काठमाडौं- गैरआवासीय नेपाल संघ अन्तर्राष्ट्रिय समन्वय परिषद् (एनआरएनए) को नयाँ नेतृत्वका लागि वर्तमान उपाध्यक्ष कुमार पन्तले अध्यक्षमा उम्मेदवारी घोषणा गरेका छन्। शुक्रबार काठमाडौंमा पत्रकार सम्मेलन गर्दै उनले उम्मेदवारी दिने घोषणा गरेका हुन्।
सन् १९९७ मा अध्ययनका लागि जर्मन गएका उनले एनआरएनएको विभिन्न कमिटीमा रहेर काम गरिसकेका छन्। पन्त सन् २००४ मा गैरआवासीय नेपाली संघमा आवद्ध भएका हुन्। सन् २०११ मा युरोप क्षेत्रको क्षेत्रीय संयोजक बनेका पन्तको युरोपका विभिन्न देशमा होटल व्यवसायमा लगानी रहेको छ।
एनआरएनए मुभमेन्टलाई थप मजबुत बनाउँदै मध्यपूर्वमा रहेका श्रमिकको हितमा काम गर्न आफूले उम्मेदवारी दिएको उनको भनाइ छ। अघिल्लो कार्यकालमा सहमतिकै लागि पन्तले उम्मेदवारी फिर्ता लिँदै उपाध्यक्ष पदमा दोहोरिएका थिए।
विश्वभर छरिएर रहेका करिब ८० लाख नेपालीलाई व्यक्तिगत तथा सामूहिक लगानीका लागि आफू अध्यक्ष निर्वाचित भए पहल गर्ने उनले योजना सुनाए। ‘प्रवासी नेपालीहरूको श्रम, सिप र प्रविधिलाई उपयोग गर्दै नेपालमा विकासमा सहयोग गर्न एनआरएनहरु प्रतिवद्ध छन्,’ उनले भने, ‘८३ देशमा रहेका नेपालीलाई एकीकृत गरेर ल्याउन मैले भूमिका खेल्नेछु।’
गत वर्ष भएको एनआरएनए विज्ञ सम्मेलनमा १० अर्बको फन्ड बनाउने विषयमा हस्ताक्षर भइसकेकाले त्यसलाई पूरा गराउन आफूले पहल गर्ने पन्तले बताए। सम्मेलनले श्वेतपत्र जारी गरी नेपाल सरकारलाई उपलब्ध गराएको उनको भनाइ छ।
सरकारले ‘नेपाल भ्रमण वर्ष २०२०’ घोषणा गरेकाले धेरैभन्दा धेरै पर्यटक नेपाल पठाउन एनआरएनएहरुले महत्वपूर्ण भूमिका खेल्नेछन्। त्यसमा आफू अध्यक्ष भएपछि अझ बढी प्राथमिकता दिएर काम गर्ने पन्तले प्रतिवद्धता जनाए। ‘एनआरएनएको अध्यक्ष भएपछि पञ्जिकृत सदस्यहरुको सदस्यता नवीकरण शुल्क नलाग्ने व्यवस्था मिलाउनेछु,’ उनले भने, ‘नेपालको संविधानले व्यवस्था गरे अनुरुप नागरिकता तथा मताधिकारका लागि पहल गर्न भरपुर रुपमा लाग्ने मेरो प्रतिवद्धता छ।’
विदेशिने कामदारलाई दक्ष बनाएर माथि उठाउन पहल गर्ने र श्रमिक कल्याणकारी कोषलाई आकर्षक बनाउने पन्तले उम्मेदवारी घोषणा गर्ने क्रममा बताए। एनआरएनएलाई गैरराजनीतिक संस्थाको छबि कायम राख्दै विशुद्ध सामाजिक संस्था बनाइराख्न आफू पूर्ण प्रतिवद्ध रहेको उनको भनाइ छ।
एनआरएनएको नयाँ नेतृत्व चयनका लागि दसैंतिहारको बीचमा निर्वाचन हुँदैछ। हालसम्म एनआरएनएका लागि पन्तले मात्र उम्मेदवारी घोषणा गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769347165.png)
-1764146706.png)
