काठमाडौं- भैरहवामा निर्माण भइरहेको गौतम बुद्ध अन्तर्राष्ट्रिय विमानस्थलको निर्माणको काम अन्तिम चरणमा पुगेको छ।
विमानस्थल सञ्चालनका लागि आवश्यक संरचना निर्माणको काम अन्तिम चरणमा पुगेसँगै फिनिसिङको काम सुरु भएको छ। विमानस्थल सुदृढीकरण कार्य आयोजना इकाई रुपन्देहीका प्रमुख प्रवेश अधिकारीका अनुसार विमानस्थल सञ्चालनका लागि आवश्यक संरचना निर्माणअन्तर्गतका भौतिक संरचना निर्माणको काम सकिएको छ। टर्मिनल भवनमा फिनिसिङ र उपकरण जडानको काम सुरु भएको उनको भनाइ छ।
सरकारले २०१४ नोभेम्बरमा चिनियाँ ठेकेदार ‘नर्थ वेस्ट सिभिल एभिएसन’सँग गौतम बुद्ध अन्तर्राष्ट्रिय विमानस्थल निर्माणका लागि सम्झौता गरेको थियो।
सम्झौताअनुसार ठेकदारले २०१७ को डिसेम्बर ३१ सम्म विमानस्थलको ‘आइसिबी- जिरो एक’ अन्तर्गतका भौतिक पूर्वाधारको सबै काम सक्नुपर्ने थियो। तर, निर्माण कम्पनीले समयमा काम नसकेपछि समय थप्दै सन् २०१९ को डिसेम्बरसम्ममा ठेकेदार कम्पनीले निर्माणको काम सक्नुपर्ने म्याद रहेको छ।
सरकारले ६ अर्ब २२ करोड रुपैयाँमा ‘आइसिबी-जिरो एक’ अन्तर्गत विमानस्थलको ३ हजार मिटरको रनवे, ट्याक्सी वे, एप्रोन, टर्मिनल भवन र टावर कन्ट्रोल भवन निर्माणका लागि सम्झौता गरेको थियो।
विमानस्थलमा रनवे वे निर्माणको काम सकिसकेको छ भने प्रशासनिक भवन निर्माणको काम पनि लगभग सकिसकेको अधिकारी बताउँछन्।
टर्मिनल भवनको मुख्य संरचनाको कामपनि सकिएको छ। उनको अनुसार अहिले टर्मिन भवनमा मार्बल, टायल, सिसिटिभी, एक्स–रे मेसिन जडान लगायनको काम सुरु भएको छ।
योसँगै निर्माण कम्पनीले अहिले कार पार्किङ क्षेत्रको काम थालेको उनको भनाइ छ। ‘प्रशासनिक भवनको फिनिसिङको काम पनि अन्तिम चरणमा पुगेको छ,’ अधिकारीले भने, ‘टर्मिनल भवनभित्र सेन्टल एसी स्टिम, डिस्प्ले बोर्ड, सिसिटिभी, यूपिएस, सञ्चार उपकरण, एक्सेर मेसिन, फायरसम्बन्धी उपकरण जडानको काम पनि धमाधम भइरहेको छ।’
टर्मिनल भवनमा रहने ८/१० वटा मुख्य उपकरणमध्ये ब्यागेज ह्यान्डिलिङ र लिफ्टको कामबाहेक अन्य उपकरण जडानको काम सुरु भएको अधिकारीले बताए।
ब्यागेज बेल्ट र लिफ्टको सामान भने नआइपुग्दा काम सुरु नभएको उनको भनाइ छ। यो पनि सामान आएको डेढ महिना भित्र जडान सम्पन्न हुने उनको दाबी छ।
अबको एक महिनाभित्र बाँकी आइपुगेको अवस्थामा डिसेम्बर भित्रमा जडान सम्पन्न हुने अधिकारीले बताए।
‘आगामी डिसेम्बर महिनाभित्र निर्माण कम्पनीले नेपाल सरकारलाई हस्तान्तरण गर्नका लागि एउटा किला ठोक्ने काम पनि बाँकी रहन मिल्दैन,’ अधिकारीले भने, ‘ थोरै पनि काम बाँकी रहेको अवस्थामा त्यसलाई सम्पन्न गर्न केही समय लाग्न सक्छ। तर, हाम्रो लक्ष्य डिसेम्बरभित्रै निर्माणका सबै काम सम्पन्न गर्ने हो। यसबाहेक विमानस्थल सञ्चालनका लागि अन्य निकायको व्यवस्थापन, प्रमाण पत्र, उडान क्यालिबेरेसन, टेस्ट ल्यान्डलगायतको काम भने थप समय अवश्य पनि लाग्छ।’ डिसेम्बरमै सबै काम हस्तान्तरण हुन्छ भने अवस्थमा अहिले नै नरहेको उनको भनाइ छ।
.jpg)
‘ल्यान्ड साइटतर्फका काम पनि धेरै हुन्छन्। आइसीबी १ अन्तर्गतका काम मुख्य विमानस्थल सञ्चालनका लागि आवश्यक संरचना अर्थात् पूर्वाधार निर्माणको काम चाँहि करिब करिब सम्पन्न भइसकेको छ। अहिले फिनिसिङ र उपकरण जडानको काम अगाडि बढेको छ,’ अधिकारीले भने।
सम्रगमा विमानस्थलको भौतिक प्रगति ८२ प्रतिशतभन्दा बढी भएको छ।
बाँकी १७/१८ प्रतिशत काम भनेको उपकरण जडानको मात्र हो। यसमा ६ प्रतिशतको हाराहारीमा काम भइसकेको अधिकारी बताउँछन्। सिभिल तर्फको ७ प्रतिशत काम बाँकी छ भने उपकरण जडान तर्फ करिब १२ प्रतिशत काम बाँकी रहेको उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_aDpltwY0rK-1782355389.webp)
-1764146706.png)
-1782224905-1782225890.jpeg)
