कैलाली : गहुँ खरीद सुरु, लक्ष्य अनुसार संकलनमा आशंका

कृषि

शेरबहादुर ऐर बुधबार, वैशाख २४, २०७७ ०८:१५

धनगढी–खाद्य व्यवस्था तथा व्यापार कम्पनी धनगढीले सोमबारदेखि गहुँ खरीद सुरु गरेको छ। कम्पनीले कैलालीका तीन स्थानमा खरीद केन्द्र स्थापना गरि गहुँ खरीद शुरु गरेको जनाएको छ।

कम्पनीका धनगढी कार्यालय प्रमुख अनिलकुमार श्रेष्ठले आइतबारदेखि नै गहुँ खरीद गर्ने निर्णय गरिएको भए पनि सोमबारदेखि मात्र सुरु गरिएको बताए।

उनले केन्द्र तीन वटा स्थान तोकिए पनि अहिले टीकापुरबाट मात्र खरीद भइरहेको बताए। कम्पनीले धनगढीको मोहनपुर, टीकापुर र सत्तीमा काँटा राखेर गहुँ खरीद गरिने जनाएको छ। कम्पनीका धनगढी कार्यालय प्रमुख श्रेष्ठले सोमबार चार सय १७ क्विन्टल ५० किलो खरीद गरिएको जानकारी दिए। मगलबार दुई सय ५० क्विन्टल गहुँ खरीद गरिएको छ। उनले यस वर्ष कम्पनीले १० हजार क्विन्टल गहुँ खरीद गर्ने लक्ष्य लिएको बताए।

खाद्य व्यवस्था तथा व्यापार कम्पनीले हरेक वर्ष गहुँ खरीद गर्दै आएको छ । कम्पनीले गत वर्ष कैलालीमा चार हजार एक सय क्विण्टल गहुँ खरीद गर्ने लक्ष्य लिएको थियो। कम्पनीका प्रमुख श्रेष्ठका अनुसार गत वर्ष कैलालीमा दुई हजार चार सय क्विन्टल गहुँ खरीद गरिएको थियो ।

उनले यस वर्ष पनि लक्ष्य अनुसारको गहुँ खरीद गर्न सकिनेमा आशंका व्यक्त गरे। उनले भने, ‘बजार भाउ नबढेमा हामीले लक्ष्यभन्दा पनि बढी गहुँ खरीद गर्नेछौं।’ उनले तोकिएको लक्ष्यभन्दा बढी खरीद गर्नुपरेमा कोटा थप गरिने बताए। किसानबाट सरकारले निर्धारण गरेको ३ हजार १५ रुपैयाँ प्रति क्विन्टलमा गहुँ खरीद गर्न लागेको जानकारी दिए।

सरकारले झण्डै दुई हप्ताअघि गहुँ मूल्य निर्धारण गरेको थियो। सरकारले मूल्य निर्धारण गरे पनि किसानहरू भने लकडाउनका कारण गहुँ घरमै थन्काउन तथा सस्तो मूल्यमा विक्री गर्न बाध्य भएका छन्। किसानले व्यापारीलाई दुई हजार आठदेखि दुई हजार नौ सय प्रति क्विन्टलमा बिक्री गर्नु परिरहेको गुनासो गरेका छन्।

कम्पनीका धनगढी कार्यालय प्रमुख श्रेष्ठले खरीदकर्ता र बिक्री गर्ने किसानले सामाजिक दूरी र मास्क प्रयोग अनिवार्य गरिएको बताए ।
कृषि ज्ञान केन्द्रका हरि जोशीका अनुसार कैलालीमा ३४ हजार ५ हेक्टर क्षेत्रफलमा एक लाख सात हजार मेट्रिक टन गहुँ उत्पादन भएको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।