काठमाडौं- इंग्ल्यान्डको मेरिलेबोन क्रिकेट क्लब (एमसिसी) सँगको प्रथम श्रेणी क्रिकेट अन्तर्गत तीन दिवसीय खेलमा दोस्रो दिनको खेल सकिँदा नेपाल ३ सय २ रनले पछि परेको छ।
दोस्रो दिन बिहान एमसिसीलाई ३ सय ६४ रनमा अलआउट गरेको नेपालले आफ्नो पहिलो इनिङमा १ सय ५३ रन मात्रै बनाउन सकेको थियो। नेपाललाई अलआउट गरेपछि एमसिसीले दोस्रो इनिङमा २१ ओभर खेलेर २ विकेट जाँदा ९१ रन जोडेको हो।
दोस्रो इनिङमा एमसिसीका विल रोड्सले २२, विली गोल्डम्यानले ३९ रन बनाए। टम विस्ट्ली १७ र माइल्स हामोन्ड ३ रन बनाएर खेलिरहेका छन्। नेपालका ललित राजबंशी र पवन सर्राफले एक–एक विकेट लिए।
दोस्रो दिन नै आफ्नो पहिलो इनिङमा ४४.४ ओभर खेलेर नेपालले १ सय ५३ रन मात्रै बनाएको हो।
नेपालका लागि ओपनिङ ब्याटिङमा कप्तान ज्ञानेन्द्र मल्ल र राजु रिजाल आएका थिए। ज्ञानेन्द्र डकआउट भए भने राजु ८ रन बनाएर आउट भए। सुरुवातमा नै धरमराएको ब्याटिङ पछिसम्म सम्हालिन सकेन।
तेस्रो क्रममा ब्याटिङमा आएका शरद भेषावकर ४ रनमै आउट भए। दिपेन्द्र सिंह ऐरी १ रनमा, आरिफ शेख १०, बिनोद भण्डारी ३६, पवन सर्राफ २ र सोमपाल कामी २६ रनमा आउट भए। यस्तै करण केसी डकआउट भए।
नेपालका लागि सर्वाधिक रन बनाएका सन्दीप लामिछानेले अविजित ३८ रन बनाए। उनले एलेक्स थोम्पसनको ओभरमा लगातार तीन छक्कासमेत लगाएका थिए।
नेपालले प्रथम श्रेणी क्रिकेटको इतिहासमा एमसिसीविरुद्धको १ सय ५३ रन नै पहिलो इनिङमा अलआउट हुँदाको सबैभन्दा कम रन हो।
एमसिसीले आफ्नो पहिलो इनिङमा ३ सय ६४ रन बनाएको थियो। बुधबार पहिलो दिनको खेल सकिँदा ६ विकेटको क्षतिमा ३ सय ११ रन बनाएको एमसिसीले बिहीबार बिहान ४ विकेट गुमाएर ५३ रन जोडेको थियो।
नेपालका लागि करण केसी र सन्दीप लामिछानेले तीन–तीन साथै सोमपाल कामी र शरद भेषावकरले दुई–दुई विकेट लिए। पहिलो दिन बलियो अवस्थामा रहेको एमसिसीलाई दोस्रो दिनको बिहानी शत्रमा नेपाली बलरहरुले दबाबमा राख्न सकेका थिए।
......
१४ वर्षपछि प्रथम श्रेणी क्रिकेटमा फर्किएको नेपालले त्रिवि क्रिकेट मैदान कीर्तिपुरमा टस जितेर फिल्डिङ रोजेको थियो।
नेपालले पहिलो दिनको खेल सकिँदा एमसिसीको ६ विकेट लिएको थियो। ८६ ओभरको खेल सकिँदा खराब प्रकाशका कारण अम्पायरले पहिलो दिनको खेल सकिएको घोषणा गरेका हुन्।
एमसिसीका विल भ्यान्डर्सपरले ५३ रन बनाए। यस्तै एड योङले १५, माइल्स ह्यामन्डले ५२, टम वेस्ट्लीले ३९, विल रोड्सले ७३ र बिली गोल्डम्यानले १० रन बनाए।
यसअघि नेपालले सन् २००५ मा युएईविरुद्ध प्रथम श्रेणी क्रिकेटमा प्रतिस्पर्धा गरेको थियो। त्यसबेला टोलीमा रहेका शरद भेषावकर मात्रै अहिले कीर्तिपुर मैदानमा एमसिसीसँग खेलिरहेको टोलीमा समावेश छन्।
शरदबाहेक १० जना खेलाडीको एमसिसीविरुद्ध चलिरहेको खेल नै राष्ट्रिय टिमबाट प्रथम श्रेणीमा डेब्यू खेल हो। यसअघि नेपालले २००४ र २००५ मा खेलेका चार प्रथम श्रेणी खेलमा शरद टोलीमा थिए।
नेपाली टोलीमा रहेका सोमपाल कामीसँग भने प्रथम श्रेणी क्रिकेटको अनुभव छ। उनले सन् २०१५–०१६ मा श्रीलंकामा क्लब क्रिकेट खेल्दा सारकेन्स स्पोर्टस क्लबबाट दुई प्रथम श्रेणी खेल खेलेका थिए। त्यसमा २६ ओभर बलिङ गरेका उनले ३ विकेट पनि लिएका थिए। एमसिसीसँग सोमबार भएको एकदिवसीय खेलमा टिमबाहिर रहेका उनलाई प्रथम श्रेणीमा समावेश गरिएको हो।
शरद र सोमपालसँगै टोलीमा कप्तान ज्ञानेन्द्र मल्ल, दिपेन्द्र ऐरी, आरिफ शेख, पवन सर्राफ, बिनोद भण्डारी, करण केसी, ललित राजबंशी, राजु रिजाल र सन्दीप लामिछाने रहेका छन्।
पूर्वकप्तान पारस खड्कासँग प्रथम श्रेणी क्रिकेटमा दुई खेलको अनुभव भए पनि उनी अहिले टोलीमा समावेश छैनन्। सोमबार एमसिसीविरुद्धको एकदिवसीय खेलमा पनि पारस टोलीमा थिएनन्।
यसअघि २००९ मा एमसिसीसँगै नेपालले तीन दिवसीय खेल खेलेको भए पनि त्यसलाई प्रथम श्रेणीको मान्यता दिइएको थिएन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
