काठमाडौं- द्वन्द्वकालीन मुद्दा टुंग्याउन बनाइएका आयोगमा पदाधिकारी सिफारिस गर्न बनाइएको सिफारिस समितिको बिहिबार बैठक बसेको छ।
सिंहदरबारस्थित समितिको सचिवालयमा बसेको समितिको बैठकले औपचारिक निर्णय गर्नु भन्दा पनि अनौपचारिक छलफलमा केन्द्रित भएको छ।
धेरै समयपछि समिति बैठक बसेको भन्दै समिति सदस्य शर्मिला कार्कीले आयोगका लागि राजनीतिक दलले नाम छनौंट गरिसकेको भन्ने विषय र त्यसबारे मानवअधिकार आयोगले जनाएको आपत्ति लगायतको विषयमा पनि कुरा भएको बताइन् ।
४ भदौंमा प्रधानमन्त्री केपी शर्मा ओलीले बोलाएको सर्वदलीय बैठकमा सत्य निरुपण तथा मेलमिलाप अयोगमा पूर्वमहान्याधिवक्ता रमण श्रेष्ठ र बेपत्ता पारिएका व्यक्तिको छानबिन आयोगमा पुरानै पदाधिकारी पठाउन दलहरू सहमतिमा पुगेको खबर सार्वजनिक भएका थिए।
मानवअधिकार आयोगले त्यसप्रति आपत्ति जनाउँदै आयोगमा नाम सिफारिस गर्ने प्रक्रिया निष्पक्ष नभए समितिबाटै बाहिरिने चेतावनी दिएको थियो।
द्वन्द्वपीडितहरुको संस्था द्वन्द्वपीडित साझा चौतारीले पनि यसप्रति आपत्ति जनाएको थियो।
आजको बैठकमा समिति सदस्य प्रमेबहादुर खड्का भने उपस्थित भएनन् । कार्कीले कार्यविधि अनुसारै आवेदन दिएका बाहेक बाहिरबाट ल्याउने÷नल्याउने विषयमा पनि छलफल भएको जानकारी दिइन् ।
‘अब यो-यो दिनमा यो काम गर्ने भन्ने निर्णय गरेरै जाने र नाम सिफारिस गर्न एक हप्ता भन्दा ढिला गर्नुहुँदैन भन्ने सहमति भयो,’ बैठकबारे कार्कीले नेपाल लाइभसँग भनिन्, ‘अब यो बिषयमा धेरै कुर्ने कुरा हुँदैन्।’
सत्य निरुपण तथा मेलमिलाप आयोग र बेपत्ता पारिएका व्यक्तिको छानबिन आयोगमा नाम सिफारिस गर्नका लागि गत चैत १२ गते पूर्वप्रधानन्यायाधीश ओमप्रकाश मिश्रको संयोजकत्वमा ५ सदस्यीय समिति गठन गरेको थियो।
समितिले गठन भएको ५ महिनासम्म पनि आयोगका लागि नाम सिफारिस गर्न सकेको छैन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
