काठमाडौं- जोरपाटी अत्तरखेलस्थित नेपाल मेडिकल कलेजको शिक्षण अस्पतालको शल्यकक्षमा संक्रमण फैलिएको छ। आइतबार र सोमबार शल्यक्रिया गरिएका तीन जना बिरामीमा एकै खालको संक्रमण देखिएपछि अस्पतालले शल्यकक्ष नै बन्द गरेको छ।
शल्यक्रिया गरेका तीन जना बिरामीमा संक्रमण फैलिएपछि उनीहरुको थप उपचार भइरहेको अस्पताल स्रोतले जानकारी दिएको छ। तीनजनामध्ये एक जनाको अवस्था गम्भिर रहेको छ। दुई जनाको सोही अस्पतालमा र गम्भिर रहेका बिरामीलाई थप उपचारका लागि मेडिसिटी अस्पतालमा रेफर गरिएको अस्पतालका एक कर्मचारीले जानकारी दिए।
अस्पतालले शल्यकक्षलाई संक्रमणमुक्त बनाउन अपनाउनु पर्ने सावधानी नगर्दा संक्रमण फैलिएको ती कर्मचारीले जानकारी दिए। ‘शल्यकक्षलाई संक्रमणमुक्त बनाउन समयसमयमा गर्नुपर्ने सरसफई र निर्मलीकरणको काम राम्रो नहुँदा अहिले समस्या आएको हो,’ ती कर्मचारीले भने।
अस्पताल प्रशासनले भने शल्यकक्षमा नभई स्लाइन, औषधि वा अन्य कुनै सामग्रीका कारण संक्रमण फैलिएको आशंका गरेको छ। संक्रमणको कारण पत्ता लगाउन अस्पतालले शल्यकक्षका सामग्रीको प्रयोगशाला परीक्षणका लागि पठाएको छ।
तीनजना बिरामीमा एकै प्रकारको संक्रमण देखिएपछि अस्पतालले आगामी आइतबारसम्मका लागि शल्यकक्ष नै बन्द गरेको छ।
अस्पतालमा आइतबार १५ जनाको शल्यक्रिया भएको थियो भने सोमबार १२ जनाको। तीमध्ये आइतबार १ जनामा र सोमबार २ जनामा एकै खालको संक्रमण देखिएको हो। शल्यक्रिया गरिएका बिरामीमा सुरुमा पिसाब रोकिने समस्या देखिएको थियो। त्यसपछि आवश्यक जाँच गर्दा संक्रमण देखिएको थियो। तीन जनामा एकै खालको संक्रमण देखिएपछि प्रशासनले शल्यकक्ष नै बन्द गर्ने निर्णय गरेको ती कर्मचारीले जानकारी दिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
