काठमाडौ– संसदको सार्वजनिक लेखा समितिले आफ्ना १२ सदस्यको चरित्र हत्या गरेको भन्दै दुई जनाविरुद्ध प्रहरी प्रधान कार्यालयमा साइबर अपराधअन्तर्गत उजुरी दर्ता गराएको छ।
समितिका सचिव डा। रोजनाथ पाण्डेका अनुसार विजयप्रकाश मिश्र र प्रभातकिशोर उपाध्यायविरुद्ध आइतबार उजुरी दर्ता गराइएको हो।
समिति सदस्यहरूको अनलाइन मिडिया तथा सामाजिक सञ्जालमा नामसहित तस्बिर राखेर भ्रम फैलाउँदै चरित्र हत्या गरिएको दाबी उजुरीमा गरिएको छ।
यसरी गलत भ्रम फैलाउनेविरुद्ध साइबर अपराधअन्तर्गत उजुरी दर्ता गरी आवश्यक कारबाही गर्न भनिएको डा। पाण्डेले बताए। ‘उजुरीमाथि कारबाही गरी त्यसबारे यथासक्य चाँडो प्रतिवेदन बनाएर समितिमा पेश गर्न निर्देशन दिइएको छ,’ उनले भने।
मिश्रले सुरक्षण मुद्रण मेसिन खरिदको विषयमा आफू र निवर्तमान सञ्चार तथा सूचना प्रविधिमन्त्री गोकुल बाँस्कोटाबीच भएको अडियो सार्वजनिक गरेका थिए। उक्त अडियोमा बाँस्कोटाले ७० लाख डिल गरेको खुलेपछि पदवाट राजीनामा दिएका थिए।
उपाध्यायप्रति भने सामाजिक सञ्जाल फेसबुकमा १२ सदस्यहरूको नामसहितको तस्बिर पोष्ट गरेको अभियोग छ।
उनले कांग्रेस सांसदहरू मिना सुब्बा, डा. मिनेन्द्र रिजाल, मोहन आचार्य, नेकपा सांसदहरू मैनाकुमारी भण्डारी, रघुवीर महासेठ, विनादेवी बुढाथोकी, विरोध खतिवडा, विशाल भट्टराई, सूर्यप्रसाद पाठक, यज्ञबहादुर बोगटी, समाजवादी पार्टीका सांसद मोहम्मद ईश्तियाक राई र राजपा सांसद शरदसिंह भण्डारीको नामसहितको तस्बिर राखेर ‘४ अर्ब भाग परेका लेखा समितिका बाँस्कोटालगायत अन्य माननीयहरू’ भन्दै पोष्ट गरेका थिए।
काठमाडौ जिल्ला अदालतमा दर्ता हुने मुद्दामा दोषी ठहर भएमा जरिवाना र जेल सजाय हुने छ। सामाजिक सञ्जालमा चरित्र हत्या गरेमा प्रहरीले साइवर क्राइममा मुद्दा दायर गर्ने गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791645793.png)
-1786602170.png)
