काठमाडौं- लकडाउनका कारण रोकिएको काठमाडौं उपत्यकाका विभिन्न आयोजनाहरुको काम सुचारु हुने भएको छ। सहरी विकास राज्यमन्त्री रामवीर मानन्धरले उपत्यकाभित्रका विभिन्न विकासे आयोजना सञ्चालनका लागि स्थानीय प्रशासनसँग अनुमति लिइएको जानकारी दिए।
बुधबार चमति जग्गा एकीकरण विकास आयोजनाको निरन्तरताका लागि निर्माण सामग्री आयात र सञ्चालनका लागि अनुमति पत्र हस्तान्तरण गर्दै राज्यमन्त्री मानन्धरले तोकिएको समयभित्र आयोजना सम्पन्न गर्न ठेकेदार कम्पनीलाई निर्देशन दिए। उक्त आयोजना २०५९ देखि सुरु भए पनि हालसम्म निर्माणाधीन अवस्थामै रहेपछि सरकारले चासो दिन थालेको हो।
कार्यक्रममा चमति एकीकृत आयोजनाका ठेकेदार दावा लामाले तोकिएको मितिमै आयोजना समापन गर्ने प्रतिबद्वता जनाए।
राज्यमन्त्री मानन्धरले लकडाउनका समयमा पनि सामाजिक दूरी कायम गर्दै विकास आयोजना सञ्चालन गर्नुको विकल्प नरहेको बताउँदै कोरोना महामारीसँग जुध्दै विकासलाई पनि निरन्तरता दिइने जानकारी गराए। कोरोना महामारी नियन्त्रणका लागि सरकारले चालेका कदम सार्थक बनिरहेको बताउँदै राज्यमन्त्री मानन्धरले अब बिकासका गतिविधिलाई पनि तिब्रता दिइने बताए।
मानन्धरले बेरोजगार बनेका श्रमिकहरुलाई काम दिन सकिए आर्थिक गतिविधि पनि चलायमान हुने बताए। आगामि आर्थिक वर्षको बजेटमा कोरोना भाइरसको प्रभाव देखिए पनि विकास आयोजनाहरुको बजेट व्यवस्थापनमा कुनै समस्या नहुने मानन्धरको तर्क छ। सहरी विकास मन्त्रालयमार्फत् आगामी वर्ष कम्तीमा एक लाख विपन्न परिवारको घरमा लगाइएको फुसको छानो विस्थापन गराइने मानन्धरले जानकारी दिए। उनले फुस र खरको छानो हटाएर जस्तापाताको छानो राखिने जानकारी दिए।
यस्तै १६५ वटै निर्वाचन क्षेत्रका सहरी क्षेत्रको स्तर उन्नतिका लागि चक्रपथको परिकल्पना गरिएको मानन्धरले जानकारी दिए। उपत्यकालाई बाहिरी जिल्लाबाट घेर्नेगरी प्रस्तावित टोखा-छहरे सुरुङमार्गदेखि निर्माणाधीन नौविसे सुरुङमार्गसम्म वैकल्पिक चक्रपथसहितको नयाँ सहर बनाउने तयारीमा मन्त्रालय रहेको छ।
दुबै सुरुङ मार्गको मुखमा तथा फुट्रयाकको शून्य विन्दुमा सुख्खा बन्दरगाह निर्माणबारे पनि छलफल चलिरहेको मन्त्री मानन्धरले जानकारी दिए।
सहरी विकास मन्त्रालयले बन्चरेडाँडा स्यानेटरी ल्याण्डफिलकाे कामलाई पनि निरन्तरता दिने भएको छ। त्यसका लागि आवश्यक सबै प्रबन्ध मिलाईएको छ। यस्तै बालाजु बाईपास क्षेत्रको सडकहरु विस्तारको कामलाई पनि तिब्रता दिईएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1763721444.png)
