कोरोनाका कारण मृत्यु हुनेको स्मृतिमा चीनमा मौनधारण

कोरोना अपडेट

नेपाल लाइभ शनिबार, चैत २२, २०७६ १३:५९

तस्बिर सिन्ह्वा

वेइजिङ- चीनमा कोरोना भाइरसका कारण मृत्यु भएकाहरुको सम्झनामा शनिबार बिहान मौनधारण गरिएको छ। स्थानीय समयानुसार बिहान १० बजेदेखि ३ मिनेटसम्म मौनधारण गरिएको थियो।

मौनधारण कार्यक्रममा राष्ट्रपति सि जिनफिङलगायतका विशिष्ट व्यक्तिहरु पनि सहभागी थिए। मौनधारणमा सहभागीहरुले मृतकको सम्मान र सम्झना गरेको अधिकारीहरुले जनाएका छन्। मौनधारणका बेला सबै सवारी साधनहरु जहाँको तहिँ रोकिएका थिए भने, राष्ट्रिय झण्डा झुकाइएको थियो।

मौनधारण कार्यक्रम चीन बाहिर रहेका कुटनीतिक निकायहरुमा समेत गरिएको थियो। यस कार्यक्रममा करौडौ व्यक्ति सहभागी रहेको समाचारमा जनाइएको छ।

गत डिसेम्बर महिनाको अन्त्यमा चीनको हुबे प्रान्तको उहान सहरबाट सुरु भएको कोरोना भाइरसको सङ्क्रमणबाट चीनमा ३ हजार ३२६ व्यक्तिको मृत्यु भईसकेको छ। यस भाइरसको कारण ८१ हजारभन्दा बढी व्यक्ति अझै पनि सङ्क्रमित रहेका छन्।

कोरोना भाइरसको सङ्क्रमणबाट चीनमा १४ जना स्वास्थ्यकर्मीले पनि ज्यान गुमाएका छन्। श्वासप्रश्वास सम्बन्धी समस्या निम्त्याउने नौलो संक्रमण फैलिएको पत्ता लगाउने चिकिसक लि बेन्लियाङको पनि सोही संक्रमणका कारण मृत्यु भएको थियो।