काठमाडौं- संस्कृति, पर्यटन तथा नागरिक उड्डयनमन्त्री योगेश भट्टराईले कार्यालय प्रमुखहरुको काम प्रभावकारी नभए परिवर्तन गर्न सक्ने बताएका छन्।
बुधबार नेपाल पर्यटन बोर्ड भृकुटीमण्डपमा बसको मन्त्रालयस्तरीय बैठकमा मातहतका विभागहरुको कामप्रति असन्तुष्टि जनाउँदै प्रत्येक कार्यालय प्रमुखलाई प्रभावकारी काम गर्न निर्देशन दिए।
उनले लक्ष्य अनुरुप काम नभए स्पष्टीकरण सोधिने र सन्तोषजनक प्रगति नभए कार्यालय प्रमुखहरु परिवर्तन गर्ने बताए।
‘काम भएन भने परिर्वतन गरिनेछ, परिवर्तन हुनेले मन नदुखाउनुहोला,’ मन्त्रीलाई उद्धृत गर्दै बैठकमा सहभागी एक कर्मचारीले भने, 'राजनीतिक नियुक्ती लिएर विभिन्न पदमा रहेर सन्तोषजनक काम नगरेकाले तत्काल बाटो खाली गर्नुपर्छ।'
खाली नगरे काम मूल्यांकनका आधारमा हटाइनेसमेत मन्त्रीले बताएका थिए।
‘कामको आधारमा हटाउँदा अदालत गएर नरुनुहोला’ मन्त्रीले भन्नुभएको छ,' ती कर्मचारीले भने, 'राम्रो काम गर्ने कर्मचारीलाई प्रोत्साहन गरिने बताउनुभयो। प्रोत्साहन स्वरुप थप सुबिधा दिने जानकारी गराउनु भयो।'
बुधबार प्रस्तुत भएको कार्यप्रगति विवरण काम चलाउ मात्रै भएको टिप्पणी गर्दै आगमी २०७६ मंसिर १ र १२ गते बस्ने बैठकमा पुन: प्रस्तुत गर्न निर्देशन दिए।
भ्रमण वर्ष सफल बनाउन मन्त्रालय मातहतका कार्यालयहरुले के के गर्ने? त्यो कार्ययोजना आगमी २०७६ मंसिर ११ र १२ गते प्रस्तुत गर्न निर्देशन दिए।
काम नगर्ने र विवादित कर्मचारीलाई विदेश भ्रमणमा रोक समेत लगाइने उनले बैठकमा बताएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772284174.png)
-1764146706.png)
-1772271039.png)
