाख रुपैयाँमा तीन हजार तीन सय क्विन्टल चामल तथा आठ सय क्विन्टल दाललगायतका खाद्य सामग्री आपूर्तिका लागि सो फर्मलाई ठेक्का दिएको बताइएको छ।
उपमहानगरपालिकाले खरिद गरेर वितरणका लागि वडाहरुमा पठाएको चामल कुहिएको र किरा परेको भेटिएपछि आक्रोशित स्थानीयले चामल फिर्ता गरेका छन्। उपमहानगरपालिका वडा नम्बर ४ मा आइतबार र सोमबार वितरण गरेको चामल कुहिएको फेला परेको हो। वडा नम्बर ४ की सीता थापाले वडा कार्यालयबाट राहतमा प्राप्त चामल कुहिएको भेटिएपछि वडा कार्यालयमै फिर्ता गरेको बताइन्।
राहत वितरणका लागि प्याक गरिएको चामलका बोरामा बाहिर कुनै छाप र उत्पादन मिति पनि उल्लेख छैन। चामलमा सेता रंगका किराहरु भेटिएको धनगढी उपमहानगरपालिका वडा नम्बर ४ का वडाध्यक्ष दीपकबहादुर थापाले पनि पुष्टि गरे। वडाध्यक्ष थापाका अनुसार उपमहानगरपालिकाले दिएको टोकनका आधारमा सो मिलबाट चामल ल्याएर मजदुर तथा विपन्न परिवारलाई वितरण गरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789631269.jpg)
-1786602170.png)
