काठमाडौ- काठमाडौ जिल्ला अदालतको इजलास नम्बर १४ । समय मध्यान्ह १२ बजे। दैनिक बहस हुने जिल्ला अदालतको यो इजलासमा होहल्ला भइरहेको थियो। जिल्ला न्यायाधीश श्रीकृष्ण भट्टराई वरिष्ठ अधिवक्ता रामजी बिष्टलाई शान्त हुन आग्रह गरिरहेका थिए।
तर विष्ट एकपछि अर्को गाली न्यायाधीशलाई गरिरहेका थिए। एक अंशबण्डा मुद्दामा बहस गर्न उत्रेका उनी विषायान्तर भई न्यायाधीशहरुका बारेमा बहस गर्न थाले। उनी भनिरहेका थिए- न्यायाधीशहरुले मुद्दा नै बुझ्दैनन्, मुद्दाको ग्राभिटी र तथ्य नै नहेरी फैसला सुनाउने गरेका छन्।’
अंशबण्डा मुद्दा तामेलीमा राख्न उनले गरेको माग इजलासले अस्वीकार गरेलगत्तै उनी तथ्यमा बहस गर्नुभन्दा न्यायाधीशलाई गाली बर्साउन थाले। लगत्तै न्यायाधीश भट्टराईले भने, ‘वरिष्ठज्यू तथ्यमा प्रवेश गरेर बहस गर्नुस्, इजलासमा न्यायाधीशको बारेमा बहस नगरौं।’
उनको उत्तर सुनेलगत्तै बिष्ट झन् चर्को स्वरमा अदालत र न्यायाधीशका बारेमा बहस गर्न थाले। वरिष्ठ अधिवक्ताले यसरी बहस गर्न हुँदैन भनेर न्यायाधीशले फेरि सम्झाए। तर उनी सुन्ने अवस्थामा थिएनन्। उनले भने– ‘कसरी बहस गर्ने म यत्रो वर्षदेखि बहस गर्दै आइरहेको छु मलाई थाहा छ।’
जिल्लादेखि उच्चसम्म सबै उस्तै न्यायाधीश भएकाले मुद्दाको तथ्यमा प्रवेश नभई आदेश आउने गरेको आरोप उनले लगाए। उनले लगातार यसरी बहस गरेपछि न्यायाधीश भट्टराईले सुरक्षाकर्मीलाई बोलाए। लगत्तै जिल्ला अदालतका श्रेस्तेदार आनन्द श्रेष्ठलाई बोलाउन पठाए। इजलासमै वरिष्ठ अधिवक्ता र न्यायाधीशबीच मुद्दाभन्दा बाहिर गएर बहस हुन थालेपछि इजलासको वातावरण तनावपूर्ण देखियो।
जिल्ला अदालतको चौथो तल्लामा थापाथलीमा घर भएका विभवगोपाल श्रेष्ठविरुद्ध कमलादेवी श्रेष्ठको मुद्दाको बहसका क्रममा यस्तो विवाद भएको हो ।
विवादको चुरो बाबुले छोराको विद्यालयमा तिर्ने १ लाख शुल्क
यसरी इजलाससम्म विवादमा आउने विषय थियो विभव श्रेष्ठको छोराको विद्यालयको शुल्क। श्रीमती कमलादेवी श्रेष्ठले माना चामल र अंश माग गर्दै २०७६ साउन ९ गते जिल्ला अदालतमा मुद्दा दायर गरिन्। उनको मुद्दामा छोराको विद्यालयको शुल्क एक वर्षदेखि नबुझाएको पाएपछि अदालतले उक्त शुल्क बाबु विभवलाई तिराउने आदेश दियो । जिल्ला अदालतको आदेशविरुद्ध बाबु उच्च अदालत पाटन हुदै सर्वोच्चसम्म पुगे।
उच्च र सर्वोच्चले जिल्लाको आदेश नै सदर गरिदियो। जिल्लाको आदेश सदर गरेपछि उनीहरु पुन रिटको क्षेत्राधिकारअन्र्तगत सर्वोच्च पुगे। सर्वोच्च अदालतले पनि अन्तरिम आदेश जारी गरेन। सर्वोच्चवाट आफूअनुकूल आदेश जारी नभएपछि वरिष्ठ अधिवक्ताले आफ्नो पक्षको एक लाख बचाउन जिल्ला अदालतमा इजलासको डेकोरोम नै बेवास्ता गर्दै आइतवार बहस गरे। लगत्तै जिल्ला न्यायाधीशले इजलासबाट प्रहरी लगाएर निकाल्ने धम्की दिएपछि उनले इजलाससमक्ष गल्ती भएको महसुस गर्दै माफी पनि मागे।
माफी मागेपछि एक पटकका लागि भन्दै जिल्ला न्यायाधीशले उनलाई सम्झाएर पठाए। श्रीमानसँग सम्बन्ध कायम हुन नसक्ने भएपछि आफ्नो अंश माग गर्दै कमलाले जिल्ला अदालतमा मुद्दा दायर गरेकी थिइन्। अलग्गै बस्ने र छोराको पनि रेखदेख गर्ने भन्दै उनले मुद्दा दायर गरेकी थिइन्। घरमा अलग्गै बस्ने कुरा गरेदेखि नै बाबु विभवले छोराको विद्यालय शुल्क बुझाएनन्। तीन कक्षामा पढ्ने छोराको २०७५ पुस देखि २०७६ माघ महिनासम्मको फि विभवले तिरेका थिएनन्। यसअघि सधै उनलै बुझाउने गरेपनि एक वर्षदेखि फि नआएको जानकारी विद्यालयले जिल्ला अदालतलाई गराएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
