काठमाडौं- कालोबजारी गरेको आरोपमा पक्राउ परेका शंकर ग्रुप तथा जगदम्बा स्टिलका सञ्चालक सुलभ अग्रवालले गल्ती स्वीकार गर्दै गर्न नहुने काम गर्न पुगेको बयान दिएका छन्। मंगलबार दिउँसो करिब २४ सय पर्ने थर्मल गन कालोबजारी गरेर १५ हजारमा बेच्न लाग्दा पक्राउ परेका अग्रवालले सुरुमा आफ्नै स्टाफका लागि सामान ल्याएको र कालोबजारी नगरेको दाबी गरेका थिए।
महानगरीय प्रहरी वृत्त दरबारमार्गको हिरासतमा रहेका अग्रवालले बिहीबार भने आफ्नो गल्ती स्वीकार गरेका छन्। दरबारमार्ग प्रहरी स्रोतले नेपाल लाइभसँग अग्रवालको भनाइ उदृत गर्दै भन्यो, ‘म अर्बपति मान्छे। जाबो १० हजारमा लोभिएँ। मति बिग्रियो। दशा लाग्यो सर।’
दिउँसो दरबारमार्ग वृत्तमा सुलभका बाबुसमेत उनलाई भेट्न गएका थिए। बाबुले समेत ८/१० लाखको मतलब नगर्ने मान्छे। दसा लागेर के गर्न पुगेछ भन्दै बिलौना गरेर फर्किएका थिए।
महानगरीय प्रहरी अपराध महाशाखाको टोलीले अग्रवाललाई आफैं ग्राहक बनेर थर्मल गन अर्डर गरेर किन्न पुगेको थियो। अग्रवाल कूटनीतिक नियोगको २०९ एचसिसी १ नम्बरको गाडीमा थर्मलगन राखेर बेच्न नक्साल पुगेका थिए। त्यही बेला प्रहरीले उनलाई पक्राउ गरेको हो।
त्यसरात महानगरीय प्रहरी वृत्त दरबारमार्गको हिरासतमा राखिएका उनी बिरामीको नाटक गर्दै अस्पताल भर्ना हुने दाउमा थिए। सोहीअनुसार उनले छाती दुख्यो भन्दै कराउन थालेपछि प्रहरीले उनलाई वीर अस्पताल पुर्याएको थियो। प्रहरीले वीर अस्पताल पुर्याएपछि जाँचमा सबै रिपोर्ट नर्मल देखिएपछि उनलाई पुनः फर्काएर हिरासतमै राखिएको थियो।
बुधबार कालोबजारीको कसुरमा जिल्ला प्रशासन कार्यालय काठमाडौंले एक हप्ता हिरासतमै राखेर अनुसन्धान गर्न अनुमति दिएपछि उनलाई पुन फर्काएर दरबारमार्गकै हिरासतमा राखिएको छ। यद्यपि, उनी भने अझै बिरामी भएको बताउँदै प्रहरीलाई अस्पताल लैजान आग्रह गरिरहेको स्रोतले जानकारी दियो। त्यसैगरी, केही व्यापारीले प्रहरीलाई फोन गरेर अस्पताल भर्ना हुने वातारण मिलाइदिन आग्रह गरेका थिए।
‘अहिलेसम्म कुनै उच्च ओहदाका नेताहरुको छोड्नु पर्यो, अस्पताल भर्ना गर्नुपर्यो भन्दै फोन आएको छैन। केही व्यापारी भने अझै फोन गरेर दबाब दिने गरेका छन्,’ स्रोतले भन्यो।
अग्रवाल पक्राउ परेसँगै प्रहरीले उनले ल्याएका २० हजार थर्मल गनमध्ये अरुको पनि खोजी सुरु गरेको छ। प्रहरीले उनको बालुवाटारस्थित घर र नक्साल प्रहरी प्रधान कार्यालय अगाडिको उनको अफिसमा समेत छापा हानेको थियो। तर रित्तो हात फर्कनु परेको थियो। अन्य थर्मलगनबारे प्रहरीले आज पनि अग्रवालसँग सोधपुछ गरेको थियो। तर उनले भने प्रहरीसमक्ष न्यूरोडमै १ सय ५० थान किनेको र अरु पहिल्यै बेचिसकेको भन्दै झुटो बयान दिएका छन्।
अग्रवालले ती थर्मलगन चीनको गोन्जाउबाट चैत २१ गते ल्याएका थिए। अग्रवालको कम्पनीले चीनबाट सेटिङमा आफ्नो मात्रै सामान ल्याएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1782563266.png)
-1764146706.png)
