फिचर

बेगनासको वेगवान सुन्दरता

किशोर दहाल शनिबार, कात्तिक २, २०७६ १५:३०

पोखरा- न डुंगा चढ्नेहरुको भीडभाड, न त सेल्फी खिच्नेहरुको चहलपहल। बेगनास तालको किनारमा उस्तो भीड प्रायः देखिँदैन।

पोखरा भ्रमणमा आउनेहरुको प्रमुख गन्तव्य मध्येको एउटा बेगनास ताल मुख्य सहरबाट बाहिर छ। तत्कालीन लेखनाथ नगरपालिकामा पर्ने यो ताल आइपुग्न पोखराको मुख्य क्षेत्रबाट सार्वजनिक वा निजी गाडी तथा ट्याक्सी विकल्प हुनसक्छन्।

चर्चाको आधारमा भन्ने हो भने पोखरा भ्रमणमा आउनेहरुले बस्न र दृश्यावलोकन गर्न नछुटाउने प्रमुख तालचाहिँ फेवा ताल नै हो। मुख्य सहरसँगै जोडिनु, तालबाराही मन्दिर सो तालभित्रै हुनु, पर्यटकहरु बस्ने सहज सुविधा पनि आसपासमै हुनुको कारण फेवा तालको चर्चा बढी सुनिन्छ।

तर, बेगनास त्यसको ठीक विपरित छ। यो भीडभन्दा छुट्टै रहेर सौम्य मुद्रामा हाँसिरहेको प्रतीत हुन्छ।

शान्त वातावरणमा सुन्दर तालको मोहनी मुस्कान चाहनेहरुका लागि बेगनास ताल उपयुक्त गन्तव्य हुनसक्छ।

बेगनास सफा देखिन्छ। वरिपरि जंगल क्षेत्र भएकाले त्यसको स्वभाविक शितलता तालमा पनि परेको देखिन्छ। आँखामोहक र मनमोहक दुवै छ, बेगनास।

बेगनासको सुन्दरता अवलोकन गर्नका लागि दुई/तीन विकल्प सहयोगी हुनसक्छन्।

पहिलो, बेगनासकै किनारा। शितल र हरियाली किनारा मात्रै होइन, झन्डै एक किलोमिटर लम्बाइको ड्याममा टहल्दै समय व्यतित गर्न सकिन्छ।

दोस्रो, ढुंगामा चढेर बेगनासको भित्री सुन्दरता अनुभूत गर्न सकिन्छ। फेवा तालमा जस्तो जलकुम्भीको ‘आतंक’ यहाँ छैन। पानी पनि सफा देखिन्छ।

तेस्रो, बेगनासको किनाराबाट चार किलोमिटर जति माथि डाँडामा रहेको सुन्दरी डाँडामा रहेको भ्युटावरबाट बेगनासको समग्र नापनक्सा अवलोकन गर्न सकिन्छ। सुन्दरी डाँडामा पुग्नुका अर्को एउटा फाइदा पनि छ। त्यो हो, एउटै स्थानबाट बेगनासको अतिरिक्त रुपा ताल पनि देख्न सकिन्छ।