काठमाडौं- नेत्र विक्रम चन्द विप्लव नेतृत्वको नेपाल कम्युनिस्ट पार्टीले सर्तसहित सरकारसँगको वार्ता गर्न सकिने बताएको छ।
पार्टीको आठौं पूर्ण बैठकपछि जारी विज्ञप्तिमा वार्ताबारे सर्त अघि सारिएको हो।
‘सरकारले आफ्नो फासिवादी दमनलाई ढाकछोप गर्न ‘वार्ता’ को हतियार प्रयोग गरिरहेका सन्दर्भमा पार्टीले षडयन्त्रपूर्ण वार्ता प्रचारलाई भण्डाफोर गर्ने तर इमानदारीका साथ आएर प्रतिबन्ध हटाएर गिरफ्तार कमरेडहरुलाई छोडेर निःसर्त आएमा सकारात्मक रुपले सोच्ने निर्णय लिएको छ’, बैठकपछि जारी विज्ञप्तिमा भनिएको छ।
विप्लवको ‘आफैंलाई रुपान्तरण गर्दै पार्टीलाई शुद्धीकरण गरौं, फासीवादको प्रतिरोध गर्दै एकीकृत जनक्रान्तिलाई नयाँ उचाइमा उठाऔं’ नामक राजनीतिक प्रस्ताव सुझावसहित एकमतले पारित गरिएको छ।
बैठकले केन्द्रीय सदस्य गुणराज लोहनीलाई बिदाइ गरेको छ। ‘स्वास्थ्य समस्याका कारण पार्टीको केन्द्रीय समितिमा रहेर काम गर्न कठिनाइ भएकाले आफ्नो अवस्थाले दिएअनुसार देश र जनताका लागि काम गर्न सक्ने अनुमति दिँदै कमरेड गुणराज लोहनीलाई केन्द्रीय समितिको जिम्मेवारीबाट बिदाइ दिइयो’, विज्ञप्तिमा भनिएको छ।
बैठकले ‘चन्दा अभियान’ सञ्चालन गर्ने निर्णय पनि गरेको छ। ‘केपी सरकारले हाम्रो पार्टीलाई आर्थिक ‘नाकाबन्दी र दमन’ गर्ने नीति लिएको सन्दर्भमा पार्टीले व्यापक भण्डाफोर गर्दै मैत्रीपूर्ण तरिकाले आम नागरिकबाट स्वेच्छिक आर्थिक सहयोगका लागि चारमहिने आर्थिक अभियान सञ्चालन गर्ने साथै पार्टीका आर्थिक कार्यहरु अगाडि बढाउने निर्णय गरिएको छ’, विज्ञप्तिमा भनिएको छ।
उनले आउँदो मंसिर ८ गते नेपाल कम्युनिस्ट पार्टी पुनर्गठन दिवस भव्यतापूर्वक मनाउने निर्णय पनि गरेको छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।